تہران :     Islamic Revolutionary Guard Corps نے اعلان کیا ہے کہ ایران پر امریکی اور اسرائیلی حملوں کے بعد آپریشن وعدہ صادق 4 کی 16 ویں لہر کا آغاز کر دیا گیا ہے۔ بیان میں کہا گیا کہ یہ کارروائیاں خطے میں موجود امریکی اور اسرائیلی افواج کے خلاف کی جا رہی ہیں۔

سپاہ پاسداران نے دعویٰ کیا کہ اس کی ایرو اسپیس فورس نے میزائلوں اور ڈرونز کے ذریعے مقبوضہ علاقوں کے قلب اور شمالی حصوں کو مؤثر طور پر نشانہ بنایا۔ بیان کے مطابق جن اہداف کو نشانہ بنایا گیا ان میں اسرائیلی فوج کا جنرل اسٹاف ہیڈکوارٹر اور وزارت جنگ کی عمارت حکریا میں واقع تنصیبات بنی براک کی اسٹریٹجک انفراسٹرکچر تل ابیب کے شمال مشرق میں بیت حکفا کے فوجی مراکز اور مغربی جلیل کا عسکری مرکز شامل ہیں۔

آئی آر جی سی نے اپنے انٹیلی جنس ذرائع کے حوالے سے دعویٰ کیا کہ ایرانی جوابی کارروائی کے چوتھے روز تک دشمن کے 680 سے زائد اہلکار ہلاک یا زخمی ہو چکے ہیں۔ بیان میں کہا گیا کہ مقبوضہ علاقوں کے کثیر سطحی دفاعی نظام میں عملی کمزوری تکنیکی خلا اور کمپیوٹیشنل صلاحیت میں کمی کے باعث ایرانی میزائلوں کو فضائی راہداریوں کے ذریعے ہدف تک پہنچنے میں کامیابی ملی۔

بیان میں مزید کہا گیا کہ اسلامی جمہوریہ کی مسلح افواج منظم انداز میں اپنی کارروائیاں جاری رکھنے اور صہیونی ریاست کے فوجی ڈھانچے کو تباہ کرنے کے عزم پر قائم ہیں اور خطے میں موجود غاصب وجود کی مکمل تباہی تک اپنی وفاداری پر آخری لمحے تک قائم رہیں گی۔

آئی آر جی سی نے یہ بھی اعلان کیا کہ اس کی زمینی افواج نے بیک وقت تین آپریشنز کے ساتھ میدان میں باقاعدہ داخلہ لے لیا ہے اور 230 حملہ آور ڈرون داغے گئے ہیں۔ اس سے قبل خاتم الانبیا سینٹرل ہیڈکوارٹر کے ترجمان لیفٹیننٹ کرنل ابراہیم ذوالفقاری نے کہا تھا کہ ایرانی افواج نے دشمن کے حساس اور اسٹریٹجک اڈوں کو بھاری اور فیصلہ کن نقصان پہنچایا ہے۔

دوسری جانب امریکی سینٹرل کمانڈ کے سربراہ ایڈمرل براڈ کوپر نے کہا کہ امریکا اور اسرائیل کی مشترکہ افواج ایران کے اندر بلا روک ٹوک حملے کر رہی ہیں اور یہ سلسلہ نہیں رکے گا۔ ان کے مطابق بی 2 اور بی 1 بمبار طیاروں نے ایران کے اندر گہرائی تک میزائل تنصیبات کو نشانہ بنایا جبکہ بی 52 طیاروں نے بیلسٹک میزائل اور کمانڈ اینڈ کنٹرول مراکز پر حملے کیے۔ انہوں نے دعویٰ کیا کہ اب تک 17 ایرانی بحری جہاز تباہ کیے جا چکے ہیں اور ایران کی جوابی صلاحیت تیزی سے کمزور ہو رہی ہے۔

ایڈمرل کوپر کے مطابق ایران نے جوابی کارروائی میں 500 سے زائد بیلسٹک میزائل اور 2000 سے زیادہ ڈرون داغے تاہم ان کا کہنا تھا کہ ایران کی حملہ آور صلاحیت کم ہو رہی ہے جبکہ امریکی عسکری طاقت میں اضافہ ہو رہا ہے۔

مشرق وسطیٰ میں جاری یہ تنازع چوتھے روز میں داخل ہو چکا ہے۔ امریکا اور اسرائیل کے حملوں میں ایرانی سپریم لیڈر آیت اللہ خامنہ ای سمیت اہم شخصیات کی ہلاکت کے بعد خطے میں کشیدگی بڑھ گئی ہے جبکہ تہران نے امریکی فوجی اڈوں اور اسرائیلی مفادات کو نشانہ بنانے کی جوابی کارروائیاں جاری رکھنے کا اعلان کیا ہے۔