نئی دہلی: بھارت کے وزیرِ خارجہ ایس جے شنکر نے منگل کے روز نئی دہلی میں جنوبی افریقہ کے نائب صدر شیپوکوسا پالس ماشاتیلے سے ملاقات کی، جس میں دونوں رہنماؤں نے مختلف شعبوں میں دوطرفہ تعاون کو مزید مضبوط بنانے کے امکانات پر تبادلۂ خیال کیا اور بین الاقوامی فورمز پر قریبی اشتراکِ عمل پر اتفاق کیا۔
سوشل میڈیا پلیٹ فارم ایکس پر جاری اپنے بیان میں جئے شنکر نے کہا کہ انہیں ماشاتیلے سے ملاقات کرکے خوشی ہوئی اور انہوں نے بھارت اور جنوبی افریقہ کے درمیان دیرینہ شراکت داری کو مزید گہرا بنانے کے لیے ان کے مضبوط عزم کو سراہا۔ وزیر خارجہ کے مطابق ملاقات کے دوران تجارت، سرمایہ کاری، چھوٹی اور درمیانی صنعتوں (MSMEs)، ڈیجیٹل معیشت اور بنیادی ڈھانچے کے شعبوں میں تعاون کے مواقع پر تفصیلی گفتگو ہوئی۔
انہوں نے کہا کہ دونوں ممالک اس بات پر بھی متفق ہوئے کہ بھارت اور جنوبی افریقہ کو بین الاقوامی فورمز پر ایک دوسرے کے ساتھ قریبی تعاون جاری رکھنا چاہیے۔ اس سے قبل اتوار کے روز جنوبی افریقہ کے نائب صدر پال ماشاتیلے نے جنوبی افریقہ کی وزیر برائے چھوٹے کاروبار اسٹیلا تیمبیسا ندابینی ابراہمز کے ہمراہ نئی دہلی کے مشہور ثقافتی و تجارتی مرکز دلی ہاٹ کا دورہ کیا۔ 29 مئی سے 3 جون تک جاری اپنے دورۂ بھارت کے دوران ان کا یہ دورہ بھارت کی ثقافتی روایات، کاروباری ماحول اور چھوٹے کاروباروں کے فروغ کے طریقۂ کار کا جائزہ لینے کے مقصد سے کیا گیا۔
ایکس پر جاری اپنے پیغام میں ماشاتیلے نے کہا کہ انہوں نے دلی ہاٹ کا دورہ بھارت کے بھرپور ثقافتی ورثے کو قریب سے دیکھنے کے لیے کیا۔ انہوں نے کہا: "دلی ہاٹ بھارت کا ایک مقبول سیاحتی مقام بن چکا ہے جہاں زائرین ملک کی مختلف ریاستوں کی نمائندگی کرنے والی موسیقی، رقص اور فنونِ لطیفہ کی نمائشوں سے لطف اندوز ہوتے ہیں۔
" دورے کی ایک ویڈیو میں انہوں نے مزید کہا کہ ان کا مقصد یہ جاننا تھا کہ بھارت چھوٹی اور درمیانی صنعتوں کی کس طرح معاونت کرتا ہے، ڈیجیٹل معیشت میں جدت طرازی کو کیسے فروغ دیتا ہے اور بنیادی ڈھانچے کے شعبے کو کس انداز میں منظم کرتا ہے۔
انہوں نے کہا: "ہم یہاں یہ دیکھنے آئے ہیں کہ بھارت نے اپنی معاشی اور سماجی ترقی کس طرح حاصل کی، چھوٹے اور درمیانے درجے کے کاروباروں کی کیسے مدد کی جاتی ہے، ڈیجیٹل معیشت میں کس طرح نئی اختراعات سامنے لائی جاتی ہیں اور بنیادی ڈھانچے کو کس طرح ترقی دی جاتی ہے۔ اسی مقصد کے تحت ہم مختلف شعبوں میں کام کرنے والی کمپنیوں سے ملاقاتیں کر رہے ہیں۔" جنوبی افریقہ کے نائب صدر جمعہ کے روز چھ روزہ سرکاری دورے پر بھارت پہنچے تھے۔ اس دورے کا مقصد دونوں ممالک کے درمیان دوطرفہ تعاون کو مزید مضبوط بنانا اور بھارت-جنوبی افریقہ تعلقات کو نئی جہت دینا ہے۔
