دوحہ

دوحہ میں ہندوستانی سفارت خانے نے پیر کے روز بتایا کہ قطر میں گزشتہ رات راس لفان میں پیش آنے والے حادثے میں 12 ہندوستانی شہریوں کی جان چلی گئی ہے۔سفارت خانے نے قطری حکام کے حوالے سے کہا کہ حادثے میں زخمی ہونے والے تمام افراد کی حالت مستحکم ہے اور انہیں مناسب طبی علاج فراہم کیا جا رہا ہے۔

سفارت خانے نے ایکس پر جاری بیان میں کہا کہ قطری حکام نے تصدیق کی ہے کہ گزشتہ رات راس لفان میں پیش آنے والے حادثے میں 12 ہندوستانی شہری افسوسناک طور پر جاں بحق ہوئے ہیں۔ ہم سوگوار خاندانوں سے دلی تعزیت کا اظہار کرتے ہیں اور مرحومین کے لیے دعا گو ہیں۔

بیان میں مزید کہا گیا کہ قطری حکام نے یہ بھی تصدیق کی ہے کہ حادثے میں زخمی ہونے والے تمام افراد کی حالت مستحکم ہے اور انہیں مناسب طبی سہولیات فراہم کی جا رہی ہیں۔ہندوستانی سفارت خانے نے کہا کہ وہ قطری حکام کے ساتھ مسلسل رابطے میں ہے تاکہ متاثرہ ہندوستانی شہریوں اور ان کے اہل خانہ کو ہر ممکن مدد فراہم کی جا سکے، جس میں جاں بحق افراد کی میتیں جلد از جلد ہندوستان بھیجنے کے انتظامات بھی شامل ہیں۔

دریں اثنا، قطر انرجی نے اپنے تازہ بیان میں تصدیق کی کہ دھماکے اور اس کے بعد لگنے والی آگ کے نتیجے میں 13 افراد ہلاک جبکہ 66 افراد زیر علاج ہیں۔کمپنی کے مطابق زخمیوں میں سے کسی کی حالت تشویشناک نہیں ہے۔قطر انرجی نے متاثرین کے اہل خانہ سے تعزیت کا اظہار کرتے ہوئے کہا کہ جاں بحق افراد کا تعلق ہندوستان اور پاکستان سے تھا، جبکہ زخمیوں میں قطر، ہندوستان، پاکستان، بنگلہ دیش، کینیا، گھانا، تنزانیہ، نائجیریا اور نیپال کے شہری شامل ہیں۔

بیان میں کہا گیا کہ قطر انرجی جاں بحق افراد کے اہل خانہ، دوستوں اور ساتھیوں سے دلی تعزیت کا اظہار کرتی ہے اور زخمیوں کی جلد صحت یابی کے لیے دعاگو ہے۔ کمپنی اس سانحے سے متاثرہ تمام افراد کی مکمل معاونت کا عہد کرتی ہے۔کمپنی نے مزید کہا کہ یہ واقعہ ایک آپریشنل حادثہ تھا اور اس کا تعلق کسی تخریب کاری یا دشمنانہ کارروائی سے نہیں تھا۔

قطر انرجی کے مطابق برزان گیس تنصیب میں دسمبر 2025 سے ہنگامی مرمتی کاموں کے باعث پیداوار مکمل طور پر بند تھی اور حادثے سے صرف دو دن قبل ہی اسے دوبارہ فعال کیا گیا تھا۔

کمپنی نے بتایا کہ اس کی ہنگامی امدادی ٹیموں اور قطر کے محکمہ شہری دفاع نے فوری کارروائی کرتے ہوئے آگ پر قابو پا لیا اور اسے مکمل طور پر بجھا دیا۔ برزان تنصیب اور قریبی بنیادی ڈھانچے کو پہنچنے والے نقصان کا جائزہ لینے کا عمل جاری ہے۔قطر انرجی نے واضح کیا کہ اس دھماکے اور آگ سے اس کی ایل این جی تنصیبات، راس لفان بندرگاہ، لاجسٹک سرگرمیوں اور برآمدی صلاحیتوں پر کوئی اثر نہیں پڑا۔

بیان میں کہا گیا کہ قطر انرجی کی ایل این جی تنصیبات، راس لفان بندرگاہ، دیگر لاجسٹک آپریشنز اور برآمدی صلاحیتیں اس دھماکے اور آگ سے متاثر نہیں ہوئی ہیں۔قطر کی وزارت داخلہ نے کہا کہ ابتدائی تحقیقات کے مطابق حادثہ تنصیب میں کام کے دوران پیش آنے والی فنی خرابی کے باعث ہوا۔

وزارت کے بیان کے مطابق متعلقہ سکیورٹی اداروں اور ہنگامی امدادی ٹیموں نے منظور شدہ ایمرجنسی منصوبوں کے تحت فوری طور پر امدادی کارروائیاں شروع کر دیں۔ تمام زخمیوں کو علاج کے لیے منتقل کر دیا گیا جبکہ جائے وقوعہ پر تلاش کا عمل مکمل ہو چکا ہے۔وزارت نے کہا کہ حادثے کی درست تکنیکی وجوہات جاننے کے لیے تحقیقات جاری ہیں اور قانونی و تکنیکی ضوابط کے مطابق ضروری اقدامات کیے جائیں گے۔وزارت داخلہ نے عوام کو یقین دلایا کہ حادثے کے نتیجے میں کسی قسم کے گیس رساؤ کا پتہ نہیں چلا جو افراد یا ماحول کے لیے خطرہ بن سکتا ہو۔

بیان میں کہا گیا کہ وزارت داخلہ متعلقہ اداروں کے ساتھ مل کر اس بات کی تصدیق کرتی ہے کہ حادثے کے نتیجے میں کسی ایسے رساؤ کا سراغ نہیں ملا جو افراد کی سلامتی یا اردگرد کے ماحول کے لیے خطرہ بنے۔

وزارت داخلہ نے جاں بحق افراد کے اہل خانہ سے تعزیت اور زخمیوں کی جلد صحت یابی کے لیے نیک خواہشات کا اظہار کیا ہے۔

دھماکے کی وجوہات جاننے کے لیے واقعے کی مکمل تحقیقات شروع کر دی گئی ہیں۔