تل ابیب:لبنان کی ایران نواز تنظیم حزب اللہ نے شمالی اسرائیل کے خلاف حالیہ جھڑپوں میں ایک نیا ہتھیار استعمال کرنا شروع کیا ہے۔ یہ چھوٹے ڈرون ہیں جو فائبر آپٹک کی نہایت باریک تار کے ذریعے کنٹرول کیے جاتے ہیں اور الیکٹرانک نگرانی سے بچ نکلتے ہیں۔یہ ڈرون یوکرین جنگ میں بھی بڑے پیمانے پر استعمال ہو رہے ہیں۔ یہ سائز میں چھوٹے ہوتے ہیں انہیں تلاش کرنا مشکل ہوتا ہے اور یہ مہلک ثابت ہو سکتے ہیں۔

عام طور پر ڈرونز کو فضائی دفاعی نظام الیکٹرانک جیمنگ کے ذریعے ناکارہ بنا دیتے ہیں جس سے وہ گر جاتے ہیں یا واپس لوٹ جاتے ہیں۔ لیکن فائبر آپٹک ڈرون اس سے محفوظ رہتے ہیں کیونکہ یہ ریڈیو سگنل کے بجائے براہ راست تار کے ذریعے آپریٹر سے جڑے ہوتے ہیں۔اگرچہ یہ مکمل طور پر ناقابل شکست نہیں کیونکہ ہوا یا دیگر ڈرونز کی وجہ سے تار الجھ سکتی ہے لیکن ماہرین کے مطابق درست استعمال کی صورت میں یہ انتہائی خطرناک ہتھیار ہے۔

اسرائیلی فوجی حکام کے مطابق یہ فائبر آپٹک ڈرون حالیہ لڑائی میں ایک نیا خطرہ بن کر سامنے آئے ہیں۔ خیال کیا جا رہا ہے کہ مضبوط فضائی دفاعی نظام کے بعد حزب اللہ نے اس نئی ٹیکنالوجی کا استعمال شروع کیا ہے۔ان ڈرونز کی تیاری نسبتاً آسان ہے جس کے لیے ایک عام ڈرون تھوڑی مقدار میں دھماکہ خیز مواد اور باریک شفاف تار درکار ہوتی ہے۔ اسرائیل کے مطابق یہ اس وقت لبنان میں موجود فوجیوں کے لیے بڑا خطرہ ہیں اور اس کے جواب میں گاڑیوں پر جال اور حفاظتی ڈھانچے لگائے جا رہے ہیں۔

ماہرین کا کہنا ہے کہ یہ ڈرون زمین کے قریب اور تیزی سے پرواز کرتے ہیں جس کی وجہ سے انہیں تلاش کرنا اور روکنا مشکل ہو جاتا ہے۔روس اور یوکرین کے درمیان جاری جنگ میں نئی ٹیکنالوجی کی دوڑ جاری ہے۔ روس کی جانب سے استعمال کیے جانے والے ڈرونز کو بعض اوقات جیمنگ کے ذریعے روکا جا سکتا ہے اسی مسئلے کے حل کے طور پر فائبر آپٹک ڈرون تیار کیے گئے۔

اگرچہ ان کی رینج محدود ہوتی ہے لیکن بعض صورتوں میں یہ 50 کلومیٹر تک لمبی تار کے ساتھ بھی استعمال کیے گئے ہیں۔ میدان جنگ میں ان ڈرونز کے وسیع استعمال کے باعث کئی علاقوں میں زمین پر باریک تاروں کا جال بچھا ہوا نظر آتا ہے۔حزب اللہ نے حالیہ ہفتوں میں ان ڈرون حملوں کی ویڈیوز بھی جاری کی ہیں خاص طور پر جنوبی لبنان میں اسرائیلی فوجیوں کو نشانہ بنایا گیا۔ ایک حملے میں ایک فوجی ہلاک اور کئی زخمی ہوئے جبکہ ایک اور حملے میں ایک شہری مارا گیا۔

ماہرین کا کہنا ہے کہ ان سے نمٹنے کے لیے یا تو انہیں فضا میں روکنا ہوگا یا ان کی تقریباً نظر نہ آنے والی تار کو کاٹنا ہوگا جو ایک بڑا چیلنج ہے۔یہ نئی ٹیکنالوجی ظاہر کرتی ہے کہ جدید جنگ میں ہتھیاروں کی نوعیت تیزی سے بدل رہی ہے اور دفاعی نظام کو مسلسل نئے چیلنجز کا سامنا ہے۔