نئی دہلی: وزارت خارجہ (MEA) نے ہندوستان میں غیر ملکی فنڈنگ سے متعلق ضوابط پر ہونے والی تنقید کو مسترد کرتے ہوئے کہا ہے کہ قانون سازی سے متعلق معاملات پارلیمنٹ کے دائرۂ اختیار میں آتے ہیں اور یہ ہندوستان کا داخلی معاملہ ہے۔
وزارت خارجہ کے ترجمان رندھیر جیسوال نے جمعہ کو دو ہفتہ وار میڈیا بریفنگ کے دوران کہا کہ دنیا کے کئی ممالک، جن میں امریکہ بھی شامل ہے، بیرون ملک سے آنے والی مالی رقوم اور غیر ملکی فنڈنگ کو منظم کرنے کے لیے قوانین نافذ کرتے ہیں۔ جیسوال نے کہا، ’’جس معاملے کا آپ حوالہ دے رہے ہیں، ہم نے اسے دیکھا ہے اور اس پر کئی تبصرے بھی کیے گئے ہیں۔ جہاں تک قانون سازی کے معاملات کا تعلق ہے، خاص طور پر ہندوستان کی اپنی قانون سازی سے متعلق معاملات، یہ ہمارے لیے ایک داخلی معاملہ ہے، جس پر ہماری پارلیمنٹ فیصلہ کرتی ہے۔‘
‘ انہوں نے مزید کہا، ’’میں یہ بھی کہنا چاہوں گا کہ دنیا میں کئی ممالک ایسے ہیں، جن میں امریکہ بھی شامل ہے، جو غیر ملکی فنڈز اور غیر ملکی مالی معاونت کو منظم کرتے ہیں۔‘‘ وزارت خارجہ کا یہ بیان امریکی قانون ساز رائلی مور کے ان اعتراضات کے بعد سامنے آیا ہے، جن میں انہوں نے ہندوستان کے غیر ملکی عطیات (ضابطہ) قانون (FCRA) میں مجوزہ ترامیم پر تشویش ظاہر کی تھی۔ مور نے دعویٰ کیا تھا کہ مجوزہ دفعات حکومت کو گرجا گھروں اور فلاحی اداروں پر کنٹرول حاصل کرنے کا اختیار دے سکتی ہیں اور اس سے ہندوستان اور امریکہ کے دو طرفہ تعلقات متاثر ہو سکتے ہیں۔
مغربی ورجینیا سے تعلق رکھنے والے ریپبلکن کانگریس مین نے سوشل میڈیا پلیٹ فارم ’ایکس‘ پر اپنے خدشات کا اظہار کرتے ہوئے کہا کہ ہندوستان میں عیسائیت کی ایک طویل تاریخی موجودگی ہے، جس کی جڑیں سینٹ تھامس رسول کی مالابار ساحل پر آمد تک جاتی ہیں۔ مور نے لکھا، ’’لیکن اس طویل عیسائی تاریخ کے باوجود ہندوستان کی پارلیمنٹ فارن کنٹری بیوشن (ریگولیشن) ایکٹ میں ترمیم پر غور کر رہی ہے، جس کے تحت حکومت کو گرجا گھروں اور مذہبی فلاحی اداروں کا انتظام سنبھالنے کی اجازت دی جا سکتی ہے۔‘‘ انہوں نے مزید کہا، ’’یہ عیسائیوں کے خلاف ایک واضح حملہ ہے۔ اگر یہ بل اسی شکل میں آگے بڑھتا ہے تو یہ ہندوستان کے ساتھ ہمارے دو طرفہ تعلقات کے لیے انتہائی تشویش کا باعث ہوگا۔‘‘
فارن کنٹری بیوشن (ریگولیشن) ترمیمی بل، 2026 میں ایک مقررہ اتھارٹی (Designated Authority) قائم کرنے کی تجویز ہے، جو ان اداروں کے غیر ملکی عطیات سے حاصل کردہ اثاثوں کی نگرانی کرے گی، اگر ان کا FCRA رجسٹریشن منسوخ، واپس لیا یا ختم ہو چکا ہو۔ مجوزہ قانون میں واضح کیا گیا ہے کہ اگر ایسے اثاثوں میں کوئی عبادت گاہ شامل ہو تو مقررہ اتھارٹی اس کے مذہبی کردار کو برقرار رکھنے کی پابند ہوگی۔
اس کے علاوہ قانونی خلاف ورزیوں پر زیادہ سے زیادہ سزا کو پانچ سال کی قید سے کم کرکے ایک سال کرنے کی بھی تجویز ہے۔ FCRA کے تحت غیر سرکاری تنظیموں، فلاحی اداروں، تعلیمی اداروں، مذہبی ٹرسٹوں اور ان سے وابستہ اداروں کو بیرون ملک سے ملنے والی مالی امداد اور اس کے استعمال کو منظم کیا جاتا ہے۔ وزارت داخلہ کے اعداد و شمار کے مطابق 2019 سے 2022 کے درمیان 13,520 اداروں کو مجموعی طور پر 55,741 کروڑ روپے کی غیر ملکی رقوم موصول ہوئیں۔ سرکاری ریکارڈ کے مطابق 15 جولائی 2026 تک ملک میں 14,449 فعال FCRA رجسٹریشن موجود تھے، جبکہ 22,498 رجسٹریشن منسوخ اور 15,212 کی مدت ختم ہو چکی تھی۔
