نیویارک

ہندوستان نے منگل کے روز اقوام متحدہ کی سلامتی کونسل میں دوسری عالمی جنگ اور سرد جنگ کے دوران امن قائم رکھنے کے لیے اپنی تاریخی خدمات کو یاد کرتے ہوئے کہا کہ ان قربانیوں سے امن، کثیرالجہتی تعاون اور اقوام متحدہ کے لیے اس کے دیرینہ عزم کی عکاسی ہوتی ہے۔

اقوام متحدہ کی سلامتی کونسل میں "اقوام متحدہ کے منشور کے مقاصد اور اصولوں کا تحفظ اور اقوام متحدہ پر مبنی بین الاقوامی نظام کو مضبوط بنانا" کے موضوع پر منعقدہ کھلی بحث سے خطاب کرتے ہوئے اقوام متحدہ میں ہندوستان کے مستقل نمائندے سفیر ہریش پروتھانینی نے اقوام متحدہ کے ساتھ ہندوستان کے گہرے تعلق اور عالمی نظام کی تشکیل میں اس کے مسلسل کردار پر روشنی ڈالی۔

انہوں نے کہا کہ اس ادارے کی بنیادیں دوسری عالمی جنگ کی تباہ کاریوں کے درمیان رکھی گئی تھیں۔ اس جنگ کے تباہ کن اثرات میرے ملک ہندوستان نے بھی محسوس کیے۔ پچیس لاکھ سے زائد ہندوستانی فوجیوں نے اتحادی طاقتوں کے ساتھ مل کر جنگ لڑی اور 87 ہزار سے زیادہ ہندوستانی فوجیوں نے اپنی جانوں کا نذرانہ پیش کیا۔ یہ ہماری جنگ نہیں تھی، لیکن ہم نے اس کی بھاری قیمت ادا کی۔ اسی لیے ہمارے لیے اقوام متحدہ کا بانی رکن بننا فطری بات تھی۔ یہ امن کے لیے ہماری خواہش کا اظہار تھا۔

انہوں نے کہا کہ اگرچہ دنیا نے نوآبادیاتی سیاست، اقوام متحدہ کے منشور کے مقاصد اور اصولوں کے احترام میں کمی اور ایشیا و افریقہ کے ممالک کو نوآبادیاتی نظام سے آزادی حاصل کرنے میں درپیش طویل جدوجہد جیسے چیلنجوں کا سامنا کیا، لیکن ہندوستان نے کبھی بھی اقوام متحدہ اور کثیرالجہتی نظام پر اپنے غیر متزلزل اعتماد پر سمجھوتہ نہیں کیا۔

انہوں نے مزید کہا کہ سرد جنگ کے دوران ہندوستان نے اقوام متحدہ کے امن مشنز کے قیام اور بین الاقوامی امن و سلامتی کے تحفظ میں بنیادی کردار ادا کیا، جن میں کوریا، انڈوچائنا، کانگو اور غزہ شامل ہیں۔ آج بھی ہندوستان اسی سوچ اور طرزِ عمل پر کاربند ہے۔سفیر ہریش پروتھانینی نے اقوام متحدہ میں اصلاحات کے مطالبے کو بھی دہرایا اور کہا کہ ادارے کی کارکردگی بہتر بنانے کے لیے ضروری ہے کہ اسے موجودہ عالمی حقائق کے مطابق ڈھالا جائے۔

انہوں نے کہا کہ 1940 کی دہائی کے ڈھانچے میں جکڑی ہوئی اقوام متحدہ موجودہ دور کے پیچیدہ چیلنجوں سے مؤثر انداز میں نمٹ نہیں سکتی۔انہوں نے اقوام متحدہ پر مبنی بین الاقوامی نظام کو مضبوط بنانے کے لیے ہندوستان کی تجاویز پیش کرتے ہوئے کہا کہ جنرل اسمبلی کو مزید مؤثر بنایا جائے، بامقصد اصلاحات متعارف کرائی جائیں اور سلامتی کونسل میں توسیع کی جائے تاکہ وہ موجودہ جغرافیائی و سیاسی حقائق کی بہتر نمائندگی کر سکے۔ اس کے ساتھ ساتھ سلامتی کونسل کے کام کاج میں شفافیت بھی بڑھائی جائے۔

انہوں نے کہا کہ اقوام متحدہ کی وسیع رکنیت سلامتی کونسل کے تمام معاملات میں ایک اہم فریق ہے۔ تاریخی اور موجودہ دستاویزات تک رسائی سے محروم رکھنا اور قواعد و ضوابط کو عارضی حیثیت میں برقرار رکھنا آج کے دور میں قابلِ قبول نہیں۔ سلامتی کونسل کے طریقۂ کار کو وقت کے تقاضوں کے مطابق ازسرِنو ترتیب دینا ہوگا۔

سفیر پروتھانینی نے زور دیتے ہوئے کہا کہ اقوام متحدہ کی سلامتی کونسل ایک زندہ اور متحرک ادارہ ہونی چاہیے، کوئی قدیم فوسل نہیں۔ اس معاملے پر مستقل اراکین کو سب سے زیادہ سنجیدگی کے ساتھ غور و فکر کرنا چاہیے۔