تل ابیب:اسرائیل نے ایران کے ساتھ بڑھتی ہوئی کشیدگی کے پیش نظر اتوار کی شب غزہ جانے والی سرحدی گزرگاہوں کو بند کرنے کا اعلان کر دیا۔ امریکی نشریاتی ادارے سی این این کے مطابق یہ فیصلہ سکیورٹی صورتحال میں اچانک پیدا ہونے والی کشیدگی کے بعد کیا گیا ہے۔

اسرائیلی ادارے "کوآرڈینیٹر آف گورنمنٹ ایکٹیویٹیز اِن دی ٹیریٹریز" (کوگاٹ) نے ایک بیان میں کہا کہ یہ اقدام "ضروری سکیورٹی اقدامات" کے تحت اٹھایا گیا ہے۔گزرگاہوں کی بندش سے خاص طور پر کرم شالوم کراسنگ متاثر ہوئی ہے جو غزہ میں انسانی امداد پہنچانے کا سب سے بڑا اور اہم راستہ سمجھی جاتی ہے۔

کوگاٹ کا کہنا ہے کہ جنگ بندی کے آغاز کے بعد سے غزہ میں کافی مقدار میں امدادی سامان پہنچایا جا چکا ہے اور موجودہ بندش سے انسانی صورتحال پر کوئی منفی اثر نہیں پڑے گا۔اس سے قبل فروری میں بھی ایران کے ساتھ کشیدگی کے آغاز پر اسرائیل نے غزہ کی سرحدی گزرگاہیں بند کر دی تھیں تاہم چند روز بعد انہیں دوبارہ کھول دیا گیا تھا۔

دریں اثنا ایران نے پیر کے روز اسرائیل پر میزائل حملے کیے جو 8 اپریل کی جنگ بندی کے بعد ایران کی جانب سے پہلا میزائل حملہ قرار دیا جا رہا ہے۔

اسرائیلی دفاعی افواج نے اپنے بیان میں کہا کہ ایران سے اسرائیل کی جانب داغے گئے میزائلوں کی نشاندہی کے بعد ملک کے مختلف علاقوں میں خطرے کے سائرن بجائے گئے۔ دفاعی نظام فوری طور پر متحرک ہو گئے اور خطرے کو ناکام بنانے کے لیے کارروائی کی گئی۔

اسرائیلی فضائیہ نے بھی تصدیق کی کہ ایران سے اسرائیلی حدود کی جانب میزائل داغے گئے۔ بیان میں کہا گیا کہ دفاعی نظام حملے کو روکنے کے لیے سرگرم ہیں جبکہ ہوم فرنٹ کمانڈ نے متعلقہ علاقوں کے شہریوں کو موبائل فون کے ذریعے حفاظتی ہدایات جاری کی ہیں۔

عوام کو ہدایت دی گئی کہ الرٹ ملتے ہی فوری طور پر محفوظ مقامات پر منتقل ہوں اور نئی ہدایات جاری ہونے تک وہیں رہیں کیونکہ احتیاطی تدابیر انسانی جانوں کے تحفظ کے لیے ضروری ہیں۔

یورپی ذرائع ابلاغ کے مطابق اب تک اس حملے کے نتیجے میں کسی جانی نقصان یا مالی نقصان کی اطلاع موصول نہیں ہوئی ہے۔

ادھر اتوار کے روز اسرائیل نے لبنان کے دارالحکومت بیروت کے الضاحیہ علاقے میں مبینہ طور پر حزب اللہ کے ایک مرکز کو نشانہ بنایا۔ اسرائیلی حکام کے مطابق یہ کارروائی حزب اللہ کی جانب سے اسرائیلی علاقوں پر فائرنگ کے جواب میں کی گئی۔

خطے میں حالیہ پیش رفت نے مشرق وسطیٰ میں ایک بار پھر کشیدگی میں اضافہ کر دیا ہے جبکہ عالمی برادری صورتحال پر گہری نظر رکھے ہوئے ہے۔