نئی دہلی: لکسمبرگ کے نائب وزیر اعظم اور وزیر خارجہ زیویئر بیٹل نے پیر کو عالمی سطح پر ہندوستان کی کارکردگی اور قیادت کی تعریف کرتے ہوئے کہا کہ جب وزیر اعظم نریندر مودی کوئی عہد کرتے ہیں تو اس پر عملی کارروائی بھی کی جاتی ہے۔ بیٹل نے قومی دارالحکومت میں وزیر خارجہ ایس جے شنکر کے ساتھ دوطرفہ ملاقات کے دوران یہ بات کہی۔

انہوں نے مختلف ممالک کے درمیان پل بنانے اور عالمی چیلنجوں سے نمٹنے کے لیے ہندوستان کے طریقۂ کار کی تعریف کی۔ بیٹل نے کہا، ’’مجھے آپ کے اور وزیر اعظم مودی کے بارے میں ایک بات جو پسند ہے، وہ یہ ہے کہ جب آپ کوئی بات کہتے ہیں تو اس پر عمل بھی کرتے ہیں۔‘

‘ کووڈ-19 وبا کے دوران ہندوستان اور لکسمبرگ کے درمیان تعاون کو یاد کرتے ہوئے بیٹل نے کہا کہ وہ خاص طور پر اس رفتار اور کارکردگی سے متاثر ہوئے جس کے ساتھ ہندوستان نے اپنے وعدوں کو عملی جامہ پہنایا۔ انہوں نے کہا، ’’آپ کے وزیر اعظم نے کہا تھا کہ ’ہم یہ کریں گے‘۔ عام طور پر یورپ میں جب ہم ایسا کہتے ہیں تو یہ اس بات پر بحث شروع ہونے کا آغاز ہوتا ہے کہ وعدوں کو کیسے پورا کیا جائے۔

ہندوستان میں یہ آغاز بھی تھا اور اختتام بھی، کیونکہ اگلے ہی دن سب کچھ ہو چکا تھا۔‘‘ انہوں نے مزید کہا، ’’آپ کے سیاسی اعلانات کو عملی جامہ پہنانے کی کارکردگی سے بھی میں متاثر ہوا ہوں۔‘‘ بیٹل نے عالمی تنازعات اور غیر یقینی صورتحال کے درمیان پل بنانے میں ہندوستانی قیادت کے کردار پر بھی شکریہ ادا کیا۔

انہوں نے کہا کہ عالمی چیلنجوں سے نمٹنے کے لیے عملی اور حقیقت پسندانہ طریقۂ کار بالآخر لوگوں کے مفاد میں ہوتا ہے۔ لکسمبرگ کے نائب وزیر اعظم نے کہا، ’’کچھ ممالک یہ نہیں سمجھتے کہ جب آپ پل بنانا چاہتے ہیں تو حقیقت پسند ہونا ضروری ہے۔ اس کا مطلب کسی کے خلاف ہونا نہیں بلکہ لوگوں کے حق میں ہونا ہے۔‘‘ انہوں نے امید ظاہر کی کہ ہندوستان دنیا کو درپیش تنازعات اور چیلنجوں سے نمٹنے میں اسی کارکردگی کا مظاہرہ کرتا رہے گا۔ بیٹل نے ہندوستان اور لکسمبرگ کو دوست قرار دیتے ہوئے قابل اعتماد اور دیانت دار تعلقات کی اہمیت پر زور دیا۔ انہوں نے کہا کہ دونوں ممالک نے گزشتہ برسوں کے دوران اپنے دوطرفہ تعلقات کو مزید گہرا کرنے میں نمایاں پیش رفت کی ہے۔

انہوں نے دونوں ممالک کے درمیان بڑھتے ہوئے اقتصادی تعلقات کا بھی ذکر کیا اور بتایا کہ لکسمبرگ کے وزیر اقتصادیات اقتصادی تعاون کو مزید مضبوط بنانے کے لیے الگ سے بات چیت کر رہے ہیں۔ ہندوستان کے سرکاری دورے پر آئے بیٹل نے گرمجوشی سے استقبال کرنے پر ہندوستانی حکومت کا شکریہ ادا کیا اور ہندوستانی قیادت کے ساتھ مزید بات چیت جاری رکھنے کی خواہش ظاہر کی۔

دوسری جانب دونوں رہنماؤں کے درمیان بات چیت کے دوران وزیر خارجہ ایس جے شنکر نے ہندوستان-لکسمبرگ تعلقات میں تجارت، سرمایہ کاری اور مالیاتی تعاون کو بنیادی اہمیت کا حامل قرار دیا۔ انہوں نے لکسمبرگ کے نائب وزیر اعظم اور وزیر خارجہ زیویئر بیٹل کا ہندوستان میں خیرمقدم کیا۔ جے شنکر نے ہندوستان-یورپی یونین آزاد تجارتی معاہدے (ایف ٹی اے) کے لیے لکسمبرگ کی ’’مضبوط حمایت‘‘ پر شکریہ ادا کیا اور کہا کہ یہ معاہدہ ایک اہم مرحلہ عبور کر چکا ہے اور اب اس کے نافذ ہونے کی جانب بڑھ رہا ہے۔ بیٹل 7 سے 9 ستمبر تک تین روزہ سرکاری دورے پر ہندوستان آئے ہیں۔