تہران:

لبنان کے مسلح تنظیم حزب اللہ نے دعویٰ کیا ہے کہ اس کے جنگجوؤں نے جنوبی لبنان کے تاریخی بیوفورٹ قلعے کے قریب ایک اسرائیلی مرکاوا ٹینک کو میزائل حملے میں تباہ کر دیا ہے۔ تنظیم کے مطابق یہ حملہ اس علاقے میں جاری جھڑپوں کے دوران کیا گیا، جہاں حالیہ دنوں میں اسرائیلی فوج اور حزب اللہ کے درمیان تصادم میں شدت آ گئی ہے۔

حزب اللہ نے کہا ہے کہ اسرائیلی فوج نے 31 مئی کو جنوبی لبنان کے نبطیہ علاقے کے قریب واقع بیوفورٹ قلعے پر کنٹرول حاصل کر لیا تھا۔ اسرائیل اس کارروائی کو اپنی اسٹریٹجک اور علامتی کامیابی کے طور پر پیش کر رہا تھا۔ تاہم تنظیم کا دعویٰ ہے کہ قلعے پر قبضے کے بعد بھی اس کے جنگجو مسلسل اسرائیلی فوجیوں کو نشانہ بنا رہے ہیں۔

حزب اللہ کے مطابق بیوفورٹ قلعے اور اس کے آس پاس کے علاقوں میں ہونے والے حملوں میں کئی اسرائیلی فوجی ہلاک اور متعدد زخمی ہوئے ہیں۔ تنظیم نے دعویٰ کیا ہے کہ ان کارروائیوں میں اس نے جدید فائبر آپٹک ڈرونز استعمال کیے ہیں، جنہیں الیکٹرانک طور پر جام کرنا یا ان کا سراغ لگانا انتہائی مشکل ہوتا ہے۔

تنظیم کا کہنا ہے کہ ان ڈرونز کی مدد سے اسرائیلی فوجی ٹھکانوں اور گاڑیوں کو نشانہ بنایا گیا۔ تاہم ان دعوؤں کی آزادانہ طور پر تصدیق نہیں ہو سکی ہے اور اسرائیلی فوج کی جانب سے اس حوالے سے کوئی سرکاری بیان سامنے نہیں آیا۔

حزب اللہ نے یہ بھی دعویٰ کیا کہ بیوفورٹ قلعے کے علاوہ قلعت الشریف علاقے میں واقع ایک اسرائیلی لاجسٹک سپورٹ مرکز کو بھی نشانہ بنایا گیا۔ تنظیم کے مطابق یہ مرکز علاقے میں فوجی سرگرمیوں کے لیے انتہائی اہم سمجھا جاتا ہے۔

اس دوران ایران کی طاقتور فوجی تنظیم اسلامی انقلابی گارڈز کور (آئی آر جی سی) نے لبنان کی صورتحال پر ردعمل دیتے ہوئے کہا ہے کہ جب تک اسرائیلی فوج لبنانی سرزمین سے مکمل طور پر واپس نہیں ہٹتی، اس وقت تک خطے میں پائیدار امن ممکن نہیں ہے۔

نیم سرکاری خبر رساں ایجنسی تسنیم کے مطابق آئی آر جی سی نے ایک بیان میں کہا کہ کسی بھی جنگ بندی کی بنیادی شرط یہ ہے کہ لبنان سمیت تمام محاذوں پر مکمل طور پر لڑائی بند کی جائے۔ تنظیم نے مطالبہ کیا کہ اسرائیل لبنان پر حملے روکنے کے ساتھ ساتھ مقبوضہ علاقوں سے نکلے اور بین الاقوامی سرحد کے پیچھے واپس جائے۔

دوسری جانب حزب اللہ کے سیکرٹری جنرل نعیم قاسم نے لبنانی حکومت اور اسرائیل کے درمیان مبینہ تعاون اور براہ راست رابطوں پر تنقید کی ہے۔ انہوں نے کہا کہ تنازع کے حل کے لیے سب سے پہلے لبنانی سرزمین سے اسرائیلی فوج کی مکمل واپسی ضروری ہے۔

نعیم قاسم نے ان تجاویز کو بھی مسترد کر دیا جن میں جنگ بندی کے بدلے حزب اللہ سے ہتھیار ڈالنے کا مطالبہ کیا جا رہا تھا۔ انہوں نے کہا کہ تنظیم اپنے مؤقف پر قائم ہے اور لبنان کی خودمختاری اور علاقائی سالمیت کو اولین ترجیح دیتی ہے۔

تجزیہ کاروں کا کہنا ہے کہ جنوبی لبنان میں بڑھتی ہوئی فوجی سرگرمیاں اور حزب اللہ و اسرائیل کے درمیان جاری کشیدگی پورے مغربی ایشیا میں تناؤ کو مزید بڑھا سکتی ہیں۔ ایسے وقت میں بین الاقوامی برادری دونوں فریقوں سے تحمل اختیار کرنے اور سفارتی حل کی طرف بڑھنے کی اپیل کر رہی ہے