نئی دہلی:: ہندستانی حکومت نے قطر کے سابق امیر اور فادر امیر شیخ حمد بن خلیفہ آل ثانی کے انتقال پر 13 جولائی، پیر کو ملک بھر میں ایک روزہ قومی سوگ کا اعلان کیا ہے۔

وزارت خارجہ کی جانب سے جاری بیان میں کہا گیا ہے کہ سوگ کے دن ملک بھر میں جہاں جہاں قومی پرچم معمول کے مطابق لہرایا جاتا ہے وہاں اسے سرنگوں رکھا جائے گا، جبکہ اس روز کوئی سرکاری تفریحی تقریب منعقد نہیں ہوگی۔

وزارت خارجہ نے اپنے بیان میں کہا، "حکومت ہندستان نے قطر کے فادر امیر شیخ حمد بن خلیفہ آل ثانی کے آج انتقال پر اظہار تعزیت کے طور پر کل 13 جولائی 2026 کو ایک روزہ قومی سوگ کا اعلان کیا ہے۔ سوگ کے دن پورے ہندستان میں تمام سرکاری عمارتوں پر قومی پرچم سرنگوں رہے گا اور کوئی سرکاری تفریحی پروگرام منعقد نہیں کیا جائے گا۔"

وزارت خارجہ نے بتایا کہ وزیر اعظم نریندر مودی اور پارلیمانی امور و اقلیتی امور کے وزیر کرن رجیجو نے بھی شیخ حمد بن خلیفہ آل ثانی کے انتقال پر گہرے رنج و غم کا اظہار کیا ہے۔

بیان میں کہا گیا، "وزیر اعظم نریندر مودی نے اپنے تعزیتی پیغام میں کہا ہے کہ شیخ حمد بن خلیفہ آل ثانی ایک دور اندیش رہنما تھے جنہوں نے قطر کو ترقی اور خوشحالی کی نئی بلندیوں تک پہنچایا اور وہ ہندستان کے حقیقی دوست بھی تھے۔"

وزارت خارجہ کے مطابق، پارلیمانی امور اور اقلیتی امور کے وزیر کرن رجیجو جلد قطر کا دورہ کریں گے، جہاں وہ حکومت ہندستان کی جانب سے قطر کی حکومت سے اظہار تعزیت کریں گے۔

وزیر اعظم نریندر مودی نے اتوار کو سوشل میڈیا پلیٹ فارم ایکس پر اپنے تعزیتی پیغام میں کہا کہ شیخ حمد بن خلیفہ آل ثانی ایک بصیرت افروز رہنما تھے جنہوں نے اپنے ملک کو ترقی اور خوشحالی کی نئی منزلوں تک پہنچایا۔

انہوں نے کہا، "ریاست قطر کے فادر امیر عزت مآب شیخ حمد بن خلیفہ آل ثانی کے انتقال پر ہمیں گہرا دکھ ہے۔ وہ ایک دور اندیش رہنما تھے جنہوں نے قطر کو غیر معمولی ترقی اور خوشحالی عطا کی۔ میں انہیں ہندستان کا سچا دوست بھی سمجھتا ہوں اور فروری 2024 میں اپنے قطر کے دورے کے دوران ان سے ملاقات میرے لیے اعزاز کی بات تھی۔ میں قطر کے امیر عزت مآب شیخ تمیم بن حمد آل ثانی، شاہی خاندان اور قطر کے عوام سے دلی تعزیت کا اظہار کرتا ہوں۔ اللہ تعالیٰ مرحوم کو اپنی جوارِ رحمت میں جگہ عطا فرمائے۔"

اس سے قبل قطر کے شاہی دیوان نے اعلان کیا تھا کہ قطر کے سابق امیر شیخ حمد بن خلیفہ آل ثانی 74 برس کی عمر میں انتقال کر گئے ہیں۔

شاہی دیوان نے اپنے بیان میں کہا، "اللہ تعالیٰ کے فیصلے پر کامل ایمان کے ساتھ شاہی دیوان قوم کے عظیم نقصان پر اظہار افسوس کرتا ہے۔ قطر کے فادر امیر عزت مآب شیخ حمد بن خلیفہ آل ثانی آج صبح انتقال کر گئے۔ اللہ تعالیٰ ان پر اپنی رحمت نازل فرمائے۔"

شیخ حمد بن خلیفہ آل ثانی نے 1995 سے 2013 تک قطر پر حکومت کی اور انہیں جدید قطر کی ترقی کا معمار سمجھا جاتا ہے۔ ان کے دورِ حکومت میں قطر نے معاشی، سماجی اور ثقافتی میدانوں میں غیر معمولی ترقی کی، جس سے عالمی سطح پر ملک کا وقار مزید بلند ہوا۔

ان کے دور میں 2004 میں قطر کا پہلا مستقل آئین نافذ کیا گیا، جبکہ بلدیاتی انتخابات کا آغاز بھی ہوا، جن میں خواتین کو ووٹ ڈالنے اور انتخاب لڑنے کا حق دیا گیا، جو قطر کی سیاسی اصلاحات میں ایک اہم پیش رفت تصور کی جاتی ہے۔