واشنگٹن ڈی سی: امریکی صدر ڈونلڈ ٹرمپ نے کہا کہ وینیزویلا کی اپوزیشن لیڈر ماریا کورینا مچادو نے نوبل امن انعام اُن کے اعزاز میں قبول کیا ہے اور وہ اُن کی ’’مدد کرتی آئی ہیں‘م۔

ہفتے کے روز ایک بریفنگ کے دوران ٹرمپ نے کہا، ’’جس شخصیت کو نوبل انعام ملا ہے، اُس نے آج مجھے فون کیا اور کہا: ‘میں یہ انعام آپ کے اعزاز میں قبول کر رہی ہوں، کیونکہ اصل میں اس کے مستحق آپ ہیں۔’ میں نے تو یہ نہیں کہا کہ مجھے دو، لیکن شاید وہ دینا چاہتی تھیں… میں خوش ہوں، کیونکہ میں نے لاکھوں جانیں بچائیں۔‘‘

2025 کا نوبل امن انعام ماریا کورینا مچادو کو وینیزویلا میں جمہوری حقوق کے فروغ اور آمریت سے جمہوریت کی پُرامن منتقلی کی کوششوں کے اعتراف میں دیا گیا۔ نوبل کمیٹی نے اُن کی ’’عوامی آزادیوں کے فروغ اور انصاف و امن پر مبنی سیاسی تبدیلی کے لیے انتھک جدوجہد‘‘ کو سراہا۔

ٹرمپ گزشتہ ایک سال سے اس انعام کے لیے سرگرم مہم چلا رہے تھے۔ وہ خود کو ’’صدرِ امن‘‘ قرار دیتے رہے ہیں اور بارہا دعویٰ کیا کہ انہوں نے ’’چھ یا سات جنگیں ختم کیں‘‘۔ ستمبر میں اقوامِ متحدہ کے اجلاس میں انہوں نے کہا تھا کہ ان کا ’’امن کا ریکارڈ‘‘ بے مثال ہے، اور انہوں نے اسرائیل و ایران، بھارت و پاکستان، حتیٰ کہ تھائی لینڈ و کمبوڈیا کے درمیان تنازعات ختم کروائے۔

یہ انعام ٹرمپ کے لیے ذاتی طور پر ایک دھچکا سمجھا جا رہا ہے، کیونکہ وہ کئی بار کہہ چکے ہیں کہ انہیں ’’چار یا پانچ بار یہ انعام مل جانا چاہیے تھا‘‘ اور ’’سب لوگ کہتے ہیں کہ میں اس کا مستحق ہوں‘‘۔ یہ پاکستان کے لیے بھی ایک سفارتی ناکامی کے طور پر دیکھی جا رہی ہے، کیونکہ پاکستان اُن ممالک میں شامل تھا جنہوں نے رسمی طور پر ٹرمپ کو ’’امن کا علمبردار‘‘ قرار دیتے ہوئے انعام کے لیے نامزد کیا تھا۔