نئی دہلی یکم ستمبر (اے این آئی): وزیرِ خارجہ ایس جے شنکر نے افغانستان میں آنے والے ہولناک زلزلے پر گہرے افسوس کا اظہار کیا ہے، جس میں سیکڑوں افراد جاں بحق اور زخمی ہوئے۔ انہوں نے اس مشکل گھڑی میں افغانستان کو بھارت کی طرف سے ہر ممکن امداد کی یقین دہانی کرائی۔ایکس پر جاری بیان میں وزیرِ خارجہ نے کہا کہ افغانستان کے صوبہ کنڑ میں آنے والا ہلاکت خیز زلزلہ باعثِ تشویش ہے۔ افغان عوام کے ساتھ یکجہتی اور حمایت کا اظہار کرتے ہیں۔ بھارت اس ضرورت کی گھڑی میں مدد فراہم کرے گا۔ متاثرہ خاندانوں سے تعزیت اور زخمیوں کی جلد صحتیابی کے لیے دعاگو ہیں۔"

رپورٹس کے مطابق پیر کی صبح 6.0 شدت کے زلزلے نے افغانستان کے مشرقی حصے کو ہلا ڈالا، جس کے نتیجے میں 500 سے زائد افراد جاں بحق اور 1000 سے زیادہ زخمی ہوئے۔طالبان کے زیرِ انتظام حکام کے مطابق کنڑ صوبے کے نور گل، سوکی، واتپور، مانوجی اور چپا درہ کے علاقے سب سے زیادہ متاثر ہوئے۔ ننگرہار میں بھی کم از کم 9 افراد ہلاک اور کئی زخمی ہوئے۔

کچے پتھروں اور مٹی کے بنے گاؤں زمین بوس ہوگئے، لینڈ سلائیڈنگ نے اہم راستے بند کر دیے جبکہ رابطے کے نظام میں تعطل کے باعث ریسکیو اور ریلیف آپریشن مزید متاثر ہوا۔

حکام نے جانی نقصان کی تصدیق کرتے ہوئے فوری عالمی امداد کی اپیل کی۔ ریسکیو ورکرز اور ہیلی کاپٹر روانہ کیے گئے، تاہم دشوار گزار پہاڑی علاقے اور تباہ شدہ انفراسٹرکچر کی وجہ سے کارروائیاں سست روی کا شکار رہیں۔6.0 شدت کے زلزلے کے بعد 4.7 شدت کا آفٹر شاک 140 کلومیٹر کی گہرائی میں ریکارڈ ہوا۔ اس کے بعد 4.3 اور 5.0 شدت کے مزید جھٹکے بھی محسوس کیے گئے۔

یہ سانحہ افغانستان کی زلزلوں کے حوالے سے مستقل کمزوری کو ظاہر کرتا ہے، خاص طور پر پہاڑی اور دور دراز علاقوں میں۔ یہ تباہی دو سال سے بھی کم عرصے بعد دوبارہ رونما ہوئی ہے، جو بار بار پیش آنے والے خطرے کو اجاگر کرتی ہے۔پاکستان کے مختلف علاقوں میں بھی جھٹکے محسوس کیے گئے۔ ڈان کے مطابق صوبہ خیبر پختونخوا اور پنجاب کے کئی اضلاع میں جھٹکے آئے تاہم کسی جانی نقصان کی اطلاع نہیں ملی۔

ماہرین کے مطابق سطحی اور درمیانی گہرائی والے زلزلے زیادہ خطرناک ہوتے ہیں کیونکہ ان کے جھٹکے زمین کی سطح تک جلد پہنچتے ہیں، جس کے باعث زیادہ تباہی اور جانی نقصان ہوتا ہے۔افغانستان انڈین اور یوریشین ٹیکٹونک پلیٹس کے سنگم پر واقع ہے اور ہرات کے قریب سے بھی ایک فالٹ لائن گزرتی ہے۔ ریڈ کراس کے مطابق، ملک کی جغرافیائی پوزیشن کے باعث ہندوکش کے پہاڑی سلسلے میں ہر سال زلزلے آتے رہتے ہیں۔