نئی دہلی: گزشتہ چند دنوں سے مختلف میڈیا رپورٹس میں یہ دعویٰ کیا جا رہا تھا کہ بھارت اور پاکستان کے درمیان سری لنکا کے دارالحکومت کولمبو میں ایک غیر رسمی ملاقات ہوئی ہے۔ اس پر بھارتی حکومت نے وضاحت کرتے ہوئے کہا ہے کہ اس میں کوئی نئی یا غیر معمولی بات نہیں اور نہ ہی یہ کوئی سرکاری ملاقات تھی۔
بھارتی وزارت خارجہ کے مطابق اس نوعیت کی غیر رسمی بات چیت کو "ٹریک ٹو ڈائیلاگ" کہا جاتا ہے، جس میں حکومتوں کے نمائندوں کے بجائے ریٹائرڈ سفارت کار، سابق فوجی افسران، ماہرین اور سول سوسائٹی کے افراد شریک ہوتے ہیں تاکہ سیاسی دباؤ سے آزاد ہو کر دونوں ممالک کے درمیان کشیدگی کم کرنے کے امکانات پر تبادلۂ خیال کیا جا سکے۔
کولمبو میں بھارت اور پاکستان کے درمیان ہونے والے مبینہ ٹریک ٹو مذاکرات کے بارے میں سوال پر بھارتی خارجہ سیکریٹری وکرم مصری نے کہا کہ انہوں نے ایسی خبریں دیکھی ہیں اور ان سے آگاہ ہیں، لیکن دنیا بھر میں اس نوعیت کے درجنوں پروگرام مختلف موضوعات پر ہوتے رہتے ہیں۔
#WATCH | Victoria, Seychelles: On being asked about Track 2 India-Pakistan dialogue in Colombo, Foreign Secretary Vikram Misri says, "I have seen the reports. I am aware of them. Dozens of these kinds of events take place in dozens of places around the world on a whole variety of… pic.twitter.com/Z54aCxbTUr
— ANI (@ANI) June 29, 2026
ان کے مطابق یہ نجی اداروں کے زیر اہتمام ہونے والی سرگرمیاں ہیں اور بھارتی حکومت کی نظر میں ان کی کوئی سرکاری حیثیت نہیں۔ وکرم مصری نے کہا کہ وہ پاکستانی حکومت کی جانب سے کچھ نہیں کہہ سکتے، تاہم بھارتی حکومت کا ان پروگراموں سے کوئی سرکاری تعلق، حمایت یا شمولیت نہیں ہوتی۔
انہوں نے کہا کہ بھارت سے شریک ہونے والے ریٹائرڈ سفارت کار، سابق فوجی افسران یا سول سوسائٹی کے نمائندے صرف اپنی ذاتی رائے پیش کرتے ہیں، وہ کسی صورت بھارتی حکومت کے مؤقف کی نمائندگی نہیں کرتے۔ ان کے مطابق حکومت ایسے پروگراموں کو کوئی خاص اہمیت نہیں دیتی۔
این ڈی ٹی وی کی رپورٹ کے مطابق کولمبو کے ایک ہوٹل میں تقریباً دو روز تک جاری رہنے والی اس غیر رسمی ملاقات میں بھارت کی جانب سے سابق آرمی چیف جنرل ایم ایم نرونے، انڈیا فاؤنڈیشن کے صدر رام مادھو اور سابق سفارت کار رُچی گھنشیم شریک ہوئے۔
رپورٹ کے مطابق پاکستان کی جانب سے وزارت خارجہ کے افسر سجاد حیدر خان، سابق سفیر شیری رحمان اور ریٹائرڈ میجر جنرل اسفندیار علی خان پٹودی نے شرکت کی۔ رپورٹ میں دعویٰ کیا گیا ہے کہ اس ملاقات کے دوران سرحد پار دہشت گردی، پانی کی تقسیم اور مستقبل میں فوجی تصادم سے بچاؤ جیسے اہم امور پر تبادلۂ خیال کیا گیا۔
