نئی دہلی/تیانجن، 31 اگست (اے این آئی): امریکہ کی جانب سے روسی تیل کی خریداری پر ہندوستان پر ٹیکس عائد کرنے کے فیصلے کو امریکی صحافی اور سیاسی مبصر رِک سانچیز نے ’’بے ادبی اور جہالت پر مبنی پالیسی‘‘ قرار دیا ہے۔ روس ٹوڈے کے پروگرام سینچیز ایفیکٹ کے میزبان رِک سانچیز نے کہا کہ ڈونالڈ ٹرمپ بعض اوقات ضد، ذاتی رنجش اور غیر sائنسی سوچ کی بنیاد پر فیصلے کرتے ہیں، جبکہ ہندوستان نے بہت دانشمندی سے اپنے موقف پر قائم رہتے ہوئے امریکہ کو واضح پیغام دیا ہے۔

ای این آئی کو دیے گئے ایک انٹرویو میں سانچیز نے کہا کہ ثانوی ٹیکس کا امریکی فیصلہ ’’انتہائی مضحکہ خیز‘‘ ہے اور اس کا مطلب یہ ہے کہ ہندوستان کے ساتھ ایسا سلوک کیا جا رہا ہے جیسے وہ کوئی اسکولی بچہ ہو جسے بتایا جائے کہ کیا کرنا ہے۔ انہوں نے زور دے کر کہا:
’’ہندوستان کوئی اسکول کا بچہ نہیں، بلکہ ایک بڑا اور طاقتور ملک ہے۔ جب نئی دہلی نے واشنگٹن سے کہا کہ آپ ہمیں نہیں بتا سکتے کہ ہم کہاں سے تیل خریدیں اور کہاں سے نہ خریدیں، تو یہ ایک زلزلہ خیز اور تاریخ ساز لمحہ تھا۔‘‘

سانچیز کے مطابق:’’یہ ٹرمپ انتظامیہ کی بے عزتی پر مبنی اور لاعلمی بھری پالیسی ہے۔ کیونکہ وہ اس پس منظر کو سمجھنے سے قاصر ہیں جس نے روس-یوکرین جنگ کو جنم دیا۔ وزیراعظم مودی نے کچھ حد تک اس نکتے کو سمجھا ہے۔ بے ادبی یہ ہے کہ آپ ہندوستان جیسے ملک کے ساتھ، جس کی تاریخ، وسائل اور صلاحیتیں عظیم ہیں، ایسے سلوک کریں جیسے وہ ایک اسکولی بچہ ہو۔‘‘

انہوں نے مزید کہا کہ جب ہندوستان نے امریکہ کو دو ٹوک انداز میں کہا کہ ہم پر حکم نہیں چلایا جا سکتا، تو مورخین ایک دن اسے وہ لمحہ کہیں گے جب دوسری عالمی جنگ کے بعد دنیا پر حکمرانی کرنے والے یورپ-امریکہ کے زوال کا آغاز ہوا۔ ان کے مطابق طاقت کا مرکز اب عالمی جنوب (Global South) کی طرف منتقل ہو رہا ہے، جہاں ہندوستان، چین، روس، جنوبی افریقہ اور برازیل کلیدی ممالک ہوں گے۔

سانچیز نے ڈونالڈ ٹرمپ کی اس پالیسی کو بھی تنقید کا نشانہ بنایا جس کے تحت جولائی میں ہندوستانی مصنوعات پر پہلے 25 فیصد اور پھر روسی تیل کی درآمد پر مزید 25 فیصد ٹیکس عائد کیا گیا، جو مجموعی طور پر 50 فیصد بنتا ہے۔

انہوں نے کہا کہ ٹرمپ کی بعض پالیسیاں ذاتی ضد یا رنجش کی بنیاد پر ہیں۔ مثال کے طور پر، ٹرمپ بار بار یہ دعویٰ کرتے رہے کہ انہوں نے ہندوستان اور پاکستان کے درمیان آپریشن سندور کے دوران جنگ بندی کروائی، جبکہ نئی دہلی واضح کر چکا ہے کہ ایسا کوئی کردار نہیں تھا اور جنگ بندی پاکستانی ڈی جی ایم او کی درخواست پر دونوں ممالک کی فوجی قیادت کے براہِ راست رابطے سے ہوئی۔

امریکی مالیاتی کمپنی جَیفریز نے بھی اپنی رپورٹ میں کہا کہ 50 فیصد ٹیکس عائد کرنے کی اصل وجہ ٹرمپ کی یہ ناراضگی تھی کہ انہیں ہندوستان-پاکستان معاملے میں ثالثی کا موقع نہیں ملا۔

سانچیز نے ٹرمپ کے مشیر پیٹر نوارو کے اس دعوے کو بھی ’’مضحکہ خیز‘‘ قرار دیا کہ ’’یوکرین جنگ دراصل مودی کی جنگ ہے‘‘۔ ان کے مطابق یہ نوارو کی ناسمجھی اور کمزور فہم کی دلیل ہے۔

انہوں نے کہا:’’امریکہ میں بہت سے لیڈر تاریخ، ثقافت اور تنازعے کے اصل پس منظر کو سمجھنے سے قاصر ہیں۔ ان کے فیصلے اکثر کیبل نیوز پر دیکھے گئے چند مناظر کی بنیاد پر ہوتے ہیں۔‘‘سانچیز نے مزید کہا کہ ٹرمپ کا رویہ غیر متوازن ہے، کیونکہ چین اور یورپ روسی تیل خریدتے رہتے ہیں لیکن ان پر کوئی بڑی پابندی نہیں لگائی گئی، جبکہ ہندوستان کو نشانہ بنایا گیا۔ ان کے مطابق:’’ٹرمپ کی پالیسی میں کوئی تسلسل یا استحکام نہیں ہے۔ یہ اچھی بات نہیں ہے۔‘‘

انہوں نے وضاحت کی کہ امریکہ چین کے خلاف زیادہ سختی اس لیے نہیں کر سکتا کیونکہ اس کی معیشت خود چین پر منحصر ہے۔ امریکی مارکیٹ میں زیادہ تر مصنوعات چین سے آتی ہیں اور امریکہ نے جنگیں لڑنے کے لیے بھی چین سے قرض لے رکھا ہے۔’’اگر امریکہ چین کو نقصان پہنچائے گا تو دراصل خود کو نقصان پہنچائے گا۔ یہ ایک طرح کا دو طرفہ خودکشی ہو گی۔‘‘

ادھر ہندوستان نے امریکی فیصلے کو ’’انتہائی افسوسناک‘‘ قرار دیا ہے۔ وزارتِ خارجہ نے اپنے بیان میں کہا:
’’ہندوستان کی توانائی کی درآمدات خالصتاً مارکیٹ کے عوامل پر مبنی ہیں اور ان کا مقصد 1.4 ارب عوام کی توانائی سلامتی کو یقینی بنانا ہے۔ اس کے باوجود امریکہ کا ہندوستان پر اضافی ٹیکس عائد کرنا غیر منصفانہ اور غیر معقول ہے۔ ہندوستان اپنے قومی مفادات کے تحفظ کے لیے تمام ضروری اقدامات کرے گا۔‘‘

وزارت خارجہ کے مطابق وزیراعظم مودی نے صدر ٹرمپ سے فون پر بات کرتے ہوئے واضح کیا کہ ہندوستان کسی بھی ثالثی کو کبھی قبول نہیں کرے گا۔ پاکستان کے ساتھ جنگ بندی براہِ راست فوجی چینلز کے ذریعے ہوئی اور وہ بھی اسلام آباد کی درخواست پر۔سانچیز نے اپنی گفتگو کے آخر میں کہا کہ ٹرمپ کی پالیسیوں کے نتیجے میں ہندوستان اور چین ایک دوسرے کے قریب آ سکتے ہیں اور وزیراعظم مودی اور صدر شی جن پنگ کی ملاقات دنیا کے لیے ایک نیا پیغام ہو سکتی ہے۔