کیف

یوکرین کے صدر ولودیمیر زیلنسکی کی جانب سے ماسکو کے ممکنہ بڑے حملے کی وارننگ کے چند گھنٹوں بعد، جمعرات کی شب (مقامی وقت کے مطابق) روس نے یوکرین کے دارالحکومت کیف پر 11 گھنٹوں تک مسلسل میزائلوں اور ڈرونز سے حملے کیے، جن میں کم از کم 13 افراد ہلاک اور 85 سے زائد زخمی ہو گئے۔ سی این این کے مطابق، کیف کے میئر وٹالی کلیچکو نے ہلاکتوں کی بڑھتی ہوئی تعداد کی تصدیق کرتے ہوئے بتایا کہ حملوں میں 13 افراد جان سے ہاتھ دھو بیٹھے ہیں۔

شدید متاثرہ عمارتوں کے ملبے تلے دبے زندہ افراد کو نکالنے کے لیے امدادی ٹیمیں پوری رات مصروف رہیں۔ رات بھر جاری رہنے والی اس وسیع بمباری کے نتیجے میں دارالحکومت کے 30 مختلف مقامات پر بڑے پیمانے پر تباہی ہوئی۔ سی این این کی رپورٹ کے مطابق، ہلاک اور زخمی ہونے والوں میں کم از کم ایک بچہ اور متعدد امدادی کارکن شامل ہیں، جو ایمبولینس سب اسٹیشن پر حملے کے دوران زخمی ہوئے۔

سی این این کے مطابق، شہر کی فوجی انتظامیہ کے سربراہ تیمور تکاچینکو نے کہا، "رہائشی عمارتوں پر براہِ راست اور انتہائی شدید حملے کیے گئے، جہاں افسوسناک طور پر ملبے سے ہلاک شدگان کی لاشیں نکالی جا رہی ہیں۔

دوسری جانب، روسی وزارت دفاع نے اس بڑے فوجی آپریشن کی تصدیق کرتے ہوئے کہا کہ اس کی افواج نے کیف، نپروپیتروفسک، پولتاوا، چرکاسی اور چرنیہیف کے علاقوں میں فوجی اور توانائی کے بنیادی ڈھانچے کو نشانہ بنایا۔ وزارت کے مطابق، ان حملوں میں ڈرونز سمیت "اعلیٰ درستگی والے طویل فاصلے تک مار کرنے والے ہتھیار" استعمال کیے گئے۔

تاہم، سی این این کی رپورٹ کے مطابق، یوکرینی حکام نے کریملن کے اس دعوے کو سختی سے مسترد کرتے ہوئے شواہد پیش کیے کہ حملوں میں جان بوجھ کر شہری آبادیوں اور غیر فوجی تنصیبات کو نشانہ بنایا گیا۔

اس تباہ کن حملے کے بعد، یوکرین کے وزیر خارجہ آندری سیبیہا نے سوشل میڈیا کے ذریعے عالمی اتحادیوں سے فوری مدد کی اپیل کی۔ انہوں نے فضائی دفاعی نظام اور میزائلوں کی فوری فراہمی، روس پر پابندیوں میں مزید سختی اور توانائی کے شعبے میں ہنگامی امداد کا مطالبہ کیا۔

'ایکس' پر اپنی پوسٹ میں آندری سیبیہا نے ان حملوں کی شدید مذمت کرتے ہوئے انہیں سنگین جنگی جرائم قرار دیا اور خبردار کیا کہ امدادی کارروائیاں آگے بڑھنے کے ساتھ ہلاکتوں کی تعداد میں مزید اضافہ ہو سکتا ہے۔

انہوں نے کریملن کی جارحیت کو درست قرار دینے کی ہر کوشش کو مسترد کرتے ہوئے کہا کہ یوکرین کے طویل فاصلے کے حملوں کو روسی کارروائیوں کا جواز بنانا "غیر اخلاقی" ہے۔ ان کا کہنا تھا کہ اقوام متحدہ کے چارٹر کے آرٹیکل 51 کے تحت، ایک غیر قانونی حملہ آور اور اپنی خودمختاری کا دفاع کرنے والے ملک کے درمیان واضح فرق کیا جانا چاہیے۔

سیبیہا نے لکھا کہ یوکرین کے لیے فضائی دفاعی نظام کی فراہمی سے متعلق فیصلوں میں مزید تاخیر نہ کی جائے۔ کیف میں خوفناک رات گزرنے کے بعد ہمارے اتحادیوں سے یہی بنیادی اپیل ہے۔ روس نے اپنے وحشیانہ حملوں میں ہر قسم کے میزائل اور ڈرون استعمال کیے، جس کے نتیجے میں کم از کم 10 افراد ہلاک ہوئے ہیں، اور افسوس کہ یہ تعداد بڑھ بھی سکتی ہے۔

انہوں نے مزید کہا کہ روس نے رہائشی عمارتوں اور شہری بنیادی ڈھانچے کو نشانہ بنایا ہے۔ جنگی مجرم پوتن صرف عام شہریوں، خواتین اور بچوں کے خلاف دہشت گردانہ جنگ لڑ سکتے ہیں، کیونکہ انہیں یوکرین کی دفاعی افواج کے خلاف کوئی کامیابی حاصل نہیں ہو رہی۔ ایسے حملے سنگین جنگی جرائم ہیں اور ہم ان کے بارے میں تمام اتحادی ممالک اور بین الاقوامی اداروں کو آگاہ کر رہے ہیں، تاکہ ذمہ داروں کا احتساب اور سخت ردعمل یقینی بنایا جا سکے۔

انہوں نے مزید کہا کہ میں خاص طور پر اس بات پر زور دینا چاہتا ہوں کہ یوکرینی عوام کے خلاف روسی مظالم کو یہ کہہ کر جائز قرار دینا کہ یہ روس کے خلاف یوکرین کے طویل فاصلے کے حملوں کا جواب ہیں، غیر اخلاقی ہے۔ اس جنگ میں ایک فریق حملہ آور ہے اور دوسرا وہ ملک ہے جو اقوام متحدہ کے چارٹر کے آرٹیکل 51 کے تحت اپنا دفاع کر رہا ہے۔ روس کو یوکرین پر حملہ کرنے کا کوئی حق حاصل نہیں، جبکہ یوکرین کو حملہ آور کے خلاف دفاع اور روس کے اندر موجود جائز فوجی اہداف کو نشانہ بنانے کا مکمل حق حاصل ہے۔

یہ حملہ ایسے وقت میں ہوا ہے جب یوکرین نے ماسکو کے خلاف طویل فاصلے تک مار کرنے والے ڈرون حملوں میں اضافہ کر دیا ہے، جن میں روسی ایندھن کی تنصیبات اور کریمیا کو بھی نشانہ بنایا گیا ہے، جس پر روس نے 2014 میں قبضہ کر لیا تھا۔ ان اقدامات کا مقصد جنگ کے خاتمے کے لیے ماسکو پر دباؤ بڑھانا ہے۔

آئرلینڈ سے واپسی کے دوران صدر ولودیمیر زیلنسکی نے کہا کہ پوتن جنگ جاری رکھنا چاہتے ہیں، اس لیے انہیں ایسے حالات کا سامنا کرنا چاہیے جو ان کے لیے اس جنگ کو جاری رکھنا ناممکن بنا دیں۔

اس سے قبل 25 جون کو، روسی وزارت خارجہ نے یوکرین کو مسلسل فوجی امداد فراہم کرنے پر امریکہ کو خبردار کرتے ہوئے کہا تھا کہ واشنگٹن کے ایسے اقدامات کے علاقائی اور عالمی استحکام پر "غیر متوقع نتائج" مرتب ہو سکتے ہیں۔