نئی دہلی: بھارت اور ایکواڈور مختلف شعبوں میں اقتصادی اور اسٹریٹجک تعاون کو مزید مضبوط بنانے کے لیے ایک ترجیحی تجارتی معاہدے (Preferential Trade Agreement) پر غور کر رہے ہیں، جس میں صحت، زراعت، ڈیجیٹل ٹیکنالوجی اور سرمایہ کاری جیسے شعبے شامل ہیں۔
وزارتِ خارجہ کے مطابق یہ بات چیت اس ہفتے وزیر خارجہ ایس جے شنکر اور ایکواڈور کی وزیر خارجہ گیبریلا سومرفیلڈ روزیرو کے درمیان ہوئی، جس میں دو طرفہ تعاون کو وسعت دینے پر زور دیا گیا۔ سومرفیلڈ کا دو روزہ دورۂ بھارت، جس میں نائب وزیر خارجہ الیخاندرو ڈاووالوس بھی شامل تھے، وزارتِ خارجہ کے مطابق دونوں ممالک کے تعلقات میں ایک نئے دور کا آغاز قرار دیا گیا ہے۔ 29 اپریل کو ہونے والی ملاقاتوں میں فریقین نے صحت اور دوا سازی، زراعت، تجارت و سرمایہ کاری، ڈیجیٹل ٹیکنالوجی، ثقافتی تبادلے، صلاحیت سازی اور کثیرالجہتی اداروں میں تعاون بڑھانے کے عزم کا اعادہ کیا۔
دورے کے دوران ایک اہم پیش رفت یہ بھی ہوئی کہ ایکواڈور نے باضابطہ طور پر انٹرنیشنل سولر الائنس اور انٹرنیشنل بگ کیٹ الائنس میں شمولیت اختیار کرنے کا فیصلہ کیا، جس کے لیے باضابطہ خطوط بھارتی فریق کے حوالے کیے گئے۔ جے شنکر اور سومرفیلڈ کے درمیان ایک مفاہمتی یادداشت (MoU) پر بھی دستخط ہوئے، جس کے تحت بھارت ایکواڈور میں سماجی و معاشی “کوئک امپیکٹ پروجیکٹس” کے لیے پانچ سال میں 12 کروڑ روپے تک کی گرانٹ امداد فراہم کرے گا، تاکہ مقامی کمیونٹیز کی فلاح و بہبود بہتر بنائی جا سکے۔
علاوہ ازیں، سومرفیلڈ نے وزیر تجارت پیوش گوئل سے بھی ملاقات کی، جس میں ترجیحی تجارتی معاہدے کے روڈ میپ پر بات ہوئی تاکہ تجارت اور سرمایہ کاری کے مواقع بڑھائے جا سکیں۔ بات چیت میں بھارت کی ادویہ سازی کی برآمدات کو ایکواڈور تک بڑھانے اور تانبے اور سونے جیسے اہم معدنیات کی سپلائی چین پارٹنرشپ کو مضبوط بنانے پر بھی غور کیا گیا۔
سومرفیلڈ نے مرکزی وزیر صحت جے پی نڈا سے بھی ملاقات کی، جس میں سستے صحت کے نظام اور جدید طبی سہولیات پر تبادلہ خیال ہوا۔ وزارتِ خارجہ کے مطابق فریقین نے ایک ادارہ جاتی تکنیکی نظام قائم کرنے پر بھی بات کی، جس میں ایکواڈور کی جانب سے انڈین فارماکوپیا کمیشن کے معیار کو تسلیم کرنے کا امکان بھی شامل ہے، تاکہ طبی مصنوعات کے ضوابط میں تعاون کو فروغ دیا جا سکے۔ اس کے علاوہ بھارت کی وزارتِ صحت اور ایکواڈور کی وزارتِ صحت کے درمیان باضابطہ صحت تعاون معاہدہ کرنے پر بھی اتفاق کیا گیا۔
