نئی دہلی: ہندوستان نے 2026 کی پہلی ششماہی میں ایشیا کی مجموعی دفتری جگہ لیزنگ میں 70 فیصد سے زیادہ حصہ حاصل کیا، جس کے باعث پورے ایشیا پیسیفک خطے میں اعلیٰ درجے کی کمرشل رئیل اسٹیٹ سرگرمی کو تقویت ملی۔ یہ بات کولیرز کی ایشیا پیسیفک آفس مارکیٹ انسائٹس H1 2026 رپورٹ میں کہی گئی ہے۔ رپورٹ کے مطابق ایشیا پیسیفک کے 11 اہم بازاروں میں 2026 کی پہلی ششماہی کے دوران مجموعی طور پر 46 لاکھ مربع میٹر، یعنی 4 کروڑ 95 لاکھ مربع فٹ دفتری جگہ لیز پر دی گئی، جو گزشتہ سال کے مقابلے میں 3 فیصد زیادہ ہے۔
دفتری جگہ کی مانگ میں بنیادی طور پر ہندوستان، چین اور جاپان کا اہم کردار رہا، جہاں گریڈ اے دفتری جگہ کی مانگ نے خطے کی مجموعی لیزنگ کا 95 فیصد سے زیادہ حصہ فراہم کیا۔ ہانگ کانگ اور تائیوان میں بھی نمایاں اضافہ دیکھا گیا۔ رپورٹ کے مطابق 11 ایشیا پیسیفک بازاروں میں نئی دفتری جگہ کی فراہمی سالانہ بنیاد پر 37 فیصد کم ہو کر 30 لاکھ مربع میٹر، یعنی 3 کروڑ 23 لاکھ مربع فٹ رہ گئی۔ نئی فراہمی کا 80 فیصد سے زیادہ حصہ صرف ہندوستان اور چین میں رہا۔
کولیرز انڈیا کے منیجنگ ڈائریکٹر، آفس سروسز، ارپت مہروترا نے کہا کہ ہندوستان ایشیا پیسیفک آفس مارکیٹ میں لیزنگ کے حجم کا اہم مرکز بنا ہوا ہے۔ ملک میں گلوبل کیپبیلٹی سینٹرز کی توسیع سمیت مضبوط طلب اس کی بنیادی وجہ ہے۔ انہوں نے کہا کہ 2026 کی پہلی ششماہی میں ہندوستان نے خطے کی مجموعی طلب اور نئی فراہمی دونوں میں دو تہائی سے زیادہ حصہ لیا۔
ان کے مطابق جغرافیائی سیاسی غیر یقینی صورتحال کے باوجود ہنرمند افراد کی دستیابی اور کم لاگت ہندوستان میں دفتری جگہ کی مانگ کو مضبوط بنائے رکھے گی۔ کولیرز انڈیا کے نیشنل ڈائریکٹر اور ہیڈ آف ریسرچ ومل نادر نے کہا کہ ایشیا پیسیفک کے اہم بازاروں میں دفتری جگہ کی مانگ مضبوط رہی ہے اور خطہ عالمی سطح کے دیگر بازاروں کے مقابلے میں بہتر کارکردگی دکھا رہا ہے۔
رپورٹ کے مطابق کاروباری اعتماد، نئی توسیعی منصوبہ بندی اور جدید و اعلیٰ معیار کے دفاتر کی بڑھتی ترجیح آنے والی سہ ماہیوں میں دفتری جگہ کی مانگ کو برقرار رکھے گی، جبکہ ہندوستان لیزنگ کے حجم میں مرکزی کردار ادا کرتا رہے گا۔
کولیرز ایشیا پیسیفک کے منیجنگ ڈائریکٹر مائیک ڈیوس نے کہا کہ 2026 کی دوسری ششماہی میں ایشیا پیسیفک کی آفس مارکیٹ مزید رفتار پکڑ رہی ہے، کیونکہ کمپنیاں باصلاحیت افراد کو راغب کرنے، پیداواریت بڑھانے اور کاروباری ترقی کے لیے اعلیٰ معیار کے دفاتر کو ترجیح دے رہی ہیں۔ رپورٹ میں کہا گیا ہے کہ مضبوط طلب اور نئی دفتری جگہ کی محدود فراہمی کے باعث 2026 کے باقی عرصے میں خالی دفاتر کی شرح مستحکم رہنے اور زیادہ سرگرمی والے بازاروں میں کرایوں میں اضافہ ہونے کا امکان ہے۔
