تہران::ایران نے دعویٰ کیا ہے کہ اس کی فوج نے "آپریشن لائٹننگ" کے ساتویں مرحلے کے تحت اردن میں واقع الازرق فوجی اڈے پر ڈرون حملے کیے ہیں، جن میں امریکی ایف 18 لڑاکا طیاروں کی تنصیبات، رہائشی عمارتوں اور فوجی ساز و سامان کے بڑے گودام کو نشانہ بنایا گیا۔

ایران کے سرکاری نشریاتی ادارے کی رپورٹ کے مطابق فوج کے شعبۂ تعلقات عامہ نے ایک بیان میں کہا کہ اسلامی جمہوریہ ایران نے خطے میں امریکی فوجی اڈوں کے خلاف اپنی ڈرون کارروائیوں کے تسلسل میں ایک گھنٹہ قبل الازرق اڈے پر موجود ایف 18 طیاروں کے مقام، رہائشی عمارت اور بڑے ساز و سامان کے گودام پر تباہ کن ڈرون حملے کیے۔

بیان میں مزید کہا گیا کہ ایران اپنی سرزمین پر ہونے والی کسی بھی کارروائی کا جواب دیتا رہے گا۔فوج کے مطابق اسلامی جمہوریہ ایران کے سپاہی دشمن کو یہ واضح پیغام دیں گے کہ ایران کی سرزمین، سمندری حدود اور فضائی حدود کے خلاف کسی بھی اقدام کا جواب ضرور دیا جائے گا اور اس کی مناسب قیمت بھی چکانی پڑے گی۔

ایرانی فوج نے یہ بھی دعویٰ کیا کہ یہ کارروائی خطے میں امریکی فوجی اڈوں کے خلاف جاری فوجی مہم کا حصہ ہے۔بیان میں کہا گیا کہ امریکہ کی جانب سے جنگ بندی کی خلاف ورزی اور ایران پر حملوں کے آغاز کے بعد اب تک امریکی اڈوں کے خلاف 6 مراحل پر مشتمل ڈرون کارروائیاں کی جا چکی ہیں اور یہ سلسلہ آخری کامیابی تک جاری رہے گا۔

دوسری جانب امریکی صدر ڈونلڈ ٹرمپ نے منگل کو خبردار کیا کہ اگر ایران مذاکرات کی میز پر واپس نہیں آتا تو امریکہ آئندہ ہفتے سے ایرانی بجلی گھروں اور پلوں کو نشانہ بنانا شروع کر دے گا۔فاکس نیوز کو دیے گئے انٹرویو میں ٹرمپ نے کہا کہ امریکہ آئندہ چند روز میں ایران کے خلاف اپنی فوجی کارروائیاں مزید تیز کرے گا۔

انہوں نے کہا کہ "ہم کل رات بھی سخت حملے کریں گے، اس کے بعد والی رات بھی، اور پھر اگلے ہفتے ایران کے لیے صورتحال مزید سنگین ہو جائے گی۔ ہم اس کے بجلی گھر اور پل تباہ کر دیں گے اگر وہ مذاکرات کے لیے تیار نہ ہوا۔"ادھر ایران کی پاسداران انقلاب نے بھی دعویٰ کیا ہے کہ اس نے "آپریشن نصر 2" کی تیسری لہر کے دوران بحرین اور کویت میں امریکی فوجی تنصیبات کو میزائلوں اور ڈرونز سے نشانہ بنایا۔

پاسداران انقلاب کے بیان کے مطابق بحرین کے شیخ عیسیٰ فضائی اڈے پر امریکی ہتھیاروں اور فوجی ساز و سامان کے متعدد گوداموں کے علاوہ بحری جہازوں اور طیاروں سے متعلق تنصیبات کو نشانہ بنایا گیا۔بیان میں مزید کہا گیا کہ کویت کے علی السالم فضائی اڈے پر ایم کیو 9 ڈرونز کی تعیناتی کے مقام پر بھی حملہ کیا گیا جس میں متعدد ڈرون تباہ یا نقصان کا شکار ہوئے۔

پاسداران انقلاب کے مطابق یہ حملے اسی روز ایران کی ساحلی فوجی تنصیبات پر ہونے والی امریکی کارروائیوں کے جواب میں کیے گئے۔ادھر امریکی سینٹرل کمانڈ نے اعلان کیا کہ اس کی افواج نے 13 جولائی کی رات مشرقی امریکی وقت کے مطابق 10 بج کر 15 منٹ پر ایران کی فوجی تنصیبات کے خلاف ایک اور مربوط کارروائی مکمل کر لی۔

امریکی فوج کے مطابق تقریباً 5 گھنٹے جاری رہنے والی اس کارروائی میں بوشہر، چاہ بہار، جاسک، کنارک، ابو موسیٰ اور بندر عباس میں واقع اہم فوجی اہداف کو نشانہ بنایا گیا۔سینٹرل کمانڈ کا کہنا ہے کہ ان حملوں میں ایران کے ساحلی دفاعی نظام، میزائل لانچنگ ڈھانچے، ڈرون تنصیبات اور بحری صلاحیتوں کو کمزور کرنے کے لیے انتہائی درست ہتھیار استعمال کیے گئے۔

واضح رہے کہ اس خبر میں ایران اور امریکہ کی جانب سے کیے گئے دعوے شامل ہیں۔ ان دعوؤں کی آزاد ذرائع سے تصدیق نہیں ہو سکی ہے۔