کولمبو، 30 نومبر: جب طوفان ڈیٹواہ نے سری لنکا کو بری طرح متاثر کیا، تو بھارت نے فوراً آپریشن ساگر بندھو شروع کیا۔ جیسے کوئی قریبی دوست مشکل میں ہو تو دوسرے ہی لمحے دروازہ کھٹکھٹا دے، ویسے ہی بھارت نے اپنی فضائیہ، بحریہ اور این ڈی آر ایف کی ٹیموں کو حرکت میں لایا، جو دن رات لوگوں کی جانیں بچانے اور مدد پہنچانے میں لگے ہوئے ہیں۔

اب تک 27 ٹن امدادی سامان کولمبو پہنچایا جا چکا ہے۔ بھارتی فضائیہ نے Mi-17 V5 ہیلی کاپٹر کولمبو میں تعینات کیے ہیں تاکہ جلدی سے ریسکیو اور امدادی کام کیے جا سکیں۔ C-130 اور IL-76 جیسے بڑے فوجی طیارے بھی ہندن ایئر بیس سے اُڑ کر آئے، جو 80 سے زیادہ این ڈی آر ایف اہلکاروں اور 8 ٹن آلات کے ساتھ سری لنکا پہنچے۔

بھارتی بحری جہاز INS Vikrant اور INS Udaygiri نے بھی امدادی سامان فراہم کیا۔ وکرانت کے دو چیتک ہیلی کاپٹر سری لنکن فضائیہ کے اہلکاروں کے ساتھ مل کر سرچ اینڈ ریسکیو مشنز کر رہے ہیں۔

وزیراعظم نریندر مودی نے سری لنکا کے لوگوں سے تعزیت کا اظہار کیا اور کہا کہ بھارت مشکل گھڑی میں ہمیشہ ان کے ساتھ کھڑا ہے۔ بھارت کی Neighbourhood First پالیسی اور MAHASAGAR وژن کے تحت ملک خطے میں پہلے ریسپانڈر اور قابلِ بھروسہ مددگار کا کردار ادا کرتا ہے۔

سری لنکا کے مقامی میڈیا کے مطابق، بھارتی بحریہ کے ہیلی کاپٹروں نے سیلاب میں پھنسے آٹھ افراد کو نکالا، اور چار بھارتی ہیلی کاپٹر اس وقت ملک کے مختلف حصوں میں ریسکیو اور امدادی کارروائیوں میں شریک ہیں۔ یہ لوگ مقامی فضائیہ، بحریہ، فوج اور پولیس کے ساتھ مل کر پھنسے ہوئے لوگوں کو نکال رہے ہیں، راشن پہنچا رہے ہیں اور سیلاب زدہ علاقوں میں مدد فراہم کر رہے ہیں۔

بھارتی فضائیہ نے بتایا کہ خیمے، ترپال، کمبل، طبی سامان اور تیار کھانے جیسے ضروری سامان بھی مسلسل بھیجے جا رہے ہیں۔ ایک جہاز میں تقریباً 12 ٹن امدادی سامان کولمبو اتارا گیا۔اسی طرح IL-76 کے ذریعے 80 این ڈی آر ایف اہلکار — جن میں خواتین اہلکار اور سونگھنے والے تربیت یافتہ کتے بھی شامل ہیں — سری لنکا پہنچے تاکہ ریسکیو ٹیموں کی طاقت بڑھائی جا سکے۔ ہفتے کے روز مزید دو Mi-17V5 ہیلی کاپٹر بھی سری لنکا پہنچے۔این ڈی آر ایف کی ٹیمیں ملک کے مختلف حصوں میں ریسکیو کرتے ہوئے بھی دیکھی گئیں۔