واشنگٹن میں جاری اطلاعات کے مطابق اگرچہ امریکی صدر ڈونلڈ ٹرمپ نے یہ دعویٰ کیا ہے کہ ایران کا میزائل پروگرام امریکہ اور اسرائیل کی مشترکہ فوجی کارروائیوں کے بعد تباہ ہو چکا ہے تاہم خفیہ اداروں کی حالیہ رپورٹیں اس کے برعکس تصویر پیش کر رہی ہیں۔

رپورٹس کے مطابق مسلسل کئی ہفتوں تک جاری رہنے والے حملوں کے باوجود ایران اپنی میزائل لانچ کرنے کی صلاحیت کا ایک بڑا حصہ برقرار رکھنے میں کامیاب رہا ہے۔ اطلاعات کے مطابق تقریباً نصف میزائل لانچرز اب بھی محفوظ ہیں جبکہ ہزاروں یک طرفہ حملہ کرنے والے ڈرونز بھی اس کے عسکری ذخیرے میں شامل ہیں۔

ذرائع کے مطابق ایران اب بھی پورے خطے میں شدید تباہی پھیلانے کی صلاحیت رکھتا ہے۔ بعض لانچرز ایسے بھی ہیں جو زیر زمین ہونے کی وجہ سے مکمل طور پر تباہ نہیں کیے جا سکے اور ممکن ہے کہ فی الحال استعمال کے قابل نہ ہوں مگر محفوظ ہیں۔

مزید یہ کہ ایران کی ڈرون صلاحیت کا تقریباً پچاس فیصد حصہ بدستور فعال ہے اور اس کے پاس بڑی تعداد میں ڈرونز موجود ہیں۔ اس کے علاوہ ساحلی دفاعی کروز میزائلوں کا بھی ایک اہم حصہ محفوظ سمجھا جا رہا ہے جو آبنائے ہرمز میں بحری آمدورفت کے لیے خطرہ بن سکتے ہیں۔

رپورٹ میں کہا گیا ہے کہ امریکی فوجی کارروائیوں میں زیادہ تر توجہ ساحلی میزائل نظام پر نہیں دی گئی اگرچہ بحری جہازوں کو نشانہ بنایا گیا۔ اس طرح یہ خفیہ جائزہ امریکی صدر اور ان کی انتظامیہ کے دعوؤں کے مقابلے میں ایران کی عسکری حالت کی ایک مختلف تصویر پیش کرتا ہے۔

اس سے قبل صدر ٹرمپ نے قوم سے خطاب میں امریکی فوج کی کارروائی کو فیصلہ کن قرار دیتے ہوئے کہا تھا کہ ایران کی بحری اور فضائی طاقت کو شدید نقصان پہنچایا گیا ہے اور اس کا عسکری ڈھانچہ بری طرح کمزور ہو چکا ہے۔

انہوں نے دعویٰ کیا کہ ایران کی بحریہ ختم ہو چکی ہے فضائیہ تباہی کے دہانے پر ہے اور اس کی میزائل و ڈرون صلاحیت بری طرح متاثر ہوئی ہے جبکہ اسلحہ بنانے والی تنصیبات اور لانچرز کو بھی بڑی حد تک تباہ کر دیا گیا ہے۔

ادھر امریکی مرکزی کمان کے مطابق آپریشن کے دوران ایران کے اندر بارہ ہزار سے زائد اہداف کو نشانہ بنایا جا چکا ہے۔ تاہم ان تمام حملوں کے باوجود ایران کے پاس اب بھی میزائل نظام کا ایک بڑا ذخیرہ موجود ہے جو اس کی عسکری صلاحیت کو برقرار رکھے ہوئے ہے۔