ٹوکیو: ہندوستاناور جاپان نے جمعہ کے روز دو طرفہ تعلقات کو نئی بلندیوں تک لے جاتے ہوئے مختلف شعبوں میں تعاون کے لیے تین اہم مفاہمتی یادداشتوں(MoUs)اور کئی معاہدوں پر دستخط کیے۔ ان معاہدوں کا مقصد دونوں ممالک کے درمیان خصوصی تزویراتی اور عالمی شراکت داری کو مزید مضبوط کرنا ہے۔یہ معاہدے ٹوکیو میں منعقدہ پندرہویں سالانہ بھارت-جاپان سربراہی اجلاس کے دوران ہوئے، جس میں بھارتی وزیر اعظم نریندر مودی اور جاپانی وزیر اعظم شیگیری اشیبا نے شرکت کی۔ اجلاس کے بعد دونوں رہنماؤں کی موجودگی میں معاہدوں کا تبادلہ کیا گیا۔وزارت خارجہ(MEA) کے مطابق، یہ معاہدے آئندہ دس سالوں کے لیے ایک جامع دو طرفہ فریم ورک فراہم کرتے ہیں۔
تعاون کے اہم شعبے:
معاہدوں میں شامل اہم نکات درج ذیل ہیں:
سرمایہ کاری اور اقتصادی سکیورٹی:
اجلاس میں جاپان کی جانب سے آئندہ دس برسوں میں ہندوستانمیں 10 ٹریلین ین کی نجی سرمایہ کاری کا ہدف مقرر کیا گیا۔
اسی کے ساتھ، دونوں ممالک نے "اکنامک سکیورٹی انیشی ایٹو"کا بھی آغاز کیا جس کا مقصد اہم شعبوں میں سپلائی چین کی مضبوطی ہے۔
دونوں ملکوں نے مشترکہ طور پر "انڈیا-جاپانAI انیشی ایٹو"بھی شروع کیا، تاکہ مصنوعی ذہانت کے شعبے میں اشتراک کو فروغ دیا جا سکے۔
بین العلاقائی روابط اور تجارتی تعاون:
معاہدے کے تحت ہندوستانکی مختلف ریاستوں اور جاپان کی کانسائی اور کیوشو پریفیکچرز کے درمیان بزنس فورمز کے قیام پر بھی اتفاق ہوا۔
اس کے ساتھ، دونوں ممالک نے اعلیٰ سطحی وفود کے تبادلے کے پروگرامز پر بھی اتفاق کیا، تاکہ کاروباری، ثقافتی اور عوامی روابط کو مزید فروغ دیا جا سکے۔
وزیر اعظم مودی کا جاپان کا دورہ:
یہ وزیر اعظم نریندر مودی کا مئی 2023 کے بعد پہلا جاپانی دورہ ہے۔
ٹوکیو میں آمد پر انہیں اعزازی گارڈ آف آنر پیش کیا گیا۔
سربراہی اجلاس کے بعد وزیر اعظم مودی چین کے شہر تیانجن روانہ ہوں گے، جہاں وہ آئندہ ہفتے منعقد ہونے والے شنگھائی تعاون تنظیم(SCO)کے اجلاس میں شرکت کریں گے۔
