واشنگٹن: واشنگٹن ڈی سی میں امریکی صدر ڈونلڈ ٹرمپ نے ایران کی جانب سے آبنائے ہرمز میں بحری آمدورفت بحال کرنے کے اعلان کا خیرمقدم کیا ہے۔یہ ردعمل ایران کے وزیر خارجہ عباس عراقچی کے اس بیان کے بعد سامنے آیا جس میں انہوں نے اعلان کیا کہ لبنان میں جنگ بندی کے نفاذ کے بعد تجارتی جہازوں کو محفوظ گزرگاہ فراہم کی جا رہی ہے، تاہم جہازوں کو ایرانی حکام کے مقرر کردہ راستوں پر ہی سفر کرنا ہوگا۔

صدر ٹرمپ نے سوشل میڈیا پلیٹ فارم ٹروتھ سوشل پر اپنے بیان میں کہا کہ ایران نے اعلان کیا ہے کہ آبنائے ہرمز مکمل طور پر کھلی ہے اور بحری آمدورفت کے لیے تیار ہے۔

ایران کی جانب سے بھی واضح کیا گیا ہے کہ یہ سہولت لبنان میں جاری جنگ بندی کی مدت تک برقرار رہے گی۔ وزیر خارجہ عباس عراقچی نے ایکس پر اپنے پیغام میں کہا کہ جنگ بندی کے تناظر میں تمام تجارتی جہازوں کے لیے آبنائے ہرمز کو مکمل طور پر کھول دیا گیا ہے۔

یہ پیش رفت اس وقت سامنے آئی ہے جب امریکہ کی جانب سے لبنان اور اسرائیل کے درمیان 10 روزہ جنگ بندی کا اعلان کیا گیا ہے۔ صدر ٹرمپ کے مطابق یہ معاہدہ اسرائیلی وزیر اعظم بنیامین نیتن یاہو اور لبنانی صدر جوزف عون کے ساتھ مثبت ٹیلیفونک بات چیت کے بعد طے پایا۔

امریکی صدر نے مزید بتایا کہ دونوں ممالک کی قیادت کے درمیان جلد ایک تاریخی ملاقات متوقع ہے جس میں جنگ بندی کو مستقل امن میں تبدیل کرنے کے امکانات پر غور کیا جائے گا۔

تجزیہ کاروں کے مطابق آبنائے ہرمز کی بحالی عالمی تجارت اور توانائی کی ترسیل کے لیے نہایت اہم پیش رفت ہے جبکہ لبنان میں جنگ بندی کو خطے میں وسیع تر امن کی کوششوں کا اہم حصہ قرار دیا جا رہا ہے۔