نئی دہلی: ہندوستانی بحریہ نے ہفتہ کو آئی این ایس مالون (INS Malvan) کا سرکاری نشان (کریسٹ) جاری کیا، جس میں تاریخی باغھ ناخ کی علامت کو شامل کیا گیا ہے۔ بحریہ کے مطابق باغھ ناخ، جو پنجے کی شکل کا ایک روایتی ہتھیار ہے، بہادری، چابک دستی اور جرات کی علامت سمجھا جاتا ہے۔ یہ نشان اس جنگی جہاز کے اس عزم کی عکاسی کرتا ہے کہ وہ ہندوستان کی سمندری سرحدوں کے تحفظ کے لیے ہر وقت مستعد رہے گا اور ضرورت پڑنے پر نہایت درستگی کے ساتھ کارروائی کرے گا۔ ہندوستانی بحریہ 22 جولائی 2026 کو ماہے کلاس اینٹی سب میرین وارفیئر شیلو واٹر کرافٹ (ASW-SWC) کے دوسرے جنگی جہاز آئی این ایس مالون کو باضابطہ طور پر بحری بیڑے میں شامل کرے گی۔

کمیشننگ تقریب کی صدارت فضائیہ کے سربراہ ایئر چیف مارشل اے پی سنگھ کریں گے، جبکہ مغربی بحری کمان کے سربراہ وائس ایڈمرل سنجے واتسیائن بھی اس موقع پر موجود ہوں گے۔ تقریب میں بحریہ کے اعلیٰ افسران، کوچین شپ یارڈ لمیٹڈ (سی ایس ایل) کے نمائندے، سابق فوجی افسران اور دیگر معزز مہمان بھی شرکت کریں گے۔

کوچی کے کوچین شپ یارڈ لمیٹڈ میں تیار کیا گیا یہ جنگی جہاز آتم نربھر بھارت مہم کے تحت جدید بحری جہاز سازی اور ڈیزائن کی صلاحیتوں کا مظہر ہے۔ اس میں 80 فیصد سے زیادہ مقامی ساختہ پرزے اور آلات استعمال کیے گئے ہیں، جو جنگی جہازوں کی تیاری، ڈیزائن اور انضمام کے میدان میں ہندوستان کی بڑھتی ہوئی خود کفالت کو ظاہر کرتے ہیں۔

بحریہ کے مطابق اگرچہ یہ جہاز حجم میں نسبتاً چھوٹا ہے، لیکن اس میں چابک دستی، درستگی اور طویل آپریشنل صلاحیت جیسی خصوصیات موجود ہیں، جو اتھلے سمندری علاقوں میں کارروائیوں کے لیے نہایت اہم ہیں۔ آئی این ایس مالون کی شمولیت مقامی طور پر تیار کیے گئے نئی نسل کے شیلو واٹر جنگی جہازوں کی بحری بیڑے میں مسلسل شمولیت کی ایک اہم کڑی ہے۔

دریں اثنا، ہندوستانی بحریہ 20 سے 23 جولائی تک کوچی میں واقع سدرن نیول کمان کے تحت آپریشن سدرن ریڈی نس 26-2 کا بھی انعقاد کرے گی۔ چار روزہ اس کثیر ملکی تربیتی پروگرام کا انعقاد کمبائنڈ میری ٹائم فورسز (CMF) کے اشتراک سے کیا جائے گا، جس کی نگرانی ہندوستانی بحریہ کی قیادت میں قائم کمبائنڈ ٹاسک فورس 154 (CTF 154) کرے گی، جو سی ایم ایف کی خصوصی تربیتی ٹاسک فورس ہے۔

اس پروگرام میں سی ایم ایف کے رکن ممالک کے اہلکار شریک ہوں گے، جہاں انہیں سمندری سلامتی سے متعلق پیشہ ورانہ تربیت، عملی تجربہ اور بہترین طریقۂ کار کے تبادلے کا موقع ملے گا۔ بحریہ کے مطابق 40 سے زائد ممالک پر مشتمل کمبائنڈ میری ٹائم فورسز کے ساتھ شراکت داری کے ذریعے ہندوستان علاقائی صلاحیت سازی اور مشترکہ سمندری سلامتی کو مزید مضبوط بنانے میں اپنا کردار ادا کرتا رہے گا۔