نئی دہلی
ہندوستان میں ایران کے سفارت خانے نے ہفتہ کے روز آبنائے ہرمز میں ایک ہندوستانی جہاز کے حوالے سے امریکی صدر ڈونلڈ ٹرمپ کے الزامات کو مسترد کرتے ہوئے انہیں "بے بنیاد" قرار دیا۔سفارت خانے نے واشنگٹن پر یہ الزام بھی عائد کیا کہ وہ ہندوستانی ملاحوں کو لے جانے والے تجارتی جہازوں پر حالیہ حملوں سے توجہ ہٹانے کی کوشش کر رہا ہے۔ایرانی سفارت خانے کا کہنا تھا کہ امریکہ نے ایک ہفتے سے بھی کم عرصے میں تین ہندوستانی جہازوں کو نشانہ بنایا، جس کے نتیجے میں تین ہندوستانی ملاح ہلاک ہوئے، اور ان کارروائیوں کو اس نے "سفاکانہ" اور "قابلِ افسوس" قرار دیا۔
ہندوستان میں اسلامی جمہوریہ ایران کے سفارت خانے کے سرکاری ایکس اکاؤنٹ پر جاری بیان میں کہا گیا کہ آبنائے ہرمز میں ایک ہندوستانی جہاز کے حوالے سے ایران پر امریکی صدر کا الزام سراسر بے بنیاد ہے۔ یہ اس تلخ حقیقت سے عوام کی توجہ ہٹانے کی کوشش ہے کہ امریکہ نے ایک ہفتے سے بھی کم عرصے میں تین ہندوستانی جہازوں پر حملے کیے اور تین بے گناہ ہندوستانی ملاحوں کو ہلاک کیا۔ یہ انتہائی افسوسناک ہے۔
یہ بیان ایسے وقت میں سامنے آیا ہے جب ٹرمپ نے الزام لگایا تھا کہ آبنائے ہرمز کے قریب ہندوستانی ملاحوں کو لے جانے والے تین جہازوں پر حملوں کے پیچھے ایران کا ہاتھ تھا، جن میں تین افراد ہلاک ہوئے تھے۔ تاہم امریکی سینٹرل کمانڈ پہلے ہی تصدیق کر چکی ہے کہ یہ حملے امریکی بحری افواج نے کیے تھے، اور اس واقعے کو "مکمل طور پر ناقابلِ قبول" قرار دیا تھا۔
ٹرمپ کے یہ ریمارکس ایران کی جانب سے خلیجِ عمان میں ہندوستانی ملاحوں کو لے جانے والے تجارتی جہازوں پر امریکی حملوں کی مذمت کے بعد سامنے آئے، جن میں تین افراد جان سے گئے تھے۔ ایران نے ان کارروائیوں کو "سفاکانہ" قرار دیتے ہوئے واشنگٹن پر ایسے "غیر قانونی اقدامات" کا الزام لگایا جو عالمی امن اور سمندری سلامتی کے لیے خطرہ ہیں۔
ایران کی وزارتِ خارجہ کے ترجمان اسماعیل بقائی نے ایکس پر جاری بیان میں حملوں میں ہلاک ہونے والے ہندوستانی شہریوں کے اہلِ خانہ سے تعزیت کا اظہار کیا اور عالمی برادری سے جوابدہی کا مطالبہ کیا۔
بیان میں کہا گیا کہ ہندوستانی تجارتی جہازوں پر امریکہ کے سفاکانہ حملے، جن میں کم از کم تین ہندوستانی شہری ہلاک ہوئے، امریکہ کی مسلح لوٹ مار اور ریاستی قزاقی کی پالیسی کا واضح ثبوت ہیں۔ ہم جاں بحق ہونے والے ہندوستانی ملاحوں کے اہلِ خانہ اور دوستوں سے ہمدردی کا اظہار کرتے ہیں اور ہندوستانی عوام اور حکومت سے دلی تعزیت کرتے ہیں۔
انہوں نے مزید کہا کہ عالمی برادری کو بین الاقوامی اصولوں کی مسلسل خلاف ورزیوں پر امریکہ کو جوابدہ ٹھہرانا چاہیے۔
ترجمان نے کہا کہ عالمی برادری کو امریکہ کے غیر قانونی طرزِ عمل پر اسے جوابدہ بنانا چاہیے، کیونکہ اس کی کارروائیاں مسلسل عالمی امن و سلامتی کو خطرے میں ڈال رہی ہیں اور سمندری آمدورفت کی آزادی کو بھی متاثر کر رہی ہیں۔
