کیف۔ ہندوستان کے یوکرین کے لیے نامزد سفیر انجنی کمار نے یوکرین کی وزارت خارجہ میں نائب وزیر خارجہ اولیکساندر میشینکو کو اپنی اسناد کی نقل پیش کی۔ اس موقع پر دونوں فریقوں نے دوطرفہ تعلقات کو مزید مضبوط بنانے کے طریقوں پر تبادلہ خیال کیا۔ہندوستانی سفارتخانے نے پیر کے روز ایکس پر جاری بیان میں اس پیش رفت کی اطلاع دی۔سفارتخانے نے کہا کہ ہندوستان کے یوکرین کے لیے نامزد سفیر انجنی کمار نے آج وزارت خارجہ میں یوکرین کے نائب وزیر خارجہ اولیکساندر میشینکو کو اپنی اسناد کی نقل پیش کی۔ دونوں نے دوطرفہ تعلقات کو مزید مضبوط بنانے کے حوالے سے بات چیت کی۔

اس سے قبل 30 جولائی کو ہندوستان کے وزیر خارجہ ایس جے شنکر نے اپنے یوکرینی ہم منصب آندری سیبیہا سے فون پر گفتگو کی تھی۔ دونوں وزرا نے یوکرین تنازع سے متعلق حالیہ پیش رفت اور جاری امن مذاکرات پر تبادلہ خیال کیا تھا۔جے شنکر نے ایکس پر ایک پوسٹ میں کہا تھا کہ انہیں اپنے یوکرینی ہم منصب سے روس اور یوکرین کے درمیان جاری تنازع سے متعلق تازہ ترین صورتحال کے بارے میں معلومات دی گئیں۔ یہ تنازع فروری 2022 میں روس کی جانب سے یوکرین پر حملے کے بعد 4 سال سے زائد عرصے سے جاری ہے۔

جے شنکر نے کہا تھا کہ انہیں یوکرین تنازع اور امن مذاکرات سے متعلق حالیہ پیش رفت سے آگاہ کیا گیا۔ انہوں نے کہا کہ ہندوستان متعلقہ فریقوں کے درمیان بات چیت اور سفارت کاری کی مسلسل حمایت کرتا رہا ہے۔انہوں نے مختلف خطوں میں جاری تنازعات کے وسیع تر اثرات کی جانب بھی توجہ دلائی اور کہا کہ موجودہ بین الاقوامی صورتحال بدستور نازک ہے۔جے شنکر نے کہا کہ مختلف خطوں میں جاری متعدد تنازعات عالمی سطح پر ایندھن۔ کھاد اور غذائی تحفظ کو متاثر کر رہے ہیں۔ اس کا اثر خاص طور پر گلوبل ساؤتھ کے ممالک پر پڑ رہا ہے۔

دونوں وزرا نے رابطے میں رہنے پر اتفاق کیا۔یوکرین کے وزیر خارجہ آندری سیبیہا نے بھی ایکس پر اس گفتگو کی تصدیق کی۔ انہوں نے کہا کہ انہوں نے جے شنکر کو یوکرینی صدر ولودیمیر زیلنسکی کے حالیہ دورہ واشنگٹن کے نتائج سے آگاہ کیا۔ اس دورے کے دوران زیلنسکی نے امریکی صدر ڈونلڈ ٹرمپ سے ملاقات کی تھی۔سیبیہا نے کہا کہ دونوں نے اپنے حالیہ بین الاقوامی رابطوں کے بارے میں بھی ایک دوسرے کو معلومات فراہم کیں۔انہوں نے مزید کہا کہ روس اور یوکرین کے درمیان جاری جنگ عالمی توانائی کی منڈیوں کو بھی متاثر کر رہی ہے اور وسیع تر عدم استحکام پیدا کر رہی ہے۔یوکرینی وزیر خارجہ نے کہا کہ ان کا ملک جامع اور پائیدار امن کے حصول کے لیے پرعزم ہے۔ انہوں نے ہندوستان پر زور دیا کہ وہ امن کی کوششوں میں فعال کردار ادا کرے۔سیبیہا نے کہا کہ دونوں ممالک کے درمیان قریبی رابطہ برقرار رکھنے پر اتفاق ہوا ہے۔