نئی دہلی
اسرائیل میں امریکہ اور ایران کے درمیان مجوزہ معاہدے پر بڑھتی ہوئی ناراضی کے درمیان وزیرِ اعظم بنیامین نیتن یاہو نے اپنے موقف کا دفاع کرتے ہوئے کہا ہے کہ "ایران کو معاہدے کے ساتھ یا اس کے بغیر بھی جوہری ہتھیار حاصل نہیں ہوں گے۔
نیتن یاہو نے پیر کی شام ایک مختصر پریس کانفرنس میں عبرانی زبان میں کہا کہ ایران کے پاس کبھی بھی جوہری ہتھیار نہیں ہوں گے، نہ آج اور نہ ہی مستقبل میں۔
انہوں نے کہا کہ لوگ مجھ سے پوچھتے ہیں کہ ہم نے کیا حاصل کیا ہے؟ میرا جواب یہ ہے کہ ہم نے اپنے سروں پر منڈلانے والے فوری تباہی کے خطرے کو ٹال دیا ہے۔ سب سے اہم بات یہ ہے کہ ہم نے اسرائیل کو مکمل تباہی کے خطرے سے بچایا ہے۔وزیرِ اعظم کا یہ بیان ایسے وقت میں سامنے آیا ہے جب انہیں نہ صرف اپوزیشن بلکہ اپنی حکمران اتحادی جماعتوں کے بعض رہنماؤں کی تنقید کا بھی سامنا ہے۔
اسرائیل کے سابق وزیرِ اعظم اور وزارتِ عظمیٰ کے اہم امیدوار نفتالی بینیٹ نے اس سے قبل صحافیوں سے گفتگو کرتے ہوئے کہا تھا کہ نیتن یاہو حکومت کا دورِ اقتدار "خانہ جنگی جیسی صورتحال" سے شروع ہوا، سات اکتوبر کے المناک واقعات کے دوران آگے بڑھا اور اب ایران کے معاملے پر "تاریخی ناکامی" کے ساتھ اختتام پذیر ہو رہا ہے۔
بینیٹ نے اسرائیل کی سلامتی بحال کرنے کا وعدہ کرتے ہوئے کہا کہ اگر وہ اقتدار میں ہوتے تو سفارتی سطح سمیت ہر معاملے میں مختلف حکمتِ عملی اختیار کرتے۔ انہوں نے کہا کہ وہ امریکی صدر ڈونلڈ ٹرمپ کے ساتھ اپنے تعلقات کو صرف اسرائیل کے قومی مفادات کے لیے استعمال کرتے۔
دوسری جانب اسرائیل کے قومی سلامتی کے وزیر ایتامار بن گویر نے بھی کہا کہ مجوزہ معاہدہ اسرائیل کے لیے "لازمی اور پابند" نہیں ہوگا۔امریکی صدر کے ساتھ اختلافات کی خبروں پر نیتن یاہو نے کہا کہ کبھی کبھی ایسے مواقع آتے ہیں جب صدر ٹرمپ اور میرے خیالات مکمل طور پر ایک جیسے نہیں ہوتے۔ اسرائیل کے سلامتی مفادات کا دانشمندانہ انداز میں تحفظ کیا جانا چاہیے۔
انہوں نے جنوبی لبنان سے اسرائیلی فوج کے انخلا کے امکان کو بھی مسترد کر دیا۔متعدد تجزیہ کاروں کا خیال ہے کہ یہ معاملہ مجوزہ معاہدے میں رکاوٹ بن سکتا ہے، کیونکہ اس معاہدے میں ہر قسم کی دشمنانہ سرگرمیوں کے خاتمے کی شق شامل ہے۔
