واشنگٹن۔ وائٹ ہاؤس نے کہا ہے کہ آبنائے ہرمز ان تمام تجارتی بحری جہازوں کے لیے کھلی ہوئی ہے جو ایرانی بندرگاہوں سے نہ آ رہے ہیں اور نہ وہاں جا رہے ہیں۔ امریکی انتظامیہ کے مطابق ایران پر عائد بحری ناکہ بندی صرف ان جہازوں پر لاگو ہوتی ہے جو ایرانی بندرگاہوں سے منسلک ہیں جبکہ امریکی بحریہ اس اہم آبی گزرگاہ میں محفوظ آمدورفت کو یقینی بنا رہی ہے۔

وائٹ ہاؤس کی پریس سیکریٹری کیرولین لیویٹ نے جمعرات کو پریس بریفنگ کے دوران کہا کہ صدر ڈونلڈ ٹرمپ کی ہدایت پر نافذ کی گئی ناکہ بندی صرف ان بحری جہازوں کے لیے ہے جو ایرانی بندرگاہوں کی طرف جا رہے ہیں یا وہاں سے روانہ ہو رہے ہیں۔ انہوں نے کہا کہ یہ ناکہ بندی مکمل طور پر نافذ العمل ہے اور ایران کی جانب سے امریکہ کے ساتھ طے شدہ معاہدے کی پاسداری نہ کرنے کے باعث دوبارہ نافذ کی گئی ہے۔

لیویٹ کے مطابق اس ناکہ بندی پر عمل درآمد کے لیے خطے میں امریکی فوج کی بڑی تعداد تعینات ہے۔ انہوں نے بتایا کہ اس وقت 10 ہزار سے زیادہ امریکی بحری اہلکار۔ میرینز اور فضائیہ کے اہلکار۔ دو طیارہ بردار جنگی بحری جہاز۔ 20 سے زائد جنگی بحری جہاز اور درجنوں فوجی طیارے اس مشن میں مصروف ہیں۔

انہوں نے کہا کہ ناکہ بندی کے پہلے 24 گھنٹوں کے دوران امریکی سینٹرل کمانڈ نے دو ایسے تجارتی بحری جہازوں کا رخ تبدیل کرایا جنہوں نے امریکی ہدایات پر عمل کیا جبکہ ایک ایسے جہاز کو غیر فعال کر دیا گیا جس نے ناکہ بندی کی پابندی نہیں کی۔

کیرولین لیویٹ نے زور دے کر کہا کہ آبنائے ہرمز میں تجارتی جہازوں کی آمدورفت بدستور جاری ہے اور صرف ایرانی بندرگاہوں سے متعلق جہاز اس پابندی کے دائرے میں آتے ہیں۔ ان کے مطابق امریکی بحریہ اس بات کو یقینی بنا رہی ہے کہ دیگر تمام تجارتی جہاز محفوظ طریقے سے اس آبی گزرگاہ سے گزر سکیں۔

دوسری جانب امریکی سینٹرل کمانڈ نے منگل کو اعلان کیا تھا کہ ایران کی بندرگاہوں اور ساحلی علاقوں سے آنے جانے والے جہازوں کے خلاف بحری ناکہ بندی دوبارہ نافذ کر دی گئی ہے۔

سینٹرل کمانڈ نے اپنے بیان میں کہا کہ یہ اقدام ان فوجی کارروائیوں کا حصہ ہے جن کا مقصد امریکہ کے بقول ایران کی ان صلاحیتوں کو محدود کرنا ہے جو آبنائے ہرمز میں تجارتی جہازوں کو نشانہ بنانے کے لیے استعمال کی جا رہی تھیں۔

امریکی سینٹرل کمانڈ کے مطابق اس وقت خطے میں 20 سے زائد امریکی جنگی بحری جہاز اور سیکڑوں فوجی طیارے ناکہ بندی کے مشن پر تعینات ہیں۔