جکارتہ: ہندوستان اور انڈونیشیا نے منگل کے روز ٹیکنالوجی اور تعلیم کے شعبوں میں دوطرفہ تعلقات کو نئی بلندی دینے کے لیے کئی اہم معاہدوں کو حتمی شکل دی۔ ان معاہدوں کا مقصد دونوں ممالک کے نوجوانوں کو بااختیار بنانا اور مصنوعی ذہانت (اے آئی)، خلائی تحقیق اور دیگر جدید شعبوں میں تعاون کو فروغ دینا ہے۔ اس مضبوط ہوتی شراکت داری کو مزید مستحکم کرنے کے لیے دونوں جمہوری ممالک نے جنوب مشرقی ایشیا میں انڈین انسٹی ٹیوٹ آف مینجمنٹ (آئی آئی ایم) بنگلورو کا ایک کیمپس قائم کرنے کا اعلان کیا، جو پورے آسیان خطے کے طلبہ کو فائدہ پہنچائے گا۔
انڈونیشیا کے صدر پرابوو سوبیانتو کے ساتھ مشترکہ پریس کانفرنس سے خطاب کرتے ہوئے وزیر اعظم نریندر مودی نے دونوں ممالک کی نوجوان آبادی اور تکنیکی صلاحیتوں کو تعلقات کی مضبوط بنیاد قرار دیا۔ انہوں نے کہا، "ہم پائیدار زراعت اور زرعی ٹیکنالوجی کے شعبے میں بھی ایک دوسرے کے بہترین تجربات سے فائدہ اٹھائیں گے۔ اکیسویں صدی ٹیکنالوجی کی صدی ہے۔ ہندوستان اور انڈونیشیا دونوں نوجوان آبادی والے ممالک ہیں اور ہمارے نوجوانوں میں ٹیکنالوجی کو اپنانے کی فطری صلاحیت موجود ہے۔"
اعلیٰ سطحی مذاکرات کے بعد دونوں ممالک نے ایسے عملی فریم ورک پر اتفاق کیا، جن کے ذریعے ادارہ جاتی تعاون اور مشترکہ عوامی ڈیجیٹل پلیٹ فارم کے ذریعے اس تکنیکی مہارت سے فائدہ اٹھایا جائے گا۔ وزیر اعظم مودی نے کہا، "آج ہم نے نوجوانوں کے درمیان مصنوعی ذہانت، ٹیلی کمیونی کیشن اور ڈیجیٹل عوامی بنیادی ڈھانچے جیسے شعبوں میں تکنیکی تعاون بڑھانے کے لیے ایک اہم معاہدہ کیا ہے۔ ہم نے دونوں ممالک کے اسٹارٹ اپس کے درمیان تعاون کو مزید مضبوط بنانے پر بھی اتفاق کیا ہے۔ اس کے علاوہ، ہندوستان کے ممتاز ادارے آئی آئی ایم بنگلورو کا ایک کیمپس انڈونیشیا میں قائم کیا جائے گا، جس سے پورے آسیان خطے کے نوجوانوں کو فائدہ ہوگا۔
" انہوں نے کہا کہ دونوں ممالک کے درمیان خلائی شعبے میں بھی کئی دہائیوں پر محیط بااعتماد شراکت داری موجود ہے۔ مودی نے کہا، "اسی بنیاد پر آج خلائی تحقیق، ٹیکنالوجی کے تبادلے اور صلاحیت سازی کے شعبوں میں مشترکہ تعاون سے متعلق کئی اہم فیصلے کیے گئے ہیں۔" یہ معاہدے منگل کے روز جکارتہ میں وزیر اعظم مودی کے شاندار سرکاری استقبال کے بعد طے پائے۔
ان کے سرکاری دورے کے آغاز پر گھڑ سوار دستوں، گارڈ آف آنر اور بڑی تعداد میں موجود لوگوں نے ان کا پرتپاک خیرمقدم کیا۔ انڈونیشیا کے صدر پرابوو سوبیانتو نے خود وزیر اعظم مودی کا استقبال کیا اور دونوں رہنماؤں نے گرمجوشی سے معانقہ کیا۔ انڈونیشیا نے گھڑ سوار محافظوں اور روایتی ثقافتی پروگراموں سمیت مختلف انداز میں وزیر اعظم مودی کا شاندار استقبال کیا۔ وہ اس وقت اپنے تین ملکی سفارتی دورے کے پہلے مرحلے پر انڈونیشیا میں ہیں۔ یہ دورہ خطے میں ہندوستان کے وسیع تر جغرافیائی و تزویراتی مقاصد کو عملی جامہ پہنانے کے لیے بھی اہم سمجھا جا رہا ہے۔
روانگی سے قبل وزیر اعظم مودی نے کہا تھا، "مشرقی اور جنوبی بحرِ ہند کے خطے میں بالترتیب انڈونیشیا اور آسٹریلیا، اور اس کے بعد نیوزی لینڈ کا میرا دورہ ہندوستان کی ایکٹ ایسٹ پالیسی، مہاساگر وژن اور آزاد و کھلے ہند-بحرالکاہل کے تصور کو مزید مضبوط کرے گا۔" سرکاری ملاقاتوں اور پالیسی امور کے علاوہ وزیر اعظم مودی اپنے دورے کے دوران ہندوستانی برادری کے ارکان سے بھی ملاقات کریں گے تاکہ عوامی سطح پر تعلقات کو مزید مستحکم کیا جا سکے۔
