نئی دہلی: بھارت اور امریکہ نے منگل کے روز ایک بڑا فریم ورک باقاعدہ طور پر طے کر لیا ہے جس کا مقصد اہم معدنیات اور نایاب زمینی عناصر (ریئر ارتھ) کے شعبے میں تعاون کو فروغ دینا ہے۔ یہ پیش رفت ایسے وقت میں ہوئی ہے جب جدید ٹیکنالوجی اور صنعتی پیداوار کے لیے ضروری ان اسٹریٹجک وسائل کی فراہمی اور برآمد پر چین کی برتری کے حوالے سے عالمی سطح پر تشویش بڑھ رہی ہے۔
یہ معاہدہ نئی دہلی میں ہونے والی کواڈ وزرائے خارجہ کی ملاقات کے موقع پر طے پایا۔ وزیر خارجہ ایس جے شنکر نے امریکی وزیر خارجہ مارکو روبیو کے ساتھ میڈیا سے گفتگو کرتے ہوئے اس معاہدے کو ’’بروقت اور نہایت اہم‘‘ قرار دیا۔ انہوں نے کہا، ’’یہ فریم ورک اہم معدنیات اور ریئر ارتھ سپلائی چین کے پورے نظام میں تعاون کو گہرا کرے گا، جس میں کان کنی، پراسیسنگ، ری سائیکلنگ اور سرمایہ کاری شامل ہے۔‘‘
جے شنکر نے کہا کہ اس اقدام سے مضبوط اور متنوع سپلائی چینز قائم کرنے میں مدد ملے گی، منصوبوں کی مالی معاونت آسان ہوگی اور اہم معدنی وسائل کے بہتر انتظام کو فروغ ملے گا۔ انہوں نے کہا کہ یہ معاہدہ بھارت اور امریکہ کے درمیان بڑھتی ہوئی اسٹریٹجک شراکت داری کی عکاسی کرتا ہے، خاص طور پر ایسے وقت میں جب دنیا بھر کے ممالک عالمی سپلائی چینز میں موجود کمزوریوں کو کم کرنے کی کوشش کر رہے ہیں۔
مارکو روبیو نے بھی اس شراکت داری کی اہمیت پر زور دیتے ہوئے کہا کہ دونوں ممالک کا مشترکہ اسٹریٹجک مفاد ہے کہ اہم معدنیات تک طویل المدتی اور قابل اعتماد رسائی یقینی بنائی جائے۔ انہوں نے کہا، ’’ہم یہ خطرہ مول نہیں لے سکتے کہ ان صنعتوں کے بنیادی خام مال کسی ایک ملک کی اجارہ داری کے رحم و کرم پر ہوں۔‘‘
ان کا اشارہ مبینہ طور پر چین کے ریئر ارتھ پراسیسنگ اور برآمدات میں غالب کردار کی طرف تھا۔ یہ معاہدہ ایسے وقت میں سامنے آیا ہے جب چین کی جانب سے ریئر ارتھ عناصر اور اسٹریٹجک دھاتوں پر برآمدی پابندیوں کے باعث عالمی سطح پر تشویش میں اضافہ ہوا ہے۔ یہ مواد سیمی کنڈکٹرز، الیکٹرک گاڑیوں، صاف توانائی، دفاعی نظام اور مصنوعی ذہانت جیسے شعبوں کے لیے انتہائی اہم ہیں۔
روبیو نے امریکی حمایت یافتہ ’’پیکس سلیکا‘‘ اقدام کا بھی حوالہ دیا، جس کا مقصد اہم معدنیات اور اے آئی سے متعلق ٹیکنالوجیز کے لیے مضبوط اور اختراعی سپلائی چینز قائم کرنا ہے۔ انہوں نے کہا کہ موجودہ فریم ورک کی بنیاد اس سال کے اوائل میں واشنگٹن ڈی سی میں منعقد ہونے والے ’’کریٹیکل منرلز فورم‘‘ میں رکھی گئی تھی، جس میں بھارت نے بھی شرکت کی تھی۔
