کیشیناؤ (مالدووا): مالدووا کی صدر مایا ساندو نے صدر دروپدی مرمو کے دورۂ مالدووا کو اپنے ملک کے لیے اعزاز قرار دیتے ہوئے کہا کہ دونوں ممالک جمہوری اقدار، ریاستوں کی خودمختاری اور بین الاقوامی قانون کے احترام کے مشترکہ نظریے پر یقین رکھتے ہیں۔

صدر مرمو کے ساتھ مشترکہ پریس کانفرنس سے خطاب کرتے ہوئے مایا ساندو نے کہا کہ سفارتی تعلقات کے 34 سالہ تاریخ میں یہ پہلی بار ہے کہ کسی ہندوستانی صدر نے مالدووا کا دورہ کیا ہے۔ انہوں نے کہا، "آج مالدووا کے لیے ایک خاص دن ہے۔ محترمہ صدر، آپ کا ہمارے ملک میں خیر مقدم ہے۔ آپ کا یہ دورہ ہمارے لیے اعزاز ہے اور یہ ہمارے ملک اور عوام کے لیے احترام کا اظہار بھی ہے۔"

یوکرین میں جاری جنگ کا ذکر کرتے ہوئے مایا ساندو نے کہا کہ مالدووا کی سرحد کے قریب گزشتہ چار برس سے روس کی "جارحانہ اور غیر منصفانہ" جنگ جاری ہے، جس میں بے گناہ شہری مارے جا رہے ہیں اور پورے یورپ کا امن خطرے میں ہے۔

انہوں نے کہا، "مالدووا اس جارحیت کی سخت مذمت کرتا ہے۔ ہندوستان کی طرح ہم بھی ریاستوں کی خودمختاری اور بین الاقوامی قانون پر یقین رکھتے ہیں۔ ہم تمام آزاد ممالک سے اپیل کرتے ہیں کہ وہ یوکرین کی حمایت کریں تاکہ اس کی آزادی، خودمختاری اور سرحدوں کا احترام برقرار رہے۔" اس موقع پر صدر دروپدی مرمو نے مالدووا کو مہاتما گاندھی کا مجسمہ بطور تحفہ پیش کیا۔ مایا ساندو نے کہا کہ مہاتما گاندھی کا سب سے بڑا سبق یہ ہے کہ حقیقی امن طاقت کے زور پر مسلط خاموشی نہیں بلکہ آزاد قوموں کے درمیان باہمی احترام اور مفاہمت سے قائم ہوتا ہے۔

انہوں نے مزید کہا کہ اگرچہ دونوں ممالک کے حجم میں بہت فرق ہے، لیکن آزادی، وقار اور عوامی فلاح جیسے بنیادی جمہوری اقدار دونوں کو ایک دوسرے کے قریب لاتی ہیں۔ اس سے قبل صدر دروپدی مرمو کا کیشیناؤ کے صدارتی محل میں صدر مایا ساندو نے خیر مقدم کیا، جہاں انہیں گارڈ آف آنر بھی پیش کیا گیا۔

راشٹرپتی بھون کے مطابق دونوں رہنماؤں کے درمیان دوطرفہ تعلقات کے تمام پہلوؤں پر تعمیری اور مستقبل پر مبنی بات چیت ہوئی۔ وزارت خارجہ کے ترجمان رندھیر جیسوال نے کہا کہ دونوں صدور نے ہندوستان-مالدووا تعاون کے تمام شعبوں کا جائزہ لیا اور تعلقات کو مزید وسعت دینے کے امکانات پر تبادلہ خیال کیا۔ انہوں نے کہا کہ مذاکرات میں نئے مواقع تلاش کرنے اور دوطرفہ تعاون کو مزید مضبوط بنانے کے عزم کا اعادہ کیا گیا۔ صدر دروپدی مرمو اس وقت اپنے تین یورپی ممالک، مالدووا، شمالی مقدونیہ اور رومانیہ کے دورے پر ہیں۔