تہران: ایرانی فوج نے پیر کے روز دعویٰ کیا کہ اس نے متحدہ عرب امارات کے العین منہاد ایئر بیس پر ہیلی کاپٹروں اور فوجی اہلکاروں کے ٹھکانوں کو نشانہ بناتے ہوئے ڈرون حملے کیے۔ ایرانی فوج کی جانب سے جاری بیان کے مطابق یہ کارروائی پیر کی صبح سویرے شروع کی گئی۔ فوج نے کہا کہ یہ حملے حالیہ جارحیت کے جواب اور اسلامی انقلابی گارڈ کور (IRGC) کے اہلکاروں اور لارک جزیرے پر ہلاک ہونے والے ایرانی شہریوں کی ہلاکت کا بدلہ لینے کے لیے کیے گئے۔
بیان میں کہا گیا کہ ایرانی فوج نے درجنوں جنگی ڈرونز کے ذریعے متحدہ عرب امارات میں العین منہاد اڈے پر موجود امریکی فوج کے ہیلی کاپٹروں اور اہلکاروں کے ٹھکانوں کو نشانہ بنایا۔ ایرانی نیم سرکاری خبر رساں ایجنسی تسنیم کے مطابق العین منہاد اڈہ خطے میں غیر ملکی افواج کی مدد اور نقل و حمل کے لیے ایک اہم لاجسٹک مرکز کے طور پر کام کرتا ہے۔
ایرانی فوج نے کہا کہ علاقائی خطرات کے خاتمے تک قومی سلامتی یقینی بنانے کے لیے وہ تیار ہے۔ دوسری جانب متحدہ عرب امارات کی وزارت دفاع نے بتایا کہ ملکی فضائی دفاعی نظام نے ایران کی سمت سے آنے والے ایک بغیر پائلٹ فضائی طیارے کو علاقائی پانیوں کے اوپر روک لیا۔ وزارت دفاع نے کہا کہ مسلح افواج کسی بھی ممکنہ خطرے سے نمٹنے کے لیے مکمل طور پر تیار ہیں اور فضائی دفاعی نظام چوبیس گھنٹے ملک کی فضائی حدود کی نگرانی اور حفاظت کر رہے ہیں۔ اس سے قبل پیر کو ایران کے اسلامی انقلابی گارڈ کور نے اردن میں امریکی کنگ حسین اور الازرق ایئربیسز کو میزائل اور ڈرون حملوں سے نشانہ بنانے کا اعلان کیا تھا۔
ایران نے ان حملوں کو لارک جزیرے پر ہونے والی کارروائی کا جوابی اقدام قرار دیا۔ لارک جزیرہ بندر عباس کے ساحل کے قریب، ہرمزگان صوبے میں قشم اور ہرمز جزائر کے نزدیک واقع ہے۔ اتوار کو امریکی فورسز نے جزیرے پر موجود دو ایرانی میزائل لانچروں کو نشانہ بنایا تھا، جس کے بعد خطے میں فوجی کشیدگی میں اضافہ ہوا۔
امریکی سینٹرل کمانڈ کے ترجمان ٹم ہاکنز کے مطابق اسلامی انقلابی گارڈ کور کی فورسز آبنائے ہرمز میں بحری بارودی سرنگوں کے ساتھ راکٹ داغنے کی تیاری کرتی دیکھی گئی تھیں۔ ان کے مطابق امریکی کارروائیوں کا مقصد آبی گزرگاہ سے تجارتی آمدورفت کو محفوظ بنانا ہے۔ IRGC نے دعویٰ کیا ہے کہ لارک جزیرے پر اتوار کی رات ہونے والی کارروائی میں متعدد فوجی اہلکار اور شہری ہلاک ہوئے، جس کی ذمہ داری اس نے امریکہ اور اسرائیل پر عائد کی ہے۔
