بیروت۔ اقوام متحدہ کی عبوری فورس برائے لبنان نے رپورٹ کیا ہے کہ جمعہ سے اتوار کے درمیان اسرائیلی فوج نے جنوبی لبنان میں 455 گولے داغے اور لبنانی فضائی حدود کی 97 مرتبہ خلاف ورزی کی۔ یہ گزشتہ کئی ماہ کے دوران فائرنگ کے شدید ترین ادوار میں سے ایک ہے۔پیر کو جاری کیے گئے ایک بیان میں یونائٹڈ نیشنز انٹیریم فورس اِن لبنان نے کہا کہ صرف ہفتے کے روز 229 گولے داغے گئے۔ یہ امن مشن کی جانب سے 21 جون کے بعد ایک دن میں ریکارڈ کیے جانے والے گولوں کی سب سے زیادہ تعداد ہے۔ 21 جون کو سوئٹزرلینڈ کے شہر برجن اسٹاک میں چار فریقی مذاکرات ہوئے تھے جہاں امریکہ اور ایران کے وفود نے قطر اور پاکستان کے نمائندوں کے ساتھ 14 نکاتی مفاہمتی یادداشت پر تکنیکی مذاکرات کے لیے ملاقات کی تھی۔ اس مفاہمتی یادداشت میں اسرائیل کی جانب سے لبنان میں جنگ بندی کے لیے اقدامات بھی شامل تھے۔

اتوار کی صبح المنصوری میں ایک فضائی حملے کی بھی اطلاع ملی۔اقوام متحدہ کے نائب ترجمان فرحان حق کے مطابق زیادہ تر فضائی حدود کی خلاف ورزیوں میں ڈرونز شامل تھے جبکہ ہیلی کاپٹروں اور جنگی طیاروں کی موجودگی بھی دیکھی گئی۔امن دستوں نے جمعہ کے روز دو اسرائیلی کشتیوں کی نقل و حرکت بھی ریکارڈ کی جو لبنانی پانیوں میں شمال کی جانب بڑھ رہی تھیں اور بعد میں جنوب کی طرف واپس چلی گئیں۔

اسی عرصے کے دوران اسرائیل کے دو مرکاوا ٹینکوں نے مشرق کی جانب 3 گولے داغے جو اقوام متحدہ کی ایک چوکی سے تقریباً 200 میٹر کے فاصلے پر گرے۔ اسی علاقے کی جانب تقریباً 30 راؤنڈ چھوٹے ہتھیاروں سے فائر بھی کیے گئے۔فرحان حق نے بتایا کہ اقوام متحدہ کے امن دستوں نے اپنے آپریشن کے علاقے میں غیر محفوظ ہتھیار۔ پھٹے بغیر رہ جانے والے دھماکہ خیز مواد اور دیسی ساختہ دھماکہ خیز آلات بھی دریافت کیے۔

جمعہ کو اقوام متحدہ کی عبوری فورس برائے لبنان اور لبنانی فوج کی مشترکہ گشت کرنے والی ٹیم نے مشرقی سیکٹر میں ایک سڑک کے کنارے 107 ملی میٹر کا راکٹ لانچر دریافت کیا جس میں ایک راکٹ نصب تھا۔ اس کے علاوہ کئی مزید راکٹ بھی موجود تھے۔ ہتھیاروں کو مزید کارروائی کے لیے قومی فورسز کے حوالے کردیا گیا۔اسی روز امن دستوں نے مشرقی سیکٹر میں پھٹے بغیر رہ جانے والے 2 دھماکہ خیز مواد دریافت کیے اور انہیں ناکارہ بنا دیا۔ مغربی سیکٹر میں بھی 2 دیسی ساختہ دھماکہ خیز آلات دریافت ہوئے جنہیں موقع پر ہی تباہ کردیا گیا۔

موسم گرما کے دوران اقوام متحدہ کی عبوری فورس برائے لبنان نے مسلسل رپورٹ کیا ہے کہ اسرائیل تقریباً روزانہ لبنانی فضائی حدود میں موجود رہتا ہے اور زمین پر بھی فوجی سرگرمیاں جاری رکھتا ہے۔اقوام متحدہ کے مطابق یہ سرگرمیاں سلامتی کونسل کی قرارداد 1701 کی خلاف ورزی ہیں۔ یہ قرارداد جنوبی لبنان میں امن اور استحکام کے لیے بین الاقوامی سطح پر متفقہ فریم ورک کے طور پر منظور کی گئی تھی اور اس نے اسرائیل اور لبنان کے درمیان 2006 کے تنازع کو ختم کرنے میں مدد دی تھی۔5 اگست کو اقوام متحدہ کی عبوری فورس برائے لبنان نے اسرائیلی دفاعی افواج کی جانب سے داغے گئے 113 گولے ریکارڈ کیے تھے۔ اس وقت یہ مشن کی جانب سے 21 جون کے بعد ایک دن میں ریکارڈ کی جانے والی سب سے زیادہ تعداد تھی۔

تقریباً 2 دہائیوں سے سلامتی کونسل کی قرارداد 1701 نے لبنانی فوج کے ساتھ اقوام متحدہ کی عبوری فورس برائے لبنان کے کردار کو وسعت دی ہے اور نسبتاً طویل عرصے تک جاری رہنے والے امن کے لیے حالات پیدا کرنے میں مدد دی ہے۔ اس کے نتیجے میں مقامی آبادی کو اپنے علاقوں کی تعمیر نو۔ کاروبار دوبارہ کھولنے اور سیاحت کی بتدریج واپسی کا موقع ملا۔

یہ پیش رفت 2023 کے اواخر میں شروع ہونے والی کشیدگی سے متاثر ہوئی۔ اکتوبر 2023 میں اسرائیل اور حماس کے درمیان جنگ کے بعد بلیو لائن کے ساتھ فائرنگ کا تبادلہ شروع ہوا۔ یہ صورتحال 7 اکتوبر کو غزہ کی پٹی سے جنوبی اسرائیل میں حماس کی قیادت میں کیے گئے مربوط اچانک سرحد پار حملے کے بعد پیدا ہوئی۔اس کے بعد 2024 اور 2026 کے تنازعات نے ایک بار پھر مقامی آبادی کو جانی نقصان۔ تباہی اور نقل مکانی کا سامنا کرنے پر مجبور کردیا ہے۔