ہنوئی

ہندوستان کے وزیرِ دفاع راج ناتھ سنگھ نے منگل کے روز ویتنام کے وزیرِ قومی دفاع فان وان گیانگ کے ساتھ وزارتی سطح کی دو طرفہ ملاقات کی، جس میں دونوں ممالک نے دفاعی شراکت داری کا جائزہ لیا اور بحری سلامتی، دفاعی صنعت، تربیت اور علاقائی استحکام کے شعبوں میں تعاون کو مزید مضبوط بنانے کے طریقوں پر تبادلۂ خیال کیا۔

راج ناتھ سنگھ نے سوشل میڈیا پلیٹ فارم ایکس پر اپنے بیان میں اِس مؤثر دو طرفہ ملاقات کی تفصیلات بیان کرتے ہوئے ویتنام کے ساتھ جامع تزویراتی شراکت داری کو مزید مستحکم بنانے کے عزم کا اظہار کیا۔

انہوں نے کہا کہ ویتنام کے وزیرِ قومی دفاع سینئر لیفٹیننٹ جنرل فان وان گیانگ کے ساتھ نہایت مؤثر دو طرفہ ملاقات ہوئی۔ دونوں فریقوں نے ہندوستان اور ویتنام کے درمیان تیزی سے فروغ پاتی دفاعی شراکت داری کا جائزہ لیا اور بحری سلامتی، دفاعی صنعت، تربیت اور علاقائی استحکام کے شعبوں میں تعاون کو مزید مضبوط بنانے کے امکانات پر گفتگو کی۔ ہندوستان ویتنام کے ساتھ جامع تزویراتی شراکت داری کو مستحکم بنانے کے لیے پُرعزم ہے۔

راج ناتھ سنگھ نے فان وان گیانگ کے ساتھ مل کر ویتنامی فضائیہ کے افسران کے کالج میں قائم زبان کی تجربہ گاہ کا بھی افتتاح کیا۔وزیرِ دفاع نے مزید بتایا کہ دونوں ممالک نے مصنوعی ذہانت اور کوانٹم ٹیکنالوجی کے شعبے میں ایک مفاہمتی یادداشت پر بھی دستخط کیے ہیں۔

انہوں نے کہا کہ یہ ہماری جامع تزویراتی شراکت داری کو مزید آگے بڑھانے کی سمت میں ایک اہم قدم ہے۔ملاقات کے آغاز میں اپنے خطاب کے دوران راج ناتھ سنگھ نے ہندوستان اور ویتنام کے تعلقات کی تاریخی بنیادوں کا ذکر کیا اور اس بات پر زور دیا کہ اُن کا یہ دورہ ویتنام کے سابق صدر ہو چی منہ کی ایک سو چھتیسویں یومِ پیدائش کے موقع پر ہو رہا ہے۔انہوں نے کہا، ’’میرے لیے یہ باعثِ اعزاز ہے کہ میں اِس اہم ملاقات کے لیے ویتنام میں موجود ہوں۔ مجھے خاص طور پر اس بات پر فخر ہے کہ ہماری ملاقات صدر ہو چی منہ کی ایک سو چھتیسویں یومِ پیدائش کے موقع پر ہو رہی ہے۔ وہ ایک دور اندیش رہنما تھے جنہیں ہندوستان میں بے حد احترام کی نگاہ سے دیکھا جاتا ہے۔ سن  1958 میں اُن کے تاریخی دورۂ ہندوستان نے دونوں ممالک کے درمیان دیرپا تعلقات کی مضبوط بنیاد رکھی تھی۔

وزیرِ دفاع نے اس بات پر بھی زور دیا کہ یہ دورہ دونوں ممالک کے درمیان جامع تزویراتی شراکت داری کے دس برس مکمل ہونے کے اہم موقع پر ہو رہا ہے۔انہوں نے کہا کہ یہ ایک اہم سنگِ میل ہے جو ہمارے دو طرفہ تعلقات کی گہرائی، پختگی اور مضبوطی کی عکاسی کرتا ہے۔ مجھے خوشی ہے کہ آپ کے حالیہ دورۂ ہندوستان کے دوران اِسے اب ’مضبوط جامع تزویراتی شراکت داری‘ کے درجے تک وسعت دے دی گئی ہے۔

راج ناتھ سنگھ نے اعتماد ظاہر کیا کہ ہنوئی میں ہونے والی یہ بات چیت فوجی تعاون کو مزید گہرا کرے گی اور دونوں ممالک کے درمیان تزویراتی روابط کو نئی وسعت عطا کرے گی۔انہوں نے کہا کہ مجھے یقین ہے کہ آج کی ہماری گفتگو دفاعی تعاون کو مزید مستحکم کرے گی اور آنے والے برسوں میں تعاون کے نئے راستے بھی کھولے گی۔

وزیرِ دفاع راج ناتھ سنگھ پیر کے روز ہنوئی پہنچے تھے، جہاں سے اُن کے دو ملکی دورے کا آغاز ہوا۔ اِس دورے کا مقصد بحرالکاہل اور بحرِ ہند کے خطے میں ہندوستان کی تزویراتی اور دفاعی شراکت داریوں کو مزید مضبوط بنانا ہے۔یہ دورہ ویتنامی رہنما تو لام کے نئی دہلی کے سرکاری دورے کے فوراً بعد ہو رہا ہے، جس سے دونوں ممالک کے درمیان دفاعی تعلقات میں بڑھتی ہوئی قربت کا اشارہ ملتا ہے۔

ویتنام، راج ناتھ سنگھ کے دو ملکی دورے کا پہلا مرحلہ ہے۔ اس کے بعد وہ دورے کے دوسرے مرحلے میں جنوبی کوریا جائیں گے، جہاں دفاعی سازوسامان کی تیاری، فوجی صنعت میں اشتراک اور ٹیکنالوجی کے شعبے میں تعاون اہم موضوعات رہنے کی توقع ہے۔