نئی دہلی

ہندوستان نے اقوام متحدہ کی سلامتی کونسل میں مشرقِ وسطیٰ کی صورتحال پر تشویش ظاہر کرتے ہوئے کہا ہے کہ آبنائے ہرمز سے گزرنے والے تجارتی جہازوں کو نشانہ بنانا انتہائی قابلِ مذمت ہے۔ اقوام متحدہ میں ہندوستان کی نائب مستقل نمائندہ یوجنا پٹیل نے کہا کہ یہ خطہ ہندوستان کی توانائی اور اقتصادی سلامتی کے لیے نہایت اہم ہے۔پٹیل نے کہا کہ بین الاقوامی قانون کے تحت تجارتی جہازوں پر حملے مکمل طور پر ممنوع ہیں اور اس اصول پر سختی سے عمل ہونا چاہیے۔ انہوں نے اس بات پر بھی افسوس ظاہر کیا کہ جاری تنازع کے دوران ہندوستانی ملاحوں کی جانیں گئی ہیں، جو انتہائی افسوسناک ہے۔ ہندوستان نے زور دیا کہ سمندری راستوں کی آزادی اور عالمی تجارت میں کسی بھی رکاوٹ کو قبول نہیں کیا جا سکتا۔

ہندوستان نے اقوام متحدہ کی سلامتی کونسل کی قرارداد 2817 کی حمایت کرتے ہوئے جلد از جلد محفوظ اور بلا رکاوٹ سمندری آمد و رفت بحال کرنے کا مطالبہ کیا ہے۔ پٹیل نے کہا کہ مشرقِ وسطیٰ کے حالیہ حالات کا اثر صرف سلامتی تک محدود نہیں بلکہ عالمی معیشت، توانائی کی فراہمی، غذائی تحفظ اور بین الاقوامی تجارت پر بھی پڑ رہا ہے۔

انہوں نے کہا کہ اس خطے میں ہندوستان کے گہرے مفادات وابستہ ہیں کیونکہ تقریباً ایک کروڑ ہندوستانی خلیجی ممالک میں رہتے اور کام کرتے ہیں، اس لیے ان کی حفاظت ترجیح ہے۔ ہندوستان نے تمام فریقوں سے صبر و تحمل، کشیدگی میں کمی اور سفارتی حل تلاش کرنے کی اپیل کی ہے۔

پٹیل نے مزید کہا کہ ہر ملک کی خودمختاری اور علاقائی سالمیت کا احترام ضروری ہے۔ انہوں نے غزہ اور مغربی کنارہ کی صورتحال پر تشویش ظاہر کرتے ہوئے کہا کہ وہاں انسانی بحران شدت اختیار کرتا جا رہا ہے، جہاں خواتین اور بچوں سمیت عام شہریوں کی ہلاکت اور بنیادی ڈھانچے کی تباہی تشویشناک ہے۔

ہندوستان نے فلسطینی علاقوں میں ترقیاتی اور امدادی منصوبوں کے ذریعے تعاون جاری رکھنے کی بات کہی۔ پٹیل نے دو ریاستی حل کی حمایت دہراتے ہوئے کہا کہ خطے میں مستقل امن کے لیے یہ ناگزیر ہے۔لبنان میں اقوام متحدہ کے امن مشن یونیفیل کے اہلکاروں پر حملوں کی مذمت کرتے ہوئے ہندوستان نے کہا کہ امن فوجیوں کی حفاظت یقینی بنائی جائے اور ایسے حملوں کی غیر جانبدارانہ تحقیقات ہونی چاہئیں۔ اس سلسلے میں قرارداد 2589 کا بھی حوالہ دیا گیا، جو امن فوجیوں کے خلاف جرائم میں جوابدہی سے متعلق ہے۔

ساتھ ہی، ہندوستان نے لبنان میں حالیہ جنگ بندی کے اعلان کا خیرمقدم کیا اور امید ظاہر کی کہ اس سے اسرائیل اور لبنان کے درمیان امن مذاکرات کو فروغ ملے گا۔شام کے معاملے پر ہندوستان نے کہا کہ وہ ایک "شامی قیادت اور شامی ملکیت" والے سیاسی عمل کی حمایت کرتا ہے اور وہاں کے عوام کو انسانی امداد فراہم کرنے کے لیے پُرعزم ہے۔

ادھر خطے میں کشیدگی مزید بڑھ گئی ہے۔ ایران نے اقوام متحدہ میں شکایت درج کراتے ہوئے امریکہ پر سمندری قزاقی کا الزام لگایا ہے۔ ایران کے سفیر امیر سعید ایروانی نے انتونیو گوتیرش کو خط لکھ کر کہا کہ امریکی اقدامات بین الاقوامی قانون کے خلاف ہیں۔

ایران کا کہنا ہے کہ جہازوں کو ضبط کرنے کے لیے امریکہ کی جانب سے گھریلو قوانین کا استعمال غیر قانونی ہے اور اسے کسی صورت درست نہیں ٹھہرایا جا سکتا۔ اس پیش رفت نے خطے میں پہلے سے موجود کشیدگی کو مزید بڑھا دیا ہے۔

آخر میں ہندوستان نے کہا کہ مشرقِ وسطیٰ طویل عرصے سے تنازعات کا مرکز رہا ہے اور اب وہاں کے عوام کو امن، استحکام اور بہتر مستقبل کی ضرورت ہے۔ ہندوستان نے واضح کیا کہ وہ خطے میں مستقل اور منصفانہ امن کے قیام کی ہر کوشش کی حمایت کرتا رہے گا۔