کھٹمنڈو: نیپال کے ضلع رسووا میں شدید سیلاب اور لینڈ سلائیڈنگ کے بعد چلیمی سرنگ میں امدادی کارروائیوں کو تیز کرنے کے لیے بھارتی سرنگ ریسکیو ٹیم نے نیپالی فوج کے ساتھ مل کر کام کیا۔ ٹیم نے سرنگ میں جمع پانی نکالا اور شافٹ کی مزید کھدائی کی۔ اس مشترکہ کارروائی سے سرحد پار قدرتی آفات سے نمٹنے اور بھارتی ماہرین و نیپالی دفاعی فورسز کے درمیان تکنیکی تعاون کا اظہار ہوتا ہے۔
نیپال میں ہندوستان کے سفیر نوین سریواستو نے ایکس پر پوسٹ کے ذریعے بتایا کہ ہندوستان سرنگ کے مقام پر تکنیکی مہارت کے ساتھ ساتھ آس پاس کی آبادی کے لیے انسانی امداد فراہم کرکے نیپال کی مدد کے لیے پرعزم ہے۔ ماہر اہلکاروں نے زیرِ زمین راستوں میں جمع پانی کامیابی سے نکال دیا، جس کے بعد کارکنوں کو چلیمی سرنگ میں مزید گہرائی تک کھدائی کرنے اور کمزور حصوں کو محفوظ بنانے میں مدد ملی۔
انجینئرنگ ٹیمیں ایک عارضی راستہ بھی تیار کر رہی ہیں، تاکہ بھاری مشینری اور زیادہ صلاحیت والے آلات کو براہِ راست سرنگ کے دہانے تک پہنچایا جا سکے۔ تکنیکی کارروائیوں کے ساتھ بھارتی وفد کے ساتھ موجود طبی افسران نے مقامی آبادی کے لیے طبی کیمپ بھی لگایا، جہاں لوگوں کا طبی معائنہ کیا گیا اور ضروری سامان فراہم کیا گیا۔ سفیر نے کہا، ’’بھارتی سرنگ ریسکیو ٹیم نے نیپالی فوج کے ساتھ مل کر کل چلیمی سرنگ میں مزید گہرائی تک کھدائی کی اور پانی نکالا۔ بھاری آلات کو سرنگ تک پہنچانے کے لیے عارضی راستہ بھی بنایا جا رہا ہے اور ٹیم کے ساتھ موجود ڈاکٹروں نے مقامی آبادی کے لیے طبی کیمپ لگایا۔
The Indian tunnel rescue team working alongside with Nepali Army dug deeper into Chilime tunnel yesterday draining out water. A temporary track is also being made to allow more heavy equipment to reach tunnel; and doctors with the team held a health camp for the local community.… pic.twitter.com/gwZHbMLvD5
— Naveen Srivastava, Ambassador of India in Nepal (@navsri6619) September 5, 2026
‘‘ دریں اثنا، سیلاب سے متاثرہ مقامی آبادی کو بڑے پیمانے پر نقصان کا سامنا ہے۔ سیلابی ریلے میں کئی مکانات اور عمارتیں بہہ گئیں، اہم بنیادی ڈھانچہ تباہ ہوگیا اور بڑی تعداد میں لوگ اب بھی لاپتہ ہیں۔ مقامی باشندے رام گھلے نے تباہی اور بحالی کی کوششوں کے بارے میں بتایا کہ اسکولوں، اسپتالوں اور گاؤں میں بجلی کی فراہمی کو ترجیحی بنیادوں پر بحال کیا جا رہا ہے۔
انہوں نے کہا، ’’سب کچھ بہہ گیا۔ بڑی تعداد میں لوگ اب بھی لاپتہ ہیں۔ چار اسکول کی عمارتیں مکمل طور پر تباہ ہوگئیں۔ پرسوں تک بجلی بحال کر دی جائے گی، آج ہم تاریں لگا رہے ہیں۔‘‘ بھوٹے کوشی میں آنے والے تباہ کن سیلاب کے بعد حالات معمول پر لانے کی کوششیں جاری ہیں۔ اچانک آنے والے سیلاب نے تعلیمی اداروں کو شدید نقصان پہنچایا اور چار اسکولوں کی عمارتیں تباہ ہونے کے ساتھ ساتھ گاؤں کے کئی حصے بھی بہہ گئے۔ تباہ کن سیلاب میں 1300 سے زیادہ افراد کی ہلاکت کے چند روز بعد رسووا کے بیتراوتی میں بجلی بحال کرنے کا کام جاری ہے۔ بجلی کی فراہمی متاثر ہونے سے گھروں، اسکولوں، اسپتالوں اور دیگر ضروری خدمات پر اثر پڑا ہے۔
مقامی انتظامیہ اور بجلی کے محکمے کے کارکن جنگی پیمانے پر بجلی بحال کرنے میں مصروف ہیں۔ نئے بجلی کے کھمبے لگانے، تباہ شدہ ٹرانسمیشن لائنوں کی مرمت اور دیگر بنیادی ڈھانچے کو بحال کرنے کا کام تیزی سے جاری ہے۔ مقامی باشندے بھی ان کوششوں میں حصہ لے رہے ہیں۔ سیلاب کے بعد پینے کے پانی کے ذرائع آلودہ ہونے اور متعدی بیماریوں کے پھیلنے کا خدشہ بھی بڑھ گیا ہے۔
کھٹمنڈو پوسٹ کے مطابق، سیلاب سے متاثرہ بیدور میں پینے کے پانی کے 15 ذرائع میں سے پانچ میں ای کولی بیکٹیریا پایا گیا ہے۔ حکام تقریباً ایک لاکھ کمزور افراد کو ہیضے کی ویکسین اور 75 ہزار سے زائد بچوں کو خسرہ کی ویکسین دینے پر بھی غور کر رہے ہیں۔ بیدور بھوٹے کوشی سیلاب سے سب سے زیادہ متاثر ہونے والے علاقوں میں شامل ہے۔ جانی نقصان کے علاوہ سیلاب نے پوری بستیاں بہا دیں اور سڑکوں، پلوں اور پینے کے پانی کے نظام سمیت اہم بنیادی ڈھانچے کو نقصان پہنچایا یا تباہ کردیا۔ ماہرینِ صحت نے خبردار کیا ہے کہ اس قدرتی آفت کے بعد متعدی، غیر متعدی اور مچھروں سے پھیلنے والی بیماریوں کا خطرہ بڑھ سکتا ہے۔
انہوں نے حکام کو احتیاطی اور امدادی اقدامات تیز کرنے کا مشورہ دیا ہے، خاص طور پر چھوٹے بچوں، بزرگوں اور غیر متعدی بیماریوں میں مبتلا افراد پر خصوصی توجہ دینے کی ضرورت پر زور دیا ہے۔ امدادی اور بحالی کی کارروائیوں کے درمیان حکومتِ نیپال نے متاثرہ علاقوں کے لیے فوری مالی امداد کا اعلان کیا ہے۔ نیشنل ڈیزاسٹر رسک ریڈکشن اینڈ مینجمنٹ اتھارٹی کے مطابق رسووا اور نواکوٹ کو ایک ایک کروڑ نیپالی روپے، دھادنگ کو 50 لاکھ نیپالی روپے دیے گئے ہیں، جبکہ 15 متاثرہ مقامی حکومتوں کے درمیان 13 کروڑ 50 لاکھ نیپالی روپے تقسیم کیے جا چکے ہیں۔
