کراچی :ایک مقامی عدالت نے بلوچ یکجہتی کمیٹی کی کارکن فوزیہ ششانی بلوچ اور ان کے اہل خانہ کے خلاف درج مقدمہ خارج کر دیا۔ یہ مقدمہ اس وقت درج کیا گیا تھا جب وہ اپنے بھائی داد ششانی کی مبینہ جبری گمشدگی کے خلاف احتجاج کر رہی تھیں۔

عدالتی حکم کے بعد زیر حراست تمام افراد کو رہا کر دیا گیا۔ پولیس نے ان پر تعزیرات پاکستان کی دفعہ 124 اے کے تحت بغاوت کا مقدمہ درج کیا تھا۔

فوزیہ بلوچ کو 25 اپریل کو اس وقت حراست میں لیا گیا جب وہ کراچی پریس کلب کے باہر صحافیوں سے ملاقات کے لیے جا رہی تھیں۔ ان کے ساتھ ان کی والدہ اور دیگر رشتہ دار بھی موجود تھے جنہیں بھی حراست میں لے کر نامعلوم مقام پر منتقل کر دیا گیا تھا۔

اہل خانہ کے مطابق داد ششانی کو 21 اپریل کو ان کے گھر سے پاکستانی سکیورٹی فورسز نے حراست میں لیا تھا اور اس کے بعد سے ان کا کوئی پتہ نہیں چل سکا۔ خاندان نے پولیس میں ایف آئی آر درج کرانے کی کوشش کی لیکن درخواست قبول نہیں کی گئی۔

بلوچ یکجہتی کمیٹی نے گرفتاریوں کی مذمت کرتے ہوئے مطالبہ کیا کہ تمام لاپتہ افراد کے بارے میں معلومات فراہم کی جائیں اور انسانی حقوق کی تنظیمیں اس معاملے کا نوٹس لیں۔

بلوچستان میں جبری گمشدگیوں اور ماورائے عدالت ہلاکتوں کے واقعات ایک سنگین مسئلہ بنے ہوئے ہیں جس کے باعث مقامی آبادی میں خوف اور بے اعتمادی پائی جاتی ہے۔