نیویارکنیویارک شہر کے میئر ظہران ممدانی نے امریکی وفاقی حکومت سے مطالبہ کیا ہے کہ وہ بین الاقوامی فوجداری عدالت کی جانب سے اسرائیلی وزیر اعظم بنیامین نیتن یاہو کے خلاف جاری گرفتاری وارنٹ پر عمل درآمد کرے۔ انہوں نے ایک بار پھر کہا کہ نیتن یاہو نیویارک شہر میں خوش آمدید نہیں ہیں۔سوشل میڈیا پلیٹ فارم ایکس پر جاری ایک ویڈیو پیغام میں ظہران ممدانی نے کہا کہ ان کی انتظامیہ نے اس بات کا جائزہ لیا کہ اگر نیتن یاہو نیویارک آئیں تو کیا شہر کی انتظامیہ کے پاس بین الاقوامی فوجداری عدالت کے وارنٹ پر عمل درآمد کا قانونی اختیار موجود ہے۔

انہوں نے کہا کہ قانونی جائزے کے بعد یہ واضح ہوا کہ نیویارک شہر کو ایسا کوئی آزاد قانونی اختیار حاصل نہیں ہے۔ تاہم امریکی وفاقی حکومت کے پاس یہ اختیار موجود ہے اور وہ مطالبہ کرتے ہیں کہ وفاقی حکومت بین الاقوامی فوجداری عدالت کے ساتھ تعاون کرتے ہوئے اس وارنٹ پر عمل کرے۔ظہران ممدانی نے کہا کہ بنیامین نیتن یاہو نیویارک شہر میں خوش آمدید نہیں ہیں اور نہ ہی کوئی ایسا شخص جس پر جنگی جرائم کے الزامات ہوں۔

انہوں نے اپنے بیان میں نیتن یاہو کو جنگی مجرم قرار دیتے ہوئے کہا کہ وہ بین الاقوامی فوجداری عدالت کے اس مؤقف سے اتفاق کرتے ہیں کہ نیتن یاہو کو گرفتار کر کے ان پر مقدمہ چلایا جانا چاہیے۔ انہوں نے کہا کہ یہی اصول ہر اس شخص پر لاگو ہونا چاہیے جس پر عدالت نے فرد جرم عائد کی ہو۔میئر نے غزہ جنگ کے دوران اسرائیل کے لیے امریکی حمایت پر بھی تنقید کی اور الزام لگایا کہ امریکی امداد نے ایسی فوجی کارروائیوں کو ممکن بنایا جن میں عام شہری ہلاک ہوئے۔

ان کے مطابق بین الاقوامی فوجداری عدالت کا گرفتاری وارنٹ ان الزامات کی سنگینی کو ظاہر کرتا ہے اور ان کا فیصلہ عدالت میں ہونا چاہیے۔چند روز قبل ظہران ممدانی نے دی نیویارک ٹائمز کو بتایا تھا کہ ان کی انتظامیہ نیویارک سٹی لا ڈپارٹمنٹ کے ساتھ اس بات پر غور کر رہی ہے کہ اگر نیتن یاہو ستمبر میں اقوام متحدہ کی جنرل اسمبلی کے اجلاس کے لیے نیویارک آئیں تو شہر کے قانونی اختیارات کی حدود کیا ہوں گی۔انہوں نے کہا تھا کہ قانون جس حد تک اجازت دے گا وہ اسی کے مطابق کارروائی کریں گے لیکن اس مقصد کے لیے نئے قوانین نہیں بنائیں گے۔ ان کا کہنا تھا کہ نیتن یاہو کا مقام ہیگ میں ہے۔

دوسری جانب امریکی صدر ڈونلڈ ٹرمپ نے واضح کیا کہ نیتن یاہو کو امریکہ میں کسی صورت گرفتار نہیں کیا جائے گا۔

ٹرمپ نے ٹروتھ سوشل پر لکھا کہ بنیامین نیتن یاہو امریکہ میں کسی بھی صورت گرفتار نہیں ہوں گے۔ انہوں نے کہا کہ اسرائیلی وزیر اعظم ایران کے خلاف لڑ رہے ہیں اور گرفتاری اگر ہونی چاہیے تو ان لوگوں کی ہونی چاہیے جو ایران کی کارروائیوں کے ذمہ دار ہیں۔اسرائیلی وزیر اعظم کے دفتر نے بھی ظہران ممدانی کے بیان پر سخت ردعمل ظاہر کرتے ہوئے بین الاقوامی فوجداری عدالت کے وارنٹ کو بے بنیاد قرار دیا۔ دفتر نے عدالت کو ایک ایسی عدالت کہا جسے اسرائیل اور امریکہ پر کوئی قانونی اختیار حاصل نہیں۔

بیان میں یہ بھی کہا گیا کہ ظہران ممدانی کو نیویارک شہر کے مسائل پر توجہ دینی چاہیے نہ کہ اسرائیل کو نشانہ بنانا چاہیے۔ ساتھ ہی اسرائیلی فوج کی غزہ میں کارروائیوں کا دفاع کرتے ہوئے دعویٰ کیا گیا کہ عام شہریوں کے جانی نقصان کو کم سے کم رکھنے کی بھرپور کوشش کی گئی۔واضح رہے کہ بین الاقوامی فوجداری عدالت نے نومبر 2024 میں غزہ جنگ کے دوران مبینہ جنگی جرائم اور انسانیت کے خلاف جرائم کے الزامات پر اسرائیلی وزیر اعظم بنیامین نیتن یاہو اور سابق وزیر دفاع یوآو گیلنٹ کے خلاف گرفتاری وارنٹ جاری کیے تھے۔

اسرائیل نے ان الزامات کو مسترد کرتے ہوئے عدالت کے دائرۂ اختیار کو بھی چیلنج کیا ہے۔ امریکہ بھی روم معاہدے کا رکن نہیں ہے جس کے تحت بین الاقوامی فوجداری عدالت قائم کی گئی تھی۔ اس لیے امریکہ پر بین الاقوامی قانون کے تحت ان گرفتاری وارنٹ پر عمل درآمد کی کوئی قانونی ذمہ داری عائد نہیں ہوتی۔