ڈھاکہ: بنگلہ دیش کے صحافی مقتدر راشد نے حالیہ بدامنی کے باوجود اس یقین کا اظہار کیا ہے کہ فروری 2026 میں عام انتخابات منعقد ہوں گے اور اس حوالے سے پیدا ہونے والے خدشات کو مسترد کیا ہے۔ اے این آئی سے گفتگو میں انہوں نے کہا کہ بنگلہ دیش میں سیاسی قتل کوئی نئی بات نہیں ہے لیکن طالب علم رہنما عثمان ہادی کے قتل نے پورے ملک کو ہلا کر رکھ دیا۔

مقتدر راشد نے کہا کہ بنگلہ دیش میں صورت حال نہایت غیر یقینی ہے کیونکہ انتخابات قریب آ رہے ہیں جو الیکشن کمیشن کے شیڈول کے مطابق ممکنہ طور پر فروری 2026 میں ہوں گے اور ہمیں امید ہے کہ یہ انتخابات ہوں گے۔ انہوں نے کہا کہ اس سے پہلے کئی ایسے واقعات پیش آئے جنہوں نے شدید کنفیوژن اور ہر سطح پر سیاسی ہلچل پیدا کی۔

انہوں نے کہا کہ عثمان ہادی بنگلہ دیش کے ایک باصلاحیت اور محب وطن رہنما تھے اور ایسے رہنما کا قتل ملک کے لیے ایک بہت بڑا صدمہ ہے۔ انہوں نے بتایا کہ 12 دسمبر کو عثمان ہادی کو گولی ماری گئی اور بعد میں وہ سنگاپور کے ایک اسپتال میں انتقال کر گئے جو بنگلہ دیشی سیاست کے لیے نہایت افسوسناک اور حیران کن واقعہ تھا کیونکہ ڈھاکہ میں عوام اور قوم پرستی کے لیے کام کرنے والے رہنما کے ساتھ اس نوعیت کا واقعہ کم ہی دیکھا گیا ہے۔

مقتدر راشد نے مزید کہا کہ عثمان ہادی تشدد کے حامی نہیں تھے اور وہ امن چاہتے تھے جس کی وجہ سے یہ سیاسی قتل مزید پریشان کن بن گیا۔ انہوں نے کہا کہ اگرچہ بنگلہ دیش میں سیاسی قتل کی تاریخ رہی ہے اور ماضی میں بڑی سیاسی جماعتوں کے سینئر رہنما بھی قتل ہوئے ہیں لیکن یہ واقعہ مختلف تھا کیونکہ عثمان ہادی ایک نئی سیاسی شروعات چاہتے تھے جو آزادی کی جنگ کے جذبے اور جولائی اسپرٹ کا امتزاج تھی۔ انہوں نے کہا کہ ان کی گفتگو کبھی کبھار سیاسی ماحول کو گرم ضرور کرتی تھی لیکن وہ ذاتی طور پر پرتشدد نہیں تھے اور نہ ہی ایسا کوئی ثبوت سامنے آیا کہ انہوں نے کسی پر حملہ کیا ہو۔

انہوں نے کہا کہ عثمان ہادی کا قتل ایسے وقت میں ہوا جب بعض مغربی گروہ ملک میں سیاسی کشیدگی پیدا کرنے کی کوشش کر رہے ہیں تاکہ آنے والے انتخابات کے حوالے سے عوام میں شکوک و شبہات پیدا ہوں۔ تاہم انہوں نے کہا کہ جس طریقے سے یہ قتل ہوا وہ کسی عوامی اجتماع میں نہیں تھا۔

مقتدر راشد نے کہا کہ موجودہ حساس دور میں بنگلہ دیش کی قانون نافذ کرنے والی ایجنسیاں کسی بھی ناخوشگوار واقعے سے بچنے کی کوشش کر رہی ہیں اور سیکیورٹی فورسز نے خطرے سے دوچار رہنماؤں کو خصوصی تحفظ فراہم کیا ہے۔انہوں نے کہا کہ جمہوریت ہی بنگلہ دیش کے لیے واحد حل ہے اور اگر جمہوری راستہ اختیار نہ کیا گیا تو یہ نہ صرف بنگلہ دیش بلکہ پورے خطے کے لیے تباہ کن ثابت ہوگا جس میں بھارت اور میانمار بھی شامل ہیں۔ انہوں نے امید ظاہر کی کہ بنگلہ دیش درست راستے پر گامزن ہے۔

مقتدر راشد نے مزید کہا کہ بی این پی کے رہنما طارق رحمان طویل جلاوطنی کے بعد ملک واپس آ رہے ہیں جو سیاسی ماحول کے لیے ایک بڑا موڑ ثابت ہو سکتا ہے۔ انہوں نے کہا کہ سترہ برس سے زائد عرصے بعد ان کی واپسی سیاسی بیانیے میں نئی جان ڈالے گی اور عوامی جلسوں میں ان کی موجودگی سیاسی سوچ میں نمایاں تبدیلی لا سکتی ہے۔

ادھر 22 دسمبر کو بنگلہ دیش کے چیف ایڈوائزر محمد یونس نے ایک بار پھر 12 فروری کو عام انتخابات کرانے کے عزم کا اعادہ کیا اور کہا کہ قوم اپنے ووٹ کے حق کے استعمال کے لیے بے چین ہے۔ انہوں نے یہ بات جنوبی اور وسطی ایشیا کے لیے امریکی خصوصی ایلچی سرجیو گور سے ٹیلی فون پر گفتگو کے دوران کہی۔ محمد یونس نے کہا کہ یہ گفتگو تجارت اور ٹیرف مذاکرات عام انتخابات جمہوری منتقلی اور نوجوان سیاسی کارکن شریف عثمان ہادی کے قتل پر مرکوز رہی۔

فروری میں ہونے والے انتخابات سے قبل جاری سیاسی کشیدگی کے درمیان امریکی قانون سازوں کے ایک گروپ نے بنگلہ دیش کی عبوری حکومت کو خبردار کیا ہے کہ سیاسی جماعتوں کی معطلی اور متنازع انٹرنیشنل کرائمز ٹربیونل کی بحالی انتخابی عمل کی ساکھ کو نقصان پہنچا سکتی ہے۔ انہوں نے اس کے بجائے شفاف اور جامع جمہوری منتقلی پر زور دیا ہے۔