نئی دہلی: مغربی ایشیا میں جاری کشیدگی کے درمیان امریکی صدر ڈونالڈ ٹرمپ کی جانب سے ایران پر مزید سخت اقتصادی پابندیاں عائد کرنے کی دھمکی کے بارے میں پوچھے جانے پر ہندوستان نے جمعہ کو کہا کہ وہ مسائل کے حل کے لیے بات چیت اور سفارت کاری کی حمایت کرتا ہے۔
وزارت خارجہ کے ترجمان رندھیر جیسوال نے کہا کہ ہندوستان مغربی ایشیا کی صورتحال پر قریبی نظر رکھے ہوئے ہے۔ انہوں نے میڈیا بریفنگ کے دوران کہا، ’’ہم بات چیت اور سفارت کاری کے ذریعے پرامن حل کے حامی ہیں۔‘‘ ہندوستان کا یہ بیان امریکی صدر ٹرمپ کی جانب سے ایران کے خلاف سخت اقتصادی کارروائی کی دھمکی کے بعد سامنے آیا ہے۔ ٹرمپ نے بدھ کو ایران کے خلاف اسے ’’کسی بھی ملک کے خلاف اب تک کی سب سے تباہ کن اقتصادی کارروائی‘‘ قرار دیتے ہوئے بڑے پیمانے پر اقتصادی جنگ اور تنہائی کی بات کی تھی۔
ٹرمپ نے خبردار کیا کہ جو ممالک اپنے مالیاتی اداروں، کاروباری اداروں، ہوائی اڈوں یا سرکاری اداروں کے ذریعے ایران کو کسی بھی قسم کی مدد فراہم کریں گے، انہیں ’’بہت بڑے اقتصادی نتائج‘‘ کا سامنا کرنا پڑے گا۔ انہوں نے امریکی اتحادیوں سے ایران کو مزید اقتصادی طور پر تنہا کرنے کی مہم میں شامل ہونے کی اپیل کی۔ ٹرمپ نے ایرانی تیل کی اسمگلنگ، کرنسی تبادلے، نقد رقم کی منتقلی، ایکسچینج ہاؤسز، جہازوں کی رجسٹری اور فرضی کمپنیوں کے ذریعے ہونے والی سرگرمیوں کو فوری طور پر روکنے کا مطالبہ کیا۔ انہوں نے یہ بھی کہا کہ ایران کو جوہری ہتھیار حاصل کرنے کی اجازت نہیں دی جائے گی۔
چین نے بھی امریکی اعلان پر ردعمل ظاہر کرتے ہوئے کہا ہے کہ پابندیاں اور دباؤ مسائل کا حل نہیں ہیں اور تمام فریقوں کو سیاسی و سفارتی راستہ اختیار کرنا چاہیے۔ ہندوستان نے اسرائیل-فلسطین تنازع کے حل کے لیے مذاکرات کے ذریعے دو ریاستی حل کی اپنی مضبوط حمایت کا اعادہ کیا ہے۔ ہندوستان نے فلسطین کے لیے اپنی ترقیاتی اور انسانی امداد میں توسیع پر بھی زور دیا۔
وزارت خارجہ کے ترجمان رندھیر جیسوال نے میڈیا بریفنگ میں وزارت خارجہ کی سکریٹری سری پریا رنگناتھن کے 18 سے 20 اگست تک جاری رہنے والے رام اللہ کے تین روزہ دورے کی تفصیلات بتائیں۔ دورے کے دوران انہوں نے فلسطینی اتھارٹی کے اعلیٰ رہنماؤں، جن میں وزیر اعظم محمد مصطفیٰ، وزیر خارجہ اور دیگر کابینہ ارکان شامل تھے، سے ملاقاتیں کیں۔ جیسوال نے بتایا کہ ہندوستانی سفارت کار نے جینین میں 200 بستروں والے سپر اسپیشلٹی اسپتال کے سنگ بنیاد کی تقریب میں شرکت کی، زندگی بچانے والی ادویات فراہم کیں اور ایک پیشہ ورانہ تربیتی مرکز قائم کرنے کے لیے مفاہمت کی یادداشت (ایم او یو) پر دستخط کیے۔
انہوں نے کہا، ’’انہوں نے 18 سے 20 اگست تک رام اللہ کا دورہ کیا۔ انہوں نے وزیر اعظم، وزیر خارجہ اور دیگر کابینہ ارکان سے ملاقات کی۔ انہوں نے مذاکرات کے ذریعے دو ریاستی حل کے لیے ہندوستان کی حمایت کا اعادہ کیا اور غزہ میں انسانی امداد کی مسلسل فراہمی کی اہمیت پر زور دیا۔‘‘ جب ترجمان سے پوچھا گیا کہ ’’مذاکرات کے ذریعے‘‘ دو ریاستی حل پر زور دینا کیا ہندوستان کی پالیسی میں کسی تبدیلی کی علامت ہے، تو جیسوال نے واضح کیا، ’’ہم دو ریاستی حل کی حمایت کرتے ہیں۔‘‘
سری پریا رنگناتھن نے فلسطینی وزیر اعظم محمد مصطفیٰ، وزیر خارجہ و تارکین وطن امور وارسن اغابیکیان شاہین، وزیر صحت ماجد ابو رمضان، وزیر محنت ایناس دہدہ عطاری اور صدر کے سفارتی امور کے مشیر مجدي الخالدی سے بھی ملاقات کی۔ وزارت خارجہ کے مطابق ان ملاقاتوں میں ہندوستان اور فلسطین کے تعلقات کے تمام پہلوؤں کا جائزہ لیا گیا، علاقائی اور بین الاقوامی صورتحال پر تبادلہ خیال ہوا اور باہمی تعاون کو مزید مضبوط بنانے کے طریقوں پر غور کیا گیا۔ رنگناتھن نے مذاکرات کے ذریعے دو ریاستی حل کے لیے ہندوستان کی اصولی اور دیرینہ حمایت کا اعادہ کیا۔
