نئی دہلی
ہندوستان میں امریکہ کے سفیر سرجیو گور نے ہندوستان کو "ہمارے لیے نہایت اہم اور ایک شاندار شراکت دار" قرار دیتے ہوئے کہا کہ ہندوستان-امریکہ تعلقات اس وقت "بہترین سطح" پر ہیں اور آنے والے دنوں اور ہفتوں میں دوطرفہ تعلقات سے متعلق کئی بڑے اعلانات متوقع ہیں۔
گور نے کہا کہ ان کے یہ بیانات حال ہی میں وزیر اعظم نریندر مودی اور امریکی صدر ڈونلڈ ٹرمپ کے درمیان مغربی ایشیا کی صورتحال اور دوطرفہ شراکت داری پر ہونے والی ٹیلیفونک بات چیت کے بعد سامنے آئے ہیں۔گور نے تصدیق کی کہ دونوں رہنما اس سال کئی بار بات کر چکے ہیں، جن میں سے سبھی گفتگو عوامی نہیں کی گئی۔
انہوں نے کہا کہ انہوں نے اس سال کئی بار بات کی ہے... ظاہر ہے ہر بات چیت عوامی نہیں ہوتی۔ لیکن وہ ابھی ایک گھنٹہ پہلے ہی فون پر گفتگو کر چکے ہیں۔تفصیلات ظاہر کیے بغیر امریکی سفیر نے کہا کہ صدر ٹرمپ عالمی اہم معاملات پر وزیر اعظم کو باقاعدہ طور پر آگاہ کرتے رہتے ہیں۔
انہوں نے کہا کہ مشرقِ وسطیٰ میں جاری جنگ کے پیش نظر صدر نے وزیر اعظم کو صورتحال سے آگاہ کرنا چاہا، ساتھ ہی ہمارے تعلقات سے جڑے کچھ دیگر اہم معاملات پر بھی بات کی گئی۔گور نے تجارتی مذاکرات کی تفصیلات بتانے سے گریز کیا، تاہم بڑے اعلانات کا اشارہ دیا۔
انہوں نے کہا کہ بات چیت میں کئی اہم امور شامل تھے۔ میں اس کی تفصیل میں نہیں جانا چاہتا... لیکن میں یہ ضرور کہوں گا کہ میں ابھی واشنگٹن سے واپس آیا ہوں جہاں میں نے پوری کابینہ سے ملاقات کی، اور آنے والے دنوں اور ہفتوں میں کچھ بڑے اعلانات کیے جائیں گے۔
انہوں نے مزید کہا کہ دوطرفہ تعلقات اس وقت "بہترین سطح" پر ہیں۔
امریکی سفیر نے یہ بھی تصدیق کی کہ امریکی وزیر خارجہ مارکو روبیو اگلے ماہ ہندوستان کا دورہ کریں گے، جو ان کا پہلا دورہ ہوگا۔ گور کے مطابق، ہندوستان میں وزارتی سطح کے کواڈ اجلاس کی تیاری بھی جاری ہے۔
انہوں نے کہا کہ ہم ہندوستان میں وزارتی سطح کے کواڈ اجلاس کی میزبانی کے منتظر ہیں۔ یہ وزیر خارجہ کا پہلا دورہ ہوگا اور وہ صرف دہلی ہی نہیں بلکہ دیگر مقامات کا بھی دورہ کرنا چاہتے ہیں۔ ہندوستان ہمارے لیے نہایت اہم ہے اور ایک بہترین شراکت دار ہے۔ صدر کا آپ کے وزیر اعظم کے ساتھ مضبوط تعلق بھی ہے۔ادھر وزیر اعظم نریندر مودی نے منگل کو بتایا کہ انہیں امریکی صدر ٹرمپ کا فون آیا، جس میں دونوں رہنماؤں نے مغربی ایشیا کی سکیورٹی صورتحال پر بات چیت کی اور آبنائے ہرمز کو کھلا اور محفوظ رکھنے کی اہمیت پر زور دیا۔
وزیر اعظم نے سوشل میڈیا پلیٹ فارم ایکس پر لکھا کہ دونوں رہنماؤں نے مختلف شعبوں میں دوطرفہ تعاون میں ہونے والی پیش رفت کا جائزہ لیا۔
انہوں نے کہا کہ میرے دوست، صدر ڈونلڈ ٹرمپ کا فون آیا۔ ہم نے مختلف شعبوں میں اپنے دوطرفہ تعاون میں ہونے والی نمایاں پیش رفت کا جائزہ لیا۔ ہم تمام شعبوں میں اپنی جامع عالمی اسٹریٹجک شراکت داری کو مزید مضبوط بنانے کے لیے پرعزم ہیں۔
انہوں نے مزید کہا کہ ہم نے مغربی ایشیا کی صورتحال پر بھی بات کی اور آبنائے ہرمز کو کھلا اور محفوظ رکھنے کی اہمیت پر زور دیا۔
