ٹوکیو :جاپان میں بھارت کے سفیر سبی جارج نے جمعرات کو کہا کہ وزیراعظم نریندر مودی کے دورۂ جاپان کے دوران بھارت اور جاپان کے درمیان متعدد اہم مفاہمتی یادداشتوں(MoUs) پر دستخط ہوں گے اور نتیجہ خیز دستاویزات جاری کی جائیں گی۔ یہ دورہ بھارت-جاپان سالانہ سربراہی اجلاس کا 15واں ایڈیشن ہے۔

سبی جارج نے اے این آئی سے گفتگو میں کہا کہ یہ دورہ آئندہ دہائی کے لیے بھارت-جاپان تعلقات کو نئی رفتار دینے کی توقع رکھتا ہے، جو سیاسی، معاشی اور عوامی سطح پر تعلقات کی مضبوط بنیاد پر استوار ہیں۔

انہوں نے کہا کہ  یہ پہلا موقع نہیں ہے کہ دونوں رہنما ملاقات کر رہے ہیں۔ عزت مآب وزیراعظم مودی اس سے پہلے بھی وزیراعظم ایشیبا سے دو بار مل چکے ہیں، ایک بار لاؤس سمٹ میں اور ایک بار کینیڈا میں جی-7 سمٹ کے دوران۔ تاہم، وزیراعظم ایشیبا کے عہدہ سنبھالنے کے بعد یہ ان کی پہلی ملاقات ہے۔ یہ ایک اہم سالانہ اجلاس ہے اور جیسا کہ میں نے کہا، اس دورے کے دوران ہم کئی اہم نتائج پر کام کر رہے ہیں۔

وزیراعظم مودی 29 سے 30 اگست 2025 کو جاپان کے دورے پر ہوں گے، جاپانی وزیراعظم شیگیرو ایشیبا کی دعوت پر۔ اس موقع پر دونوں رہنما اسٹریٹجک شراکت داری کے مختلف پہلوؤں پر تبادلہ خیال کریں گے۔سبی جارج نے کہا کہ میں بہت خوش ہوں کہ یہ ایک شاندار دورہ ہوگا جو ہمارے تعلقات کے ہر پہلو کا احاطہ کرے گا اور آئندہ 10 برس کے لیے ہمارے تعلقات کو نئی رفتار دے گا۔ کئی اہم یادداشتوں پر دستخط ہوں گے اور اہم نتائج سامنے آئیں گے۔

انہوں نے مزید کہا کہ جاپان کے ہر کونے میں بھارت کی جھلک دکھائی دیتی ہے، جو دونوں ملکوں کے تعلقات کی نوعیت کو ظاہر کرتی ہے۔ہمارے تعلقات بہترین ہیں، چاہے وہ سیاسی ہوں، کاروباری ہوں یا عوامی روابط ہوں۔ آپ جاپان کے کسی بھی حصے میں جائیں، آپ کو بھارت سے جڑا ہوا کچھ نہ کچھ ضرور ملے گا۔

انہوں نے یاد دلایا کہ 2014 میں وزیراعظم مودی اور اُس وقت کے جاپانی وزیراعظم شینزو آبے نے ایک معاہدے پر دستخط کیے تھے جس نے بھارت-جاپان تعلقات کو خصوصی اسٹریٹجک اور عالمی شراکت داری کا درجہ دیا۔
"ہمارے پاس ایک مضبوط بنیاد ہے جس پر ہم یہ تعلقات قائم کر رہے ہیں۔ گزشتہ 10 برسوں میں ہم نے ہر سطح پر شراکت داری کو آگے بڑھایا ہے اور واضح پیش رفت دیکھی جا سکتی ہے۔سبی جارج نے کہا کہ سیاسی تعلقات بہت اچھے ہیں، اقتصادی روابط میں بڑی تبدیلی آئی ہے، اور اس سال ہم بھارت-جاپان 'سائنس، ٹیکنالوجی اور انوویشن ایکسچینج کا سال' منا رہے ہیں۔ یہ دورہ اس بات کا موقع ہے کہ ہم اب تک کے تعلقات کا جائزہ لیں اور آئندہ 10 برسوں کے لیے ایک روڈمیپ مرتب کریں۔

انہوں نے مزید کہا کہ کواڈ(Quad) بھی اجلاس کے دوران ایک اہم موضوع ہوگا۔ بھارت کی خصوصی اسٹریٹجک اور عالمی شراکت داری صرف دو طرفہ نہیں بلکہ کثیرالجہتی بھی ہے۔ کواڈ چار ہم خیال ممالک کا ایک اہم پلیٹ فارم ہے جو انڈو پیسیفک خطے میں امن، استحکام اور خوشحالی کے لیے کام کر رہا ہے۔انہوں نے کہا کہ موجودہ جغرافیائی سیاسی حالات میں بھارت اور جاپان جیسے دو بڑے رہنماؤں کی ملاقات میں پورے خطے کے مسائل پر بات ہوگی، اور کواڈ یقیناً ایجنڈے میں شامل ہوگا۔