جکارتہ: ہندوستان اور انڈونیشیا نے منگل کے روز اپنی جامع اسٹریٹجک شراکت داری (Comprehensive Strategic Partnership) کو مزید مضبوط بنانے کے عزم کا اعادہ کیا۔ اس موقع پر وزیرِ اعظم نریندر مودی اور انڈونیشیا کے صدر پرابوو سوبیانتو کے درمیان وسیع پیمانے پر مذاکرات ہوئے، جن میں سیاسی، دفاعی، اقتصادی، تکنیکی، بحری اور علاقائی تعاون سمیت مختلف شعبوں پر تبادلۂ خیال کیا گیا۔

مشترکہ اعلامیے کے مطابق، 6 سے 8 جولائی تک وزیرِ اعظم مودی کا سرکاری دورہ دونوں ممالک کے تعلقات میں ایک اہم سنگِ میل ثابت ہوا۔ یہ دورہ جنوری 2025 میں انڈونیشیا کے صدر پرابوو سوبیانتو کے یومِ جمہوریہ ہند کی تقریبات میں بطور مہمانِ خصوصی شرکت کے بعد باہمی روابط کا تسلسل ہے۔ دونوں رہنماؤں نے باقاعدہ سربراہی اجلاس منعقد کرنے اور دوطرفہ مذاکراتی نظام کو مزید مؤثر بنانے پر اتفاق کیا۔

جکارتہ میں ہونے والی ملاقات کے دوران دونوں رہنماؤں نے متعدد اہم معاہدوں کے تبادلے کی بھی نگرانی کی۔ وزیرِ اعظم مودی نے انڈونیشیا کی پارلیمنٹ سے خطاب کیا، یوگیاکارتا میں واقع یونیسکو کے عالمی ثقافتی ورثے پرمبانان مندر کی ہندوستانی تعاون سے بحالی کے منصوبے کا صدر پرابوو کے ساتھ افتتاح کیا اور بھارتی برادری کی جانب سے منعقدہ استقبالیہ تقریب میں بھی شرکت کی۔

دفاعی اور بحری تعاون کو نئی وسعت

دونوں ممالک نے دفاعی تعاون کو مزید فروغ دینے پر اتفاق کیا، جس میں باقاعدہ مذاکرات، مشترکہ فوجی مشقیں، دفاعی تحقیق، جدید دفاعی ٹیکنالوجی کی مشترکہ تیاری، ہائیڈروگرافی، امن مشنز، انٹیلی جنس معلومات کے تبادلے اور دفاعی صنعت میں اشتراک شامل ہے۔دونوں رہنماؤں نے براہموس میزائل نظام اور فضا سے فضا میں مار کرنے والے میزائلوں سے متعلق تعاون کو دفاعی شراکت داری میں اہم پیش رفت قرار دیا۔

بحری شعبے میں دونوں ممالک نے میری ٹائم ڈومین آگاہی، ساحلی نگرانی، انسانی امداد، قدرتی آفات سے نمٹنے، آلودگی پر قابو پانے اور سرچ اینڈ ریسکیو آپریشنز میں تعاون بڑھانے پر بھی اتفاق کیا۔

دہشت گردی کے خلاف مشترکہ مؤقف

وزیرِ اعظم مودی اور صدر پرابوو نے دہشت گردی کی ہر شکل کی سخت الفاظ میں مذمت کرتے ہوئے عالمی برادری سے دہشت گردی کے خاتمے کے لیے مؤثر اقدامات کا مطالبہ کیا۔دونوں رہنماؤں نے اقوام متحدہ کی سلامتی کونسل کی 1267 پابندیوں کی کمیٹی میں شامل دہشت گردوں اور دہشت گرد تنظیموں کے خلاف کارروائی کی ضرورت پر زور دیا۔ دونوں ممالک نے دہشت گردی، دہشت گردوں کی مالی معاونت، سائبر جرائم، منظم جرائم اور نئی ٹیکنالوجی کے دہشت گردانہ استعمال کی روک تھام کے لیے تعاون بڑھانے پر بھی اتفاق کیا۔

تجارت، سرمایہ کاری اور معیشت

دونوں رہنماؤں نے تجارت اور سرمایہ کاری کو دوطرفہ تعلقات کا بنیادی ستون قرار دیتے ہوئے آسیان-ہند تجارتی معاہدے (AITIGA) پر نظرثانی جلد مکمل کرنے کی ضرورت پر زور دیا۔انہوں نے مالیاتی شعبے، ڈیجیٹل معیشت، اہم معدنیات اور مضبوط سپلائی چینز میں تعاون بڑھانے پر بھی اتفاق کیا۔

اس موقع پر معدنیات اور اسٹیل کی سپلائی چین سے متعلق اہم معاہدوں کا خیرمقدم کیا گیا، جن میں اسٹیل اتھارٹی آف انڈیا (SAIL) اور پی ٹی کراکاٹاؤ اسٹیل کے درمیان انڈونیشیا میں اسٹین لیس اسٹیل سلیب مینوفیکچرنگ پلانٹ کے قیام کے امکانات کا جائزہ لینے کے لیے مشترکہ منصوبہ بھی شامل ہے۔

دونوں ممالک نے ریزرو بینک آف انڈیا اور بینک انڈونیشیا کے درمیان مقامی کرنسی میں لین دین کے نظام میں پیش رفت کا بھی خیرمقدم کیا تاکہ تجارت اور سرمایہ کاری کو مزید آسان بنایا جا سکے۔

صحت، توانائی اور زراعت

دونوں ممالک نے صحت، ادویات، زراعت، غذائی تحفظ، توانائی اور کھاد کے شعبوں میں تعاون کو مزید مستحکم کرنے کا عزم ظاہر کیا۔اس کے علاوہ پیشہ ور طبی افرادی قوت کی تربیت، طبی مصنوعات کے ضوابط، قابلِ تجدید توانائی، گرین ہائیڈروجن، ایل این جی، بایو انرجی اور توانائی کی بچت کے شعبوں میں بھی اشتراک بڑھانے پر اتفاق کیا گیا۔

رابطوں اور ڈیجیٹل تعاون میں پیش رفت

ہندوستان اور انڈونیشیا نے بحری اور فضائی رابطوں کو مزید بہتر بنانے پر اتفاق کیا۔ انڈونیشیا کے سابانگ بندرگاہ کی مربوط ترقی میں ہندوستان کی دلچسپی کا خیرمقدم کیا گیا، جس سے بھارت کے انڈمان و نکوبار جزائر اور انڈونیشیا کے سوماترا کے درمیان روابط مضبوط ہونے کی توقع ہے۔دونوں ممالک نے ہندوستان کے اوپن نیٹ ورک فار ڈیجیٹل کامرس (ONDC) کی طرز پر انڈونیشیا کے اوپن نیٹ ورک اقدام، سرحد پار کیو آر (QR) ادائیگیوں کے نظام اور ٹیلی کمیونیکیشن ٹیکنالوجی سے متعلق مفاہمتی یادداشت کا بھی خیرمقدم کیا۔

خلائی تعاون اور تعلیم

دونوں رہنماؤں نے اسرو (ISRO) اور انڈونیشیا کی قومی تحقیقاتی و اختراعی ایجنسی (BRIN) کے درمیان جاری تعاون، خلائی تحقیق کے پرامن استعمال کے معاہدے میں توسیع اور گگن یان مشن میں اشتراک کا خیرمقدم کیا۔صدر پرابوو نے انڈونیشیا کے سیٹلائٹ لانچ پروگرام اور مجوزہ اسپیس پورٹ منصوبے کے لیے ہندوستان کے تعاون کو بھی سراہا۔

اعلیٰ تعلیم کے میدان میں انڈونیشیا میں انڈین انسٹی ٹیوٹ آف مینجمنٹ، بنگلورو (IIM Bangalore) کے کیمپس کے قیام کی تجویز کا خیرمقدم کیا گیا اور دونوں ممالک کے تعلیمی اداروں کے درمیان روابط بڑھانے پر زور دیا گیا۔

ٹیگور-دیوانتارا سال کا اعلان

دونوں رہنماؤں نے یوگیاکارتا میں واقع پرمبانان مندر کی بحالی کے منصوبے کا مشترکہ افتتاح کیا۔

اس کے ساتھ ہی دونوں ممالک نے 2026-27 کو "ٹیگور-دیوانتارا سال برائے ہند-انڈونیشیا ثقافتی و تعلیمی سفارت کاری" کے طور پر منانے کا اعلان کیا، تاکہ رابندر ناتھ ٹیگور کے 1927 کے تاریخی دورۂ انڈونیشیا کی صد سالہ تقریبات کو سال بھر مختلف ثقافتی اور تعلیمی پروگراموں کے ذریعے منایا جا سکے۔

عالمی اور علاقائی امور

وزیرِ اعظم مودی اور صدر پرابوو نے اقوام متحدہ کی سلامتی کونسل میں اصلاحات، گلوبل ساؤتھ کی مؤثر نمائندگی اور قواعد پر مبنی عالمی نظام کی حمایت کا اعادہ کیا۔

انڈونیشیا نے 2026 میں برکس کی بھارتی صدارت کی حمایت کا اعلان کیا، جبکہ بھارت نے برکس کے رکن کی حیثیت سے انڈونیشیا کے کردار کی بھرپور تائید کی۔

دونوں ممالک نے آزاد، شفاف، پرامن، خوشحال اور جامع انڈو پیسفک خطے کے عزم کا اعادہ کرتے ہوئے خودمختاری، علاقائی سالمیت، بین الاقوامی قانون اور اقوام متحدہ کے سمندری قانون (UNCLOS) کے مطابق جہاز رانی کی آزادی پر زور دیا۔

مغربی ایشیا کی صورتحال پر تشویش کا اظہار کرتے ہوئے دونوں رہنماؤں نے 17 جون 2026 کو طے پانے والی مفاہمتی یادداشت (MoU) کا خیرمقدم کیا، جس میں مذاکرات اور سفارت کاری کے ذریعے کشیدگی کم کرنے پر زور دیا گیا ہے۔ انہوں نے بین الاقوامی قانون کے مطابق آبنائے ہرمز میں جہاز رانی اور آمدورفت کی آزادی برقرار رکھنے کی اہمیت بھی اجاگر کی۔

دورے کے اختتام پر وزیرِ اعظم مودی نے صدر پرابوو کی گرمجوش میزبانی پر شکریہ ادا کیا اور انہیں مناسب وقت پر ہندوستان کے دورے کی دعوت دی۔

دوسری جانب جکارتہ میں بھارتی برادری سے خطاب کے دوران شرکاء نے وزیرِ اعظم مودی کے دورے اور صدر پرابوو کے ساتھ ہونے والے معاہدوں کا خیرمقدم کرتے ہوئے کہا کہ ان سے دونوں ممالک کے تعلقات مزید مضبوط ہوں گے اور نئی شراکت داریوں کا آغاز ہوگا۔