بغداد: ایران کی حمایت یافتہ عراقی تنظیم Kataib Hezbollah نے خبردار کیا ہے کہ اگر آبنائے ہرمز کو زبردستی کھولنے کی کوشش کی گئی تو خطے میں موجود تیل اور گیس کی تمام تنصیبات کو نشانہ بنایا جائے گا۔

ایرانی سرکاری نشریاتی ادارے پریس ٹی وی کے مطابق تنظیم کے سیکریٹری جنرل ابو حسین الحمیداوی نے کہا کہ دشمن یہ بات ذہن میں رکھیں کہ آبنائے ہرمز کو طاقت کے ذریعے کھولنے کی کسی بھی کوشش کا نتیجہ ہر آئل اور گیس پلیٹ فارم یا تنصیب کی مکمل تباہی کی صورت میں نکلے گا۔

انہوں نے اتوار کے روز جاری اپنے بیان میں واضح کیا کہ آبنائے ہرمز دشمنوں کے لیے نہیں کھولی جائے گی اور انہیں طاقت کے استعمال سے باز رہنے کی تنبیہ کی۔ ان کا کہنا تھا کہ آج کا اصول یہ ہے کہ یا تو سب کے لیے سلامتی ہوگی یا کسی کے لیے نہیں اور یا سب خوشحال ہوں گے یا سب محرومی کا شکار ہوں گے۔

الحمیداوی نے جاری تنازع کے پانچویں ہفتے میں داخل ہونے کے دوران شہری تنصیبات پر حملوں کی مذمت کی اور لبنان کے لیے مالی امداد کی فراہمی پر بھی زور دیا۔

دوسری جانب ایرانی بحریہ نے بھی کہا ہے کہ آبنائے ہرمز کی صورتحال میں ایسی تبدیلیاں آ چکی ہیں جو اب واپس پرانی حالت میں نہیں آئیں گی خصوصاً امریکا اور اسرائیل جیسے حریف ممالک کے لیے۔ بحری قیادت کے مطابق خطے میں حالیہ پیش رفت نے ایک نئی حقیقت کو جنم دیا ہے جس میں بیرونی طاقتیں، خصوصاً واشنگٹن، اب ایران کے سمندری حدود میں اپنی مرضی مسلط نہیں کر سکتیں۔

ایرانی حکام کے مطابق خلیج فارس میں سیکیورٹی کا نیا نظام تشکیل دیا جا رہا ہے جس کے تحت خطے کے ممالک خود اپنی سلامتی کے ذمہ دار ہوں گے اور بیرونی افواج کی موجودگی کو اشتعال انگیز اور غیر قانونی قرار دیا جا رہا ہے۔ اس مقصد کے لیے بحری تعیناتی میں اضافہ، جدید نگرانی کے نظام اور فوری ردعمل کی صلاحیتوں کو بہتر بنایا جا رہا ہے تاکہ توانائی کی ترسیل بلا تعطل جاری رہے۔

یہ بیانات ایسے وقت میں سامنے آئے ہیں جب Donald Trump نے ایران کو خبردار کیا تھا کہ اگر آبنائے ہرمز بند رکھی گئی تو اس کے سنگین نتائج ہوں گے۔

رپورٹس کے مطابق ایران نے واضح کیا ہے کہ آبنائے ہرمز تمام ممالک کے لیے کھلی ہے تاہم امریکا، اسرائیل اور ان کے اتحادیوں سے منسلک جہازوں پر پابندی برقرار رہے گی۔

ادھر اطلاعات یہ بھی ہیں کہ امریکا، ایران اور خطے کے چند ثالث ممالک کے درمیان ممکنہ 45 روزہ جنگ بندی کے لیے بات چیت جاری ہے، جو اگر کامیاب ہوئی تو مستقل امن کی راہ ہموار ہو سکتی ہے۔