نئی دہلی: وزیر اعظم نریندر مودی نے جمعرات کو پیرس میں منعقد بین الاقوامی خلائی سربراہی اجلاس سے خطاب کرتے ہوئے ہندوستان کے خلائی شعبے اور ہندوستانی خلائی تحقیقاتی تنظیم (اسرو) کی کارکردگی کو سراہا اور خلائی شعبے میں عالمی تعاون اور پائیداری پر زور دیا۔ سربراہی اجلاس سے ورچوئل خطاب کرتے ہوئے وزیر اعظم نے ’’وسودھیو کٹمبکم‘‘ یعنی پوری دنیا ایک خاندان کے پیغام کو اجاگر کیا۔

انہوں نے کہا کہ خلائی تحقیق، اختراع اور خلا کے تحفظ کے لیے باہمی تعاون ضروری ہے۔ اسرو پر عالمی اعتماد کا ذکر کرتے ہوئے مودی نے کہا کہ 34 ممالک کے 430 سے زیادہ سیٹلائٹ ہندوستانی راکٹوں کے ذریعے خلا میں پہنچائے جا چکے ہیں۔

وزیر اعظم نے کہا، ’’صدیوں سے خلا نے ہماری تخیل کو متاثر کیا ہے۔ آج خلا زمین پر زندگی کو متاثر کر رہا ہے، چاہے وہ آب و ہوا ہو، فصلیں ہوں، سمندر ہوں یا انسانی بستیاں۔ خلا کے امکانات لامحدود ہیں، لیکن ہماری ذمہ داری مشترکہ ہے۔ جیسے جیسے مدار زیادہ مصروف، ٹیکنالوجی زیادہ طاقتور اور خلائی شعبے میں کردار ادا کرنے والے زیادہ ہو رہے ہیں، ہماری ترجیحات واضح ہونی چاہئیں: محاذ آرائی کے بجائے تعاون، قلیل مدتی فائدے کے بجائے پائیداری اور اخراج کے بجائے شمولیت۔‘‘ انہوں نے کہا کہ ہندوستان کا نقطۂ نظر ’’وسودھیو کٹمبکم‘‘ کے اصول پر مبنی ہے، یعنی ایک زمین، ایک خاندان اور ایک مستقبل۔ انہوں نے کہا کہ اس جذبے کو اب زمین سے آگے خلا تک لے جانے کی ضرورت ہے۔

مودی نے کہا کہ ہندوستان خلائی شعبے میں محفوظ اور پائیدار ترقی کی حمایت کرتا ہے، جس کی بنیاد بین الاقوامی قوانین، مذاکرات اور کثیر ملکی تعاون پر ہونی چاہیے۔ انہوں نے کہا، ’’ہم بین الاقوامی قانون، مذاکرات اور کثیر ملکی تعاون پر مبنی محفوظ، پرامن اور پائیدار خلائی نظام کی حمایت کرتے ہیں۔ سائنسی اعداد و شمار کھلے پن اور دیانت داری کے ساتھ اجتماعی مفاد کے لیے استعمال ہونے چاہئیں۔‘‘ انہوں نے کہا کہ ہندوستان کا خلائی سفر اسی فلسفے کی عکاسی کرتا ہے اور اسرو نے اپنی بہترین کارکردگی اور کم لاگت والے مشنز کے ذریعے دنیا بھر میں پذیرائی حاصل کی ہے۔

اسرو کی صلاحیتیں کسانوں اور ماہی گیروں کی مدد، موسم کی پیش گوئی، آفات سے نمٹنے اور نیوی گیشن سمیت مختلف شعبوں میں کام آ رہی ہیں۔ وزیر اعظم نے چندریان-3 اور آدتیہ-ایل1 مشنوں کی کامیابی کا ذکر کرتے ہوئے کہا کہ ہندوستان کا ہدف 2035 تک اپنا خلائی اسٹیشن قائم کرنا اور 2040 تک ایک ہندوستانی شہری کو چاند پر بھیجنا ہے۔ مودی نے کہا، ’’چندریان-3 نے ہندوستان کو چاند کے جنوبی قطب کے قریب اترنے والا دنیا کا پہلا ملک بنایا۔ آدتیہ-ایل1 سورج کے رازوں سے پردہ اٹھا رہا ہے۔ گزشتہ سال ایک ہندوستانی خلاباز نے بین الاقوامی خلائی اسٹیشن کا دورہ کیا۔ مستقبل میں ہمارا ہدف 2035 تک ہندوستانی خلائی اسٹیشن قائم کرنا اور 2040 تک ایک ہندوستانی کو چاند پر بھیجنا ہے۔‘‘

وزیر اعظم نے ہندوستان کے نجی خلائی شعبے کی بڑھتی ہوئی سرگرمیوں کا بھی ذکر کیا۔ انہوں نے کہا کہ کاروباری شعبے کی توانائی اب اسرو کی مہارت کے ساتھ مل رہی ہے۔ انہوں نے فرانس کو ہندوستان کا قابل اعتماد شراکت دار قرار دیتے ہوئے کہا کہ تھمبا میں 1960 کی دہائی میں ہندوستان کے خلائی پروگرام کے آغاز سے ہی فرانس نے اس شعبے میں تعاون کیا ہے۔ انہوں نے فرانس اور دنیا بھر کے ممالک کو ہندوستان کے خلائی شعبے کی اگلی سرحد میں شراکت دار بننے کی دعوت دی۔ مودی نے کہا، ’’پیرس کا خلائی سربراہی اجلاس ایک واضح پیغام دے کہ ہم پوری انسانیت اور آنے والی نسلوں کے لیے مل کر تحقیق کریں گے، مل کر اختراع کریں گے اور مل کر خلا کا تحفظ کریں گے۔‘‘

پیرس میں 9 اور 10 ستمبر کو منعقد ہونے والے اس خلائی سربراہی اجلاس کا مقصد بیرونی خلا کے محفوظ اور پائیدار استعمال سے متعلق چیلنجز پر غور کرنا ہے۔ دریں اثنا، سربراہی اجلاس کے دوران ہندوستان سے متعلق کئی اہم معاہدوں اور اعلانات بھی کیے گئے۔ فرانس کی رائیڈ! (RIDE!) نے ہندوستان کے ساتھ خلائی تعاون مزید مضبوط کرنے کا اعلان کیا۔ فرانسیسی لانچ سروس فراہم کرنے والی کمپنی نے ہندوستان کی ٹیک می ٹو اسپیس (TakeMeToSpace) کے دو نئے سیٹلائٹ خلا میں بھیجنے کے لیے معاہدہ کیا ہے۔ ٹیک می ٹو اسپیس کو ہندوستان کی پہلی ایسی کمپنی قرار دیا گیا ہے جو مدار میں ڈیٹا سینٹرز ڈیزائن کرتی ہے۔

فرانس کی سفران اسپیس نے ہندوستان کی دھرو اسپیس کے ساتھ بھی کئی معاہدوں پر دستخط کیے ہیں، جن کی مالیت 50 لاکھ یورو سے زیادہ ہے۔ ان معاہدوں کے تحت ہندوستان کے مستقبل کے ایس بی ایس-III خلائی نگرانی نظام کے لیے سفران کی اہم ٹیکنالوجیز، مواصلاتی نظام، انرشیل نیوی گیشن یونٹس، آپٹیکل پے لوڈز اور گراؤنڈ اسٹیشن فراہم کیے جائیں گے۔ اس نظام کے تحت 2027 سے 2030 کے درمیان 52 سیٹلائٹ خلا میں بھیجے جانے کا منصوبہ ہے۔ اس کے علاوہ فرانس کی یو اسپیس (U-Space) اور ہندوستان کی ایکسی کیڈس (AXISCADES) نے ہندوستانی مائیکرو سیٹلائٹ مارکیٹ میں امکانات تلاش کرنے اور بڑھتی ہوئی تجارتی و ادارہ جاتی ضروریات پوری کرنے کے لیے تجارتی تعاون کے معاہدے پر دستخط کیے ہیں۔