نیویارک/ آواز دی وایس

جمعرات کو ہندوستان کے وزیر خارجہ ایس۔ جے شنکر نے جاپان، جرمنی اور برازیل کے اپنے ہم منصبوں کے ساتھ اقوام متحدہ کی 80ویں جنرل اسمبلی کے موقع پر منعقدہ جی4 وزرائے خارجہ اجلاس میں شرکت کی، جہاں گروپ نے اقوام متحدہ میں اصلاحات کے لیے اپنی پختہ وابستگی کو ایک بار پھر دہرایا۔

سوشل میڈیا پلیٹ فارم ایکس پر جے شنکر نے بتایا کہ اجلاس میں سلامتی کونسل کے توسیع کے مسئلے پر بات ہوئی اور جاری بین الحکومتی مذاکراتی عمل کا بھی جائزہ لیا گیا۔

انہوں نے اپنے پیغام میں کہا کہ آج نیویارک میں جی4 وزرائے خارجہ اجلاس میں اپنے ساتھیوں تاکیشی ایوایا، جوہان ویڈیفُل اور ماؤرو ویئیرا کے ساتھ شامل ہو کر خوشی ہوئی۔ جی4 نے اقوام متحدہ خصوصاً سلامتی کونسل میں اصلاحات کے عزم کو دہرایا۔ اجلاس میں بین الحکومتی مذاکراتی عمل کی موجودہ صورتحال کا بھی جائزہ لیا گیا۔

اس سے قبل دن میں جے شنکر نے اقوام متحدہ کی جنرل اسمبلی  اور جی20 وزرائے خارجہ اجلاس  کے موقع پر کئی دو طرفہ ملاقاتیں کیں، جو جنوبی افریقہ کی میزبانی میں ہوا تھا۔ انہوں نے ملائشیا کے وزیر خارجہ محمد حاجی حسن سے خیرسگالی ملاقات کی اور برطانیہ کی وزیر خارجہ یویٹ کوپر سے بھی ملاقات کی۔

جے شنکر نے لکھا کہ انگا80 میں ملائشیا کے وزیر خارجہ محمد حاجی حسن سے خیرسگالی ملاقات کی۔

ایک اور پیغام میں انہوں نے کہا کہ برطانیہ کی نئی وزیر خارجہ یویٹ کوپر سے ملاقات خوشگوار رہی۔ اس موقع پر وزیر اعظم نریندر مودی کے حالیہ کامیاب دورے کے بعد 'ویژن 2035' پر ہونے والے اعلانات پر بھی بات چیت ہوئی۔

جے شنکر نے مصر کے وزیر خارجہ بدر عبدالعاطی کے ساتھ "گرم جوشانہ گفتگو" کی اور آسٹریلیا کی وزیر خارجہ سینیٹر وونگ کے ساتھ بھی ملاقات کی۔

اس سے قبل، جے شنکر نے جنوبی افریقہ کی میزبانی میں منعقدہ جی20 وزرائے خارجہ اجلاس سے خطاب کیا، جہاں انہوں نے موجودہ جیو پولیٹیکل اور اقتصادی غیر یقینی حالات کے درمیان عالمی استحکام کو یقینی بنانے میں جی20 کے اہم کردار کو اجاگر کیا۔

انہوں نے اپنے پیغام میں کہا کہ انگا 80 کے موقع پر جنوبی افریقہ کی میزبانی میں منعقدہ جی20 وزرائے خارجہ اجلاس میں خطاب کیا۔ اس بات کو نمایاں کیا کہ سیاسی و اقتصادی طور پر غیر مستحکم عالمی حالات میں جی20 ارکان پر خاص ذمہ داری عائد ہوتی ہے کہ وہ استحکام کو مضبوط کریں اور اسے زیادہ مثبت سمت دیں۔ یہ بہترین طریقے سے حاصل کیا جا سکتا ہے: مکالمے اور سفارت کاری کو فروغ دے کر، دہشت گردی کے خلاف سخت اقدام اٹھا کر اور توانائی و اقتصادی سلامتی کی ضرورت کو بہتر طور پر سمجھ کر۔