سینٹ پیٹرزبرگ : ایرانی وزیر خارجہ عباس عراقچی نے پاکستان کے ذریعے امریکہ کو ایران کی واضح سرخ لکیریں پہنچا دی ہیں۔ ایرانی میڈیا کے مطابق یہ سرحدیں خاص طور پر جوہری پروگرام اور آبنائے ہرمز سے متعلق ہیں۔ اس پیغام کا مقصد کسی باضابطہ مذاکرات کے بجائے موجودہ علاقائی صورتحال کو واضح کرنا تھا۔

عراقچی اس وقت روس میں موجود ہیں جہاں وہ صدر ولادیمیر پوتن سے اہم ملاقات کرنے والے ہیں۔ اس سے قبل انہوں نے پاکستان اور عمان میں سفارتی مشاورت کی جس میں ایران امریکہ مذاکرات کی ممکنہ بحالی پر گفتگو ہوئی۔

ادھر امریکی صدر ڈونلڈ ٹرمپ نے ایران کے ساتھ براہ راست بات چیت کے حوالے سے سخت مؤقف برقرار رکھتے ہوئے کہا کہ ایرانی قیادت چاہے تو خود رابطہ کرے۔ انہوں نے یہ بھی امید ظاہر کی کہ تنازع جلد ختم ہو سکتا ہے۔

دریں اثنا ایران نے پاکستان کے ذریعے امریکہ کو ایک نئی تجویز بھی پیش کی ہے جس میں آبنائے ہرمز کو دوبارہ کھولنے اور جاری کشیدگی ختم کرنے کا خاکہ پیش کیا گیا ہے۔ اس تجویز میں دو مرحلوں پر مشتمل منصوبہ شامل ہے جس میں پہلے بحری راستے کی بحالی اور ناکہ بندی کا خاتمہ اور بعد میں جوہری مذاکرات کا آغاز شامل ہے۔

ایران کا مؤقف ہے کہ امریکہ کو پہلے بحری ناکہ بندی ختم کرنی ہوگی جبکہ امریکہ ایران کے جوہری پروگرام اور میزائل سرگرمیوں میں کمی کا مطالبہ کر رہا ہے۔ دونوں ممالک کے درمیان اب بھی نمایاں اختلافات موجود ہیں جس کے باعث صورتحال پیچیدہ بنی ہوئی ہے۔