بیروت: جنوبی لبنان میں اسرائیلی فضائی حملوں کے نتیجے میں ہفتے کے روز کم از کم سات افراد ہلاک اور متعدد زخمی ہو گئے، جبکہ جنگ بندی کے باوجود اسرائیل اور حزب اللہ کے درمیان کشیدگی جاری رہی۔ جنوبی لبنان پر اسرائیلی فضائی حملے اس وقت کیے گئے جب اسرائیلی فوج نے جنوبی علاقے کے نو دیہات کے رہائشیوں کو فوری طور پر انخلا کی نئی وارننگ جاری کی۔

اسرائیلی فوج اور لبنان کی حزب اللہ کے درمیان جنگ بندی 17 اپریل سے نافذ ہے، تاہم اس کے باوجود دونوں جانب سے حملے جاری ہیں۔ لبنان کی سرکاری خبر رساں ایجنسی (NNA) کے مطابق قصبے کفر دجل میں ایک گاڑی پر اسرائیلی فضائی حملے میں دو افراد ہلاک ہوئے، جبکہ لوايزے نامی گاؤں میں ایک گھر پر حملے میں تین افراد جان کی بازی ہار گئے۔

اسی ایجنسی نے بتایا کہ شوقین نامی گاؤں پر ایک اور حملے میں دو افراد ہلاک ہوئے۔ اسرائیلی فوج کی عربی زبان کی ترجمان لیفٹیننٹ کرنل ایلا واویہ نے سوشل میڈیا پلیٹ فارم ایکس پر بتایا کہ اسرائیلی فضائیہ نے گزشتہ 24 گھنٹوں کے دوران تقریباً 50 فضائی حملے کیے ہیں، جن کا ہدف حزب اللہ کے ٹھکانے اور اس کے ارکان تھے۔ دوسری جانب حزب اللہ نے دعویٰ کیا ہے کہ اس نے ہفتے کے روز بیاد نامی ساحلی گاؤں میں ایک گھر کے اندر جمع اسرائیلی فوجیوں پر ڈرون حملہ کیا۔

اسرائیل اور حزب اللہ کے درمیان حالیہ جنگ 2 مارچ کو شروع ہوئی، جب حزب اللہ نے شمالی اسرائیل پر راکٹ فائر کیے، اس سے دو روز قبل امریکہ اور اسرائیل نے اس کے اہم حامی ایران کے خلاف جنگ شروع کی تھی۔ اس کے بعد سے اسرائیل نے جنوبی لبنان میں سینکڑوں فضائی حملے کیے اور زمینی کارروائی کرتے ہوئے سرحدی علاقوں کے کئی قصبے اور دیہات پر قبضہ بھی کیا ہے۔

لبنان اور اسرائیل نے اس دوران تین دہائیوں بعد پہلی بار براہ راست مذاکرات بھی کیے ہیں۔ دونوں ممالک 1948 میں اسرائیل کے قیام کے بعد سے باضابطہ طور پر حالتِ جنگ میں ہیں۔ واشنگٹن میں اعلان کردہ 10 روزہ جنگ بندی 17 اپریل سے نافذ ہوئی تھی، جسے بعد میں مزید تین ہفتوں کے لیے بڑھا دیا گیا۔