نئی دہلی

انڈونیشیا کے وزیرِ خارجہ سوگیونو بدھ کے روز برکس وزرائے خارجہ اجلاس میں شرکت کے لیے قومی دارالحکومت نئی دہلی پہنچ گئے۔وزارتِ خارجہ نے ’ایکس‘ پر ایک پوسٹ میں معزز مہمان کا "پُرتپاک استقبال" کیا۔

وزارتِ خارجہ کی پوسٹ میں کہا گیا  کہ برکس وزرائے خارجہ اجلاس میں شرکت کے لیے نئی دہلی پہنچنے پر انڈونیشیا کے وزیرِ خارجہ سوگیونو کا پُرتپاک خیر مقدم ہے۔آنے والے دو دنوں کے دوران ہندوستان عالمی سفارتی سرگرمیوں کا مرکز بننے جا رہا ہے، کیونکہ برکس رکن ممالک کے وزرائے خارجہ 14 اور 15 مئی کو منعقد ہونے والے برکس وزرائے خارجہ اجلاس میں شرکت کے لیے نئی دہلی پہنچ رہے ہیں۔

روسی وزیرِ خارجہ سرگئی لاوروف بھی آج ہندوستان پہنچنے والے ہیں۔ وہ 13 مئی کو وزیرِ خارجہ ایس جے شنکر کے ساتھ وسیع سطح کی بات چیت کریں گے، جس میں ہندوستان-روس تعاون کے اہم شعبے شامل ہوں گے۔روسی وزارتِ خارجہ کے بیان کے مطابق، وزرائے خارجہ دسمبر 2025 میں صدر ولادیمیر پوتن کے سرکاری دورۂ ہندوستان کے دوران طے پانے والے معاہدوں پر عمل درآمد کی پیش رفت کا جائزہ لیں گے۔ اس کے علاوہ روس میں ہونے والی آئندہ سربراہان ملاقات اور روس-ہندوستان بین الحکومتی کمیشن برائے تجارت، اقتصادیات، سائنس، ٹیکنالوجی اور ثقافتی تعاون کے اگلے اجلاس کی تیاریوں پر بھی گفتگو ہوگی۔

دونوں وزرائے خارجہ موجودہ بین الاقوامی اور علاقائی مسائل پر تبادلۂ خیال کریں گے، خاص طور پر مغربی ایشیا کی صورتحال پر توجہ مرکوز کی جائے گی۔ اس کے ساتھ ساتھ اقوام متحدہ، برکس اور جی-20 کے اندر تعاون کے مختلف طریقوں پر بھی تبادلۂ خیال کیا جائے گا۔

ملاقات میں دوطرفہ تعاون کے کئی اہم شعبوں پر بھی گفتگو ہوگی، جن میں تجارت کو فروغ دینا، غیر قانونی بیرونی دباؤ سے محفوظ مستحکم ٹرانسپورٹ، لاجسٹک اور مالیاتی نظام قائم کرنے کی کوششوں کو تیز کرنا، توانائی کے شعبے میں تعاون بڑھانا، اور سائنس و خلائی ٹیکنالوجی میں روابط کو وسعت دینا شامل ہے۔

ایران کے وزیرِ خارجہ سید عباس عراقچی بھی اس اعلیٰ سطحی اجلاس میں شرکت کے لیے ہندوستان پہنچنے والے ہیں۔14 اور 15 مئی کو نئی دہلی بین الاقوامی تعلقات کا ایک اہم مرکز بننے جا رہا ہے۔ یہ اہم اجلاس 2026 کے لیے ہندوستان کی برکس صدارت کا ایک اہم ستون تصور کیا جا رہا ہے، جو نئے توسیع شدہ کثیر ملکی اتحاد میں اس کی قیادت کو نمایاں کرتا ہے۔

ہندوستان نے یکم جنوری کو باضابطہ طور پر برازیل سے برکس کی صدارت سنبھالی تھی۔ یہ چوتھی مرتبہ ہے جب ہندوستان اس بااثر گروپ کی قیادت کر رہا ہے۔ اس سے قبل وہ 2012، 2016 اور 2021 میں برکس سربراہی اجلاسوں کی میزبانی کر چکا ہے۔