تہران (ایران): ایران کے سپریم لیڈر آیت اللہ سید علی خامنہ ای کے سینئر مشیر محسن رضائی نے امریکی صدر ڈونلڈ ٹرمپ کو سخت الفاظ میں انتباہ دیتے ہوئے کہا ہے کہ ایران کی مسلح افواج کی “آہنی مٹھی امریکہ کو پیچھے ہٹنے اور جھکنے پر مجبور کر دے گی۔

سوشل میڈیا پلیٹ فارم “ایکس” پر اپنے بیان میں محسن رضائی نے ٹرمپ کی ایران پر ممکنہ حملے کی دھمکیوں پر ردعمل دیتے ہوئے ان پر غیر فیصلہ کن رویے کا الزام لگایا۔ انہوں نے کہا: وہ (ٹرمپ) فوجی حملے کی ڈیڈ لائن دیتا ہے اور پھر خود ہی اسے منسوخ کر دیتا ہے، یہ اس خام خیالی کے ساتھ کہ ایرانی قوم اور حکام ہتھیار ڈال دیں گے۔ لیکن طاقتور مسلح افواج اور عظیم ایرانی قوم انہیں پیچھے ہٹنے اور جھکنے پر مجبور کرے گی۔”

یہ بیان ایسے وقت سامنے آیا ہے جب امریکی صدر ڈونلڈ ٹرمپ نے کہا ہے کہ ایران کے ساتھ جاری کشیدگی کے تناظر میں ممکنہ فوجی کارروائی کو عارضی طور پر مؤخر کیا گیا ہے تاکہ سفارتی کوششوں کو موقع دیا جا سکے۔ ٹرمپ نے صحافیوں سے گفتگو میں کہا کہ سعودی عرب، قطر، متحدہ عرب امارات اور دیگر ممالک نے امریکہ سے درخواست کی ہے کہ کارروائی کو کچھ دن کے لیے مؤخر کیا جائے کیونکہ مذاکرات میں پیش رفت ہو رہی ہے۔

انہوں نے کہا: “میں نے حملے کو کچھ وقت کے لیے مؤخر کیا ہے، امید ہے شاید ہمیشہ کے لیے، لیکن فی الحال ہم دیکھ رہے ہیں کہ مذاکرات کیا نتیجہ دیتے ہیں۔ اگر ہم بغیر بمباری کے معاملہ حل کر سکیں تو میں بہت خوش ہوں گا۔” ٹرمپ نے یہ بھی کہا کہ مختلف ممالک امریکی اور ایرانی حکام کے درمیان براہ راست رابطے کروا رہے ہیں تاکہ سفارتی حل نکالا جا سکے۔

اس سے قبل امریکی میڈیا رپورٹس کے مطابق ٹرمپ نے ایران کی جانب سے پیش کی گئی امن تجویز کو مسترد کر دیا تھا، یہ کہتے ہوئے کہ اس میں کوئی قابلِ ذکر پیش رفت نہیں ہے۔ تجزیہ کاروں کے مطابق یہ صورتحال نہایت حساس ہے کیونکہ ایک طرف سفارتی کوششیں جاری ہیں جبکہ دوسری طرف خطے میں فوجی کشیدگی اور خطرات بھی بڑھ رہے ہیں، خاص طور پر ایران کے جوہری پروگرام کے حوالے سے اختلافات کے باعث۔