مظفرآباد: پاکستان آرمی ایوی ایشن کا ایک ایم آئی-17 ہیلی کاپٹر بدھ کے روز مظفرآباد کے قریب ٹیک آف کے دوران مبینہ طور پر فنی خرابی کے باعث حادثے کا شکار ہو گیا، جس کے نتیجے میں اس میں سوار تمام اہلکار جاں بحق ہو گئے۔

پاکستانی اخبار ڈان کے مطابق پاک فوج کے شعبۂ تعلقاتِ عامہ (آئی ایس پی آر) نے ایک بیان میں تصدیق کی ہے کہ حادثے میں کوئی بھی شخص زندہ نہیں بچ سکا۔ آئی ایس پی آر کے بیان میں کہا گیا، "ہیلی کاپٹر میں سوار تمام اہلکار شہادت کے درجے پر فائز ہوئے۔ حادثے میں کوئی زندہ نہیں بچا۔" بیان کے مطابق امدادی اور ریکوری ٹیمیں فوری طور پر جائے حادثہ پر پہنچ گئیں اور کارروائیاں شروع کر دی گئیں۔

آئی ایس پی آر نے مزید بتایا کہ حادثے کی اصل فنی وجوہات جاننے کے لیے تحقیقاتی بورڈ تشکیل دے دیا گیا ہے، جو حادثے کے تمام پہلوؤں کا جائزہ لے گا۔ بیان میں کہا گیا کہ پاکستان کے چیف آف ڈیفنس فورسز فیلڈ مارشل عاصم منیر اور پاک فوج کے تمام افسران و جوانوں نے قیمتی جانوں کے ضیاع پر گہرے دکھ اور افسوس کا اظہار کیا ہے اور سوگوار خاندانوں سے دلی تعزیت کی ہے۔

دوسری جانب جیو نیوز کے مطابق ہیلی کاپٹر حادثے کی حتمی وجہ تاحال واضح نہیں ہو سکی ہے اور تحقیقات کے ذریعے اس فنی خرابی کا تعین کیا جائے گا جس کے باعث یہ سانحہ پیش آیا۔ یہ ایک ابتدائی خبر ہے، مزید تفصیلات کا انتظار کیا جا رہا ہے۔